Tou Haga Tauhi Kiā Sehova ʼAki He Loto Kātoa
Tou Haga Tauhi Kiā Sehova ʼAki He Loto Kātoa
“Toku foha, ke ke iloi e koe te Atua o tau tamai, pea ke ke tauhi kia ia i tou loto katoa.”—1 KLK. 28:9.
KOTOU KUMI TE ʼU TALI KI TE ʼU FEHUʼI ʼAENĪ:
․․․․․
Koteā te fakaʼuhiga ʼo te kupu “loto”?
․․․․․
Koteā te puleʼaki lelei ʼaē ke tou ʼiloʼi ai ia te ʼuhiga ʼo totatou loto?
․․․․․
ʼE tou lava taupau feafeaʼi ke kātoa ia totatou loto kiā Sehova?
1, 2. (a) Ko te koga fea ʼo te sino ʼaē ʼe lahi tona fakaʼaogaʼi ʼi hona ʼaluʼaga fakatā ʼi te Folafola ʼa te ʼAtua? (b) He koʼē ʼe maʼuhiga ke tou mahino ki te fakaʼuhiga ʼo te kupu loto?
ʼE TAUTAU fakaʼaogaʼi ʼi te folafola ʼa te ʼAtua ia te ʼu koga ʼo te sino ʼo te tagata ʼi hona ʼaluʼaga fakatā. Ohagē lā, neʼe tala fēnei e te pāteliaka ko Sopo: “Nee mole pe uku oku nima i te agatuu.” Neʼe ʼui ia e te Hau ko Salomone: “Ko te malolo anai aia ki ou kanomate, pea mo te fakafoou ki ou hui.” Neʼe fakapapau fēnei e Sehova kiā Esekiele: “E au fakaliliu anai tou lae . . . ke fefeka age i te maka hunu.” Pea neʼe tohi fēnei e te ʼapositolo ko Paulo kiā Timoteo: “Neʼe kaku leva te logo aena kia taliga o natou o te Ekelesia.”—Sopo 16:17; Taag. 3:8; Esk 3:9; Gaue 11:22.
2 Kae ʼe ʼi ai te koga ʼo te sino ʼe lahi tona fakaʼaogaʼi ʼi hona ʼaluʼaga fakatā. Pea ʼe talanoa kiai ʼi te faikole ʼa te fafine tui ko Ana: “E fiafia toku loto i te Eteleno.” (1 Sam. 2:1) ʼI tona fakahagatonu, ʼe teitei tuʼa afe tona talanoaʼi e te ʼu tagata faitohi ʼo te Tohi-Tapu. ʼE maʼuhiga ʼaupitō ke tou mahino ki te fakaʼuhiga ʼo te loto, koteʼuhi ʼe ʼui ʼi te Tohi-Tapu ʼe tonu ke tou taupau.—Lau ia Taaga Lea 4:23.
KOTEĀ TE FAKAʼUHIGA ʼO TE KUPU “LOTO”?
3. ʼE feafeaʼi hatatou mahino ki te fakaʼuhiga ʼo te kupu “loto” ʼi te Tohi-Tapu? Kotou tuku mai he faʼifaʼitaki.
3 Logolā ʼe mole tuku mai ʼi te Tohi-Tapu ia te fakaʼuhiga ʼo te kupu “loto,” kae ʼe feala pē ke tou mahino ki tona fakaʼuhiga. ʼO feafeaʼi? Tou toʼo he faʼifaʼitaki, ohagē lā ko he pāki matalelei neʼe fai ki he kaupā ʼaki he ʼu maka liliki. Kā kotou fakamamaʼo mai te kaupā, ʼe kotou tokagaʼi ai neʼe fakatahiʼi te ʼu maka liliki ke natou faʼufaʼu te pāki ʼaia. ʼO toe fēia aipē, kapau ʼe tou vakaʼi te ʼu faʼahi fuli ʼaē ʼe fakaʼaogaʼi ai te kupu “loto” ʼi te Tohi-Tapu, mo tou fakatahiʼi ia te ʼu manatu ʼaia, pea ʼe tou mahino ai leva ʼe natou faʼufaʼu te manatu e tahi. Koteā te manatu ʼaia?
4. (a) Koteā ʼaē ʼe fakatā e te “loto”? (b) Koteā te fakaʼuhiga ʼo te ʼu palalau ʼa Sesu ʼaē ʼe tuʼu iā Mateo 22:37?
4 ʼE fakaʼaogaʼi e te ʼu tagata faitohi ʼo te Tohi-Tapu te kupu “loto” moʼo talanoa ki te ʼuhiga ʼo te tagata. ʼE toe fakaʼuhiga ki ʼatatou fakaʼamu, mo ʼatatou fakakaukau, mo te agaaga ʼo totatou loto, mo ʼatatou aga, mo ʼotatou faiva pea mo ʼatatou fakatuʼutuʼu. (Lau ia Tetelonome 15:7; Taaga Lea 16:9; Gaue 2:26.) ʼE ʼui ʼi te tohi ʼe fakaʼuhiga te kupu ʼaia kiā “meʼa fuli ʼo te maʼuli ʼo he tagata.” ʼI ʼihi temi ko te kupu “loto” ʼe fakaʼuhiga pē ia ki he manatu e tahi. Ohagē lā, neʼe ʼui e Sesu ʼe ke ʼofa anai kiā Sehova, tou ʼAtua, ʼi tou loto kātoa, mo tou maʼuli kātoa, pea mo tau manatu kātoa. (Mat. 22:37) Ko te kupu “loto” ʼe fakaʼuhiga ʼi henī ki te ʼu meʼa ʼaē ʼe logoʼi mo ʼaē ʼe holi kiai ia he tahi. ʼI te fakakehekeheʼi e Sesu ia te loto, mo te maʼuli pea mo te manatu, neʼe ina fakahā ai ko te ʼofa ʼaē ki te ʼAtua ʼe tonu ke hā ʼi te ʼu meʼa ʼaē ʼi te loto, mo te faʼahiga takitaki ʼo te maʼuli pea mo te fakaʼaogaʼi ʼo te fealagia fakakaukau. (Soa. 17:3; Efe. 6:6) Kae kapau leva ʼe tuʼu tokotahi te kupu “loto” pea ʼe fakaʼuhiga ia ki te ʼu meʼa fuli ʼaia.
ʼE ʼAOGA KE TOU TOKAGA KI TOTATOU LOTO
5. He koʼē ʼe tonu ke tou faiga ke tou tauhi kiā Sehova ʼaki he loto kātoa?
5 Neʼe fakamanatuʼi fēnei e te Hau ko Tavite kiā Salomone: “Toku foha, ke ke iloi e koe te Atua o tau tamai, pea ke ke tauhi kia ia i tou loto katoa, pea mo te loto fiafai, koteuhi e iloi e te Eteleno te u loto fuli pea e ina ulufi te u fakatuutuu fuli mo te u manatu fuli.” (1 Klk. 28:9) ʼE moʼoni, ʼe ʼahiʼahiʼi e Sehova te ʼu loto ʼo te hahaʼi fuli, ʼo kau ai mo tātou. (Taag. 17:3; 21:2) Kapau ʼe lelei kiā Sehova te meʼa ʼaē ʼe ina maʼu ʼi totatou loto pea ʼe tou maʼu tapuakina anai ʼi te temi nei ʼo toe fēia pē ʼi te kā haʼu. Koia, tou fakalogo ki te tokoni ʼa Tavite ʼo tou faiga ke tou tauhi kiā Sehova ʼaki he loto kātoa.
6. Koteā ʼaē ʼe tonu ke tou mahino kiai ʼo ʼuhiga mo tatatou tauhi ʼaē kiā Sehova?
6 ʼI totatou ʼuhiga kau Fakamoʼoni ʼa Sehova, ʼe ʼiloga tatatou fia tauhi ki te ʼAtua ʼaki he loto kātoa ʼi tatatou faʼafai ʼi ʼana gāue. ʼE toe mahino foki kiā tātou, ʼe feala ki te mālohi fakakākā ʼo te tuʼu agakovi ʼa Satana pea mo totatou ʼuhiga agahala ke ina fakavaivaiʼi tatatou tauhi ki te ʼAtua ʼaki he loto ʼe kātoa. (Sel. 17:9; Efe. 2:2) Koia, ʼe tonu ai ke tou vakavakaʼi tuʼumaʼu totatou loto ke ʼaua naʼa hoko ia he meʼa fēia. ʼO feafeaʼi?
7. Koteā ʼaē ʼe ʼiloga ai totatou ʼuhiga totonu?
7 ʼE mole feala ki he tahi ke sio ki totatou ʼuhiga totonu, ohagē ko te ʼuho ʼo he fuʼu ʼakau. Kae, ohagē pē ko te ʼui e Sesu ʼi tana Akonaki ʼi te Moʼuga, ʼe ʼiloga he fuʼu ʼakau ʼe lelei ʼi ʼona fua, koia ʼe ʼiloga te ʼuhiga ʼo totatou loto ʼi ʼatatou gāue. (Mat. 7:17-20) Tou vakaʼi age muʼa he gāue ʼi te ʼu gāue ʼaia.
TE PULEʼAKI LELEI ʼAĒ KE TOU ʼILOʼI AI TE ʼUHIGA ʼO TOTATOU LOTO
8. Ohagē ko tona ʼui e Sesu iā Mateo 6:33, ʼe tou fakahā feafeaʼi ia te ʼuhiga ʼo totatou loto?
8 Neʼe kua fakamahino e Sesu ki ʼana tisipulo te gāue ʼaē ʼe tonu ke natou fai ke hā ai tanatou fia tauhi kiā Sehova ʼaki he loto kātoa. Neʼe ina ʼui fēnei: “Kotou kumi mua te puleaga mo te faitotonu a te Atua, pea e fakalahi atu anai te u mea fuli aena kia koutou.” (Mat. 6:33) ʼE tou fakahā ʼatatou fakaʼamu, mo ʼatatou manatu pea mo ʼatatou fakatuʼutuʼu ʼi te meʼa ʼaē ʼe tou fakamuʼamuʼa ʼi totatou maʼuli. Koia ʼe ko he puleʼaki lelei ke tou ʼiloʼi ai peʼe tou tauhi ki te ʼAtua ʼaki he loto kātoa, ʼi hatatou vakaʼi ia te ʼu meʼa ʼaē ʼe tou fakamuʼamuʼa ʼi totatou maʼuli.
9. Koteā te fakaafe ʼaē neʼe fai e Sesu ki te ʼu tagata, pea neʼe natou tali feafeaʼi?
9 Mole faʼa fualoa ki tana ʼosi ʼui age ki ʼana tisipulo ke natou “kumi mua te puleaga,” neʼe hoko ai te ʼaluʼaga ʼe tou mahino ai ki te loto ʼo te tagata ʼaki pē te meʼa ʼaē neʼe ina fakamuʼamuʼa ʼi tona maʼuli. Neʼe fakamatala fēnei e Luka ʼi tana evaselio, neʼe toʼo leva e Sesu “te fakapapau ke hake ki Selusalemi” logolā tana ʼiloʼi ia te meʼa ʼaē kā hoko anai ki ai. ʼI tana ʼalu “ ʼi te ala” mo ʼana ʼapositolo, neʼe felāveʼi ia Sesu mo te ʼu tagata ʼo ina fakaafe fēnei nātou: “Mulimuli mai ia te au.” Neʼe tali e te ʼu tagata ʼaia te fakaafe ʼa Sesu kae neʼe natou toe loto ki te tahi age meʼa. Neʼe tali fēnei e te tahi: “Fakagafua mai ke au alu mua o tanu taku tamai.” Pea tali fēnei e te tahi age: “Aliki, e au mulimuli anai ia koe, kae fakagafua mai ke au alu mua o tauine mo natou o toku api.” (Luka 9:51, 57-61) ʼE tou tokagaʼi lelei ia te kehekehe ʼo te fakapapau ʼa Sesu ʼaē ke ina fai ia te finegalo ʼo te ʼAtua pea mo te tali ʼo te ʼu tagata ʼaenī. ʼAki te fakamuʼamuʼa ʼo ʼanatou fakatuʼutuʼu, neʼe natou fakahā ai te mole kātoa ʼo tonatou loto ki te ʼAtua.
10. (a) Neʼe tali feafeaʼi e te ʼu tisipulo ʼa Kilisito ia tana fakaafe? (b) Koteā ia te lea fakatā ʼaē neʼe fakaʼaogaʼi e Sesu?
10 ʼE tou kehekehe mo te ʼu tagata ʼaia, koteʼuhi neʼe tou tali ia te fakaafe ʼa Sesu ʼaē ke tou mulimuli iā te ia pea ʼe tou lolotoga tauhi nei kiā Sehova ʼi te ʼaho fuli. ʼE tou fakahā ai ia te meʼa ʼaē ʼe tou fakamuʼamuʼa ʼi totatou loto ʼo ʼuhiga mo Sehova. Kae tatau aipē peʼe tou maʼumaʼua ʼi te tauhi ʼaē kiā Sehova kae ʼe tonu ke tou manatuʼi ʼe feala pē ke tuʼutāmakiʼia totatou loto. Ke tuʼutāmakiʼia ʼi teā? Neʼe fakahā e Sesu ia te tuʼutāmaki ʼaia ʼi tana tali fēnei age ki te ʼu tagata ʼaia: “Ko he tahi pe e kapa tona nima ki te saliote, pea e toe sio ki muli, e mole aoga ia ia ki te puleaga o te Atua.” (Luka 9:62) Koteā te ako ʼe tou maʼu mai te lea fakatā ʼaia?
ʼE TONU KOA KE TOU “PIPIKI FAKAMALOHI KI TE LELEI”?
11. ʼI te lea fakatā ʼa Sesu, koteā ʼaē ʼe feala ke hoko mokā gāue te tagata fuli kele, pea koteā tona tupuʼaga?
11 ʼE lelei ke tou hilifaki ia he ʼu fakamahino ki te lea fakatā ʼa Sesu ke feala hatatou mahino kiai. ʼE lahi te ʼu gāue ʼaē ʼe tonu ke fai e te tagata fuli kele. Kae ʼi tana lolotoga gāue ʼe manamanatu pē ia ki tona loto fale ʼaē ʼe maʼuli ai tona fāmili, mo ʼona kaumeʼa pea mo fiafia ai. Pea ʼe fakaʼamu ia kiai. ʼI te hili ʼo tana fai ia te koga ʼo tana gāue, ʼe holi ia te tagata fuli kele ke “sio ki muli,” ki te ʼu meʼa ʼaē ʼe fiafia ai tona maʼuli. Logolā ʼe kei lahi te gāue ʼe tonu ke fai ʼi muʼa ʼo te tō ʼo te pulapula, kae ʼe lelu tana fakakaukau pea ʼe haʼele kovi tana gāue. Pea ʼe mole toe fiafia te pule ʼo te tagata fuli kele ʼi tana mole faʼa kātaki ʼo fakahoko fakalelei tana gāue.
12. ʼE tatau feafeaʼi ia te ʼaluʼaga ʼo he Kilisitiano iā ʼaho nei mo te tagata fuli kele ʼaē ʼo te lea fakatā ʼa Sesu?
12 Tou vakaʼi ia he ʼaluʼaga ʼe tatau ʼe feala ke hoko iā ʼaho nei. ʼE feala ke tou fakatatau te tagata fuli kele ki te kau Kilisitiano ʼe mālolohi ʼi te faʼahi fakalaumālie kae ʼe lolotoga tuʼutāmakiʼia tonatou loto. Ohagē lā ko he tehina ʼe kau ki te ʼu fono mo te gāue fai fakamafola. Kae ʼi te tahi faʼahi ʼe nofo ʼo fakakaukauʼi te ʼu meʼa ʼaē ʼe ina leleiʼia ʼi te mālama, pea ʼe fakaʼamu lahi tona loto kiai. Ki muli age, ʼi te hili ʼo tana gāue ʼi te minisitelio lolotoga ni taʼu, kua loto leva ia ke “sio ki muli,” ki te ʼu meʼa ʼaē neʼe fakaʼamu kiai. Logolā te kei lahi ʼo te gāue ʼaē ʼe tonu ke fakahoko ʼi te minisitelio, kae neʼe mole ina “taofi mau te folafola o te mauli,” ʼo tōtō ai tana kau ki te ʼu gāue Fakateokalatike. (Filp. 2:16) Pea ko Sehova, “te pule o te taukai,” ʼe mole fiafia mo kapau ʼe mole kei faʼa kātaki he tahi ʼi tana kau gāue.—Luka 10:2.
13. Koteā ʼaē ʼe fakamaʼua ki te tauhi kiā Sehova ʼaki he loto kātoa?
13 ʼE mahino gafua kiā tātou te ako ʼaenī. Ko te tauhi ʼaē kiā Sehova ʼaki he loto kātoa ʼe mole gata ʼaki pē te kau ki te ʼu fono pea mo te gāue fai fakamafola. (2 Klk. 25:1, 2, 27) Kapau ʼe kei nofo he tehina ʼo fakaʼamu ke “sio ki muli,” ki te ʼu meʼa ʼaē ʼe kau ki te faʼahiga maʼuli ʼo te mālamanei, pea ko tana tauhi agatonu ki te ʼAtua ʼe tuʼutāmakiʼia. (Luka 17:32) Kae kapau leva ʼe tou fakapapau ʼe tou “fakalialia ki te kovi” mo “pipiki fakamalohi ki te lelei” pea ʼe tou ʼaoga anai “ki te puleaga o te Atua.” (Loma 12:9; Luka 9:62) Koia lā ʼaē ʼe ʼaoga ai kiā tātou fuli ke tou vakavakaʼi fakalelei peʼe mole ʼi ai he meʼa ʼi te mālama ʼa Satana, ʼe hagē ʼe ʼaoga kiā tātou peʼe tou leleiʼia, ʼe ina tāʼofi tatatou tauhi ʼaki he loto kātoa kiā Sehova.—2 Ko. 11:14; lau ia Filipe 3:13, 14.
TOU NOFO TOKAGA!
14, 15. (a) ʼE faiga feafeaʼi e Satana ke ina fakavaivaiʼi totatou loto? (b) Kotou fakamahino ʼaki he faʼifaʼitaki pe koʼē ʼe fua lelei te faiga ʼaia ʼa Satana.
14 Ko te ʼofa ʼaē kiā Sehova ʼe ina uga tātou ke tou foaki totatou maʼuli kiā te ia. Koia lolotoga ni taʼu, tokolahi iā tātou neʼe tou fakahā ia tatatou tauhi ʼaē kiā Sehova ʼaki he loto kātoa. Kae, ʼe mole haga noa ia Satana kiā tātou, ʼe faiga tuʼumaʼu ia ke ina maʼu totatou loto. (Efe. 6:12) ʼE mahino ia, ʼe ina ʼiloʼi ʼe mole tou hoʼi liʼaki fakafokifā anai ia Sehova. Koia lā ʼaē ʼe ina fakaʼaogaʼi lahi fakafufū ia “te u mea o te sekulo” ʼaenī moʼo fakavaivaiʼi ia tatatou tauhi fakamālotoloto ki te ʼAtua. (Lau ia Maleko 4:18, 19.) He koʼē ʼe fua lelei te faiga ʼaia ʼa Satana?
15 Moʼo tali kiai, tou fakakaukauʼi age te faʼifaʼitaki ʼaenī. ʼE tou lolotoga lautohi kae mū te hila, pea fokifā pē kua motu ia te mataʼi hila. ʼI takotou nofo ʼi te fakapōʼuli, ʼe kotou mahino ki te ʼaluʼaga ʼaē neʼe hoko pea ʼe kotou fakatuʼutuʼu ke kotou fetogi ia te mataʼi hila, ʼo toe mū ai te hila. ʼI te pō ʼaē ʼe hoa mai kiai, ʼe kotou toe lautohi mo te foʼi mataʼi hila pē ʼaia. Kae neʼe mole kotou ʼiloʼi neʼe haʼu te tahi age ʼo fetogi ia te mataʼi hila ʼaia e 100 tona mālohi ʼaki te tahi age e 95 tona mālohi. ʼE kotou tokagaʼi anai koa ia tona kehekehe? Kailoa. Kae ʼe feafeaʼi age lā mo kapau ʼi te ʼaho ʼaē ʼe hoa mai kiai, ʼe haʼu he tahi ʼo fetogi ʼaki he foʼi mataʼi hila e 90 tona mālohi? ʼE lagi mole kotou tokagaʼi anai tona kehekehe. Heʼe koteā tona tupuʼaga? Koteʼuhi neʼe mole kotou tokagaʼi ia te hifohifo māmālie ʼo te mālohi ʼo te foʼi mataʼi hila. ʼE toe fēia mo te ʼu fakaneke fakapulipuli ʼo te tuʼu ʼa Satana ki tatatou tauhi ʼaē kiā Sehova ʼaki he loto kātoa. Kapau ʼe hoko ia te faʼahi ʼaia, pea ʼe hagē pē neʼe fakavaivaiʼi e Satana ia te mālohi ʼo takotou gāue ʼaē kiā Sehova. Koia, kapau ʼe mole nofo tokaga he Kilisitiano pea ʼe feala ke mole ina tokagaʼi ia te fetogi māmālie ʼaē ʼe hoko ki ai.—Mat. 24:42; 1 Pet. 5:8.
ʼE MAʼUHIGA TE FAIKOLE
16. ʼE feafeaʼi hotatou puipui mai te ʼu fakatuʼutuʼu ʼa Satana?
16 ʼE feafeaʼi hotatou puipui mai te ʼu fakatuʼutuʼu ʼa Satana pea mo taupau ia he loto ʼe kātoa kiā Sehova? (2 Ko. 2:11) Ki te faʼahi ʼaia, ʼe maʼuhiga ia te faikole. Neʼe fakalotomālohiʼi e Paulo ia te kau Kilisitiano ke natou tutuʼu mālohi “o fehagai ki te u puleaki kaka a te tiapolo.” Neʼe ina toe uga fēnei nātou: “Kotou fai i te temi fuli . . . te u kole kehekehe fuli pea mo ni tagi.”—Efe. 6:11, 18; 1 Pet. 4:7.
17. Koteā ia te ako ʼe tou maʼu mai te ʼu faikole ʼa Sesu?
17 Ke tou haga taupau tatatou agatonu, ʼe tonu ke tou faʼifaʼitakiʼi ia Sesu pea mo tana tauhi ʼaē kiā Sehova ʼaki he loto kātoa. Kotou fakatokagaʼi ia te fakamatala ʼaenī neʼe fai e Luka ʼo ʼuhiga mo te faikole ʼa Sesu ʼi te pō ʼi muʼa ʼo tona mate: “I tana tugaki, nee asili faikole ia.” (Luka 22:44) ʼI muʼa atu neʼe faikole fakamālotoloto ia Sesu kae ʼi te temi ʼaē neʼe mālohi ai tona ʼahiʼahiʼi neʼe “asili” age tana faikole pea ʼe tou ʼiloʼi neʼe tali tana kole. ʼAki te faʼifaʼitaki ʼaenī ʼa Sesu, ʼe tou mahino ai ʼe kehekehe ia te mālohi ʼa ʼihi faikole. Koia lā ʼaē, kapau ʼe mālohi age te ʼu ʼahiʼahi pea mo te ʼu fakaneke ʼa Satana, pea ʼe tonu ke toe “asili” age tatatou kole ia te puipui ʼa Sehova.
18. (a) He koʼē ʼe tonu ke tou fai ia he ʼu fehuʼi ʼo ʼuhiga mo te faikole, pea koteā tona tupuʼaga? (b) Koteā te ʼu faʼahi ʼaē ʼe malave ki totatou loto, pea ʼi te ʼu ʼaluʼaga fea? (Vakaʼi ia te fakamatala ʼaē ʼe ʼātakai ʼi te pāsina 22.)
18 ʼE malave feafeaʼi ia te ʼu taʼi faikole ʼaia kiā tātou? Neʼe ʼui fēnei e Paulo: “Koutou fakaha ki te Atua te u mea ae e aoga kia koutou aki ni kole, mo ni kolekole, pea mo ni fakafetai, pea ko te tokalelei o te Atua, ae e fakalaka age i te u atamai fuli, e ina taupau anai okotou loto.” (Filp. 4:6, 7) ʼE mahino mai, ʼe tonu ke ʼāʼāsili age tatatou faikole tuʼumaʼu ke feala hatatou haga taupau he loto ʼe kātoa kiā Sehova. (Luka 6:12) Koia, tou fai ia te ʼu fehuʼi ʼaenī: ‘ ʼE loloto feafeaʼi ʼaku faikole? ʼE au faikole tuʼumaʼu koa?’ (Mat. 7:7; Loma 12:12) ʼE ʼiloga anai ʼi ʼakotou tali ia takotou lotomālohi ʼaē ke kotou tauhi ki te ʼAtua.
19. Koteā ʼaē ʼe tonu anai ke tou fai ke tou tauhi ai kiā Sehova mo totatou loto kātoa?
19 Neʼe tou vakaʼi, ʼe feala ke tou ʼiloʼi te ʼuhiga ʼo totatou loto ʼi te ʼu meʼa ʼaē ʼe tou fakamuʼamuʼa ʼi totatou maʼuli. ʼE tonu ke tou vakaʼi fakalelei peʼe mole ʼi ai he ʼaluʼaga ʼi te ʼu meʼa ʼaē kua tou lītuʼa kiai peʼe ko he fakaneke ʼa Satana ʼe ina fakavaivaiʼi tatatou tauhi ʼaē kiā Sehova mo totatou loto kātoa. (Lau ia Luka 21:19, 34-36.) Koia, ohagē ko Tavite, tou haga faikole kiā Sehova ke ina foaki mai ia te “loto ae e holi ki te tauhi.”—1 Klk. 29:19.
[ʼU fehuʼi ʼo te ako]
[Talanoa ʼo te pāsina 22]
TE ʼU FAʼAHI E TOLU ʼAĒ ʼE MALAVE KI TOTATOU LOTO
Ohagē pē ko tatatou fai he ʼu puleʼaki ke lelei ai totatou mafu, ʼe tonu ke tou fakahoko he ʼu fakatuʼutuʼu ke tou taupau ai totatou loto ʼi te faʼahi fakalaumālie. Tou vakaʼi te ʼu faʼahi maʼuhiga ʼaenī e tolu:
1 Te Meʼa Kai: ʼE ʼaoga ki totatou sino ia he meʼa kai ʼe feʼauga pea mo lelei. ʼO toe fēia aipē, ʼe tonu ke tou vakaʼi peʼe feʼauga mo lelei ia te meʼa kai fakalaumālie ʼaē ʼe tou maʼu mai te ako takitokotahi, mo te metitāsio pea mo te kau ki te ʼu fono.—Pes. 1:1, 2; Taag. 15:28; Hep. 10:24, 25.
2 Te Faigaoʼi: Ke mālohi totatou sino, ʼe ʼaoga ke tou faigaoʼi tuʼumaʼu. Pea ʼe toe fēia pē, ko tatatou lagolago mālohi ki te minisitelio ʼe ina fakamālohiʼi tatatou tauhi ʼaē kiā Sehova ʼaki he loto kātoa.—Luka 13:24; Filp. 3:12.
3 Te Fakakaugā: Ko te gāue mo te maʼuli fakatahi mo he hahaʼi ʼe mole natou fakaʼapaʼapa ki te ʼAtua ʼe feala ke fakatupu hoha kiā tātou. Kae, ʼe feala ke tou fakasiʼisiʼi ia te hoha ʼaia mo kapau ʼe tou fakatahi tuʼumaʼu mo ʼotatou tehina mo tuagaʼane, ʼaē ʼe natou tōkakaga fakamālotoloto kiā tātou pea mo kātoa ʼonatou loto kiā Sehova.—Pes. 119:63; Taag. 13:20.