Ko Takotou ʼIo Ke ʼIo

“Ko takotou io ke io, pea ko takotou kailoa ke kailoa.”—MAT. 5:37.

ʼE KOTOU TALI FEAFEAʼI ANAI?

Koteā ʼaē neʼe ʼui e Sesu ʼo ʼuhiga mo te fai ʼo he fakamoʼoni?

He koʼē ʼe ko he faʼifaʼitaki lelei ia Sesu ʼo ʼuhiga mo te fakahoko ʼo he fakapapau?

Ko te ʼu ʼaluʼaga fea ʼaē ʼe tonu ke tou fakahoko ai ia te meʼa ʼaē neʼe kua tou ʼio kiai?

1. Koteā ʼaē neʼe ʼui e Sesu ʼo ʼuhiga mo te fai ʼo he ʼu fakamoʼoni? Pea koteā tona tupuʼaga?

 ʼI TE agamāhani, ʼe mole ʼaoga ki te kau Kilisitiano ke natou fai he fakamoʼoni moʼo fakahā ai ʼe moʼoni ʼanatou palalau. ʼE natou fakalogo ki te meʼa ʼaē neʼe fakatotonu fēnei age e Sesu: “Ko takotou io ke io.” Neʼe fia ʼui e totatou Pule, ko he tahi ʼe ina tala ia te moʼoni ʼe tonu ke ina fai ʼo mulimuli ki ʼana palalau. Neʼe ina ʼui fēnei: “Aua pe naa kotou fai he [fakamoʼoni] e tahi.” Neʼe ina fai ia te ʼu palalau ʼaia he neʼe tokolahi te hahaʼi neʼe natou fai he ʼu fakamoʼoni kae neʼe mole natou fia fakahoko. Koteā ʼaē ʼe hoko mo kapau ʼe fai e he tahi hana fakamoʼoni kae mole ina fakahoko? ʼE ina fakahā ʼe mole tuha mo te falala pea ʼe mulimuli ki “te pule kovi.”—Lau ia Mateo 5:33-37.

2. He koʼē ʼe mole kovi ia te fai ʼo he fakamoʼoni?

² Neʼe mole ʼui e Sesu ʼe kovi ia te fai ʼo he ʼu fakamoʼoni. Ohagē ko tatatou vakaʼi ʼi te ʼalatike kua hili atu, neʼe fai e Sehova ʼAtua pea mo tana tagata kaugana agatonu ko Apalahamo, ia he ʼu fakamoʼoni ʼo ʼuhiga mo he ʼu ʼaluʼaga maʼuhiga. Pea neʼe fakatuʼutuʼu ʼi te Lao ʼa te ʼAtua ke fai e he tahi ia he fakamoʼoni moʼo fakatokatoka ʼihi fihifihia. (Eke. 22:10, 11; Num. 5:21, 22) Ko tona tupuʼaga lā ʼaia, ʼe feala ke ʼaoga ki he Kilisitiano ke ina fai he fakamoʼoni mokā palalau iā muʼa ʼo he telepinale. ʼE feala ke hoko he ʼu ʼaluʼaga ʼe ʼaoga ai ki he Kilisitiano ke ina fai he fakamoʼoni ʼe ina fakahoko anai ia he faʼahi, peʼe ʼuhi ke ina fakahā ia te moʼoni ʼo ʼuhiga mo he fihifihia. Neʼe fakahā e Sesu ia te moʼoni ki te Sanetualio ʼa te kau Sutea ʼi te temi ʼaē neʼe fai ai e te pelepitelō lahi ia he fakamoʼoni moʼo uga ia Sesu ke ina tala ia te moʼoni. (Mat. 26:63, 64) Kae neʼe mole ʼaoga kiā Sesu ke ina fai ia he fakamoʼoni moʼo fakahā ia te moʼoni he neʼe palalau tuʼumaʼu pē ia ʼi te moʼoni. Kae neʼe ina ʼui tuʼumaʼu fēnei: “E mooni, e mooni” ke mahino lelei ki ʼihi ʼe feala ke natou tui kiā te ia. (Soa. 1:51; 13:16, 20, 21, 38) ʼI te ʼalatike  ʼaenī, ʼe tou vakaʼi anai ia te faʼifaʼitaki ʼo Sesu, mo Paulo pea mo ʼihi atu neʼe natou mulimuli ki te ʼui ʼaē: “Ko takotou io ke io.”

KĀ ʼIO IA SESU PEA ʼE INA FAKAHOKO

3. Koteā ʼaē neʼe fakapapauʼi e Sesu ʼi tana faikole? Pea neʼe tali feafeaʼi ia tana Tamai ʼaē ʼe ʼi selō ki tana kole?

³ “Nee au ui ai: Koeni, e au hau, (koteuhi nee tohi i te takaiga tohi kia au) o fai, oi Atua, tou finegalo.” (Hep. 10:7) ʼI te faikole ʼaia, neʼe fakapapauʼi e Sesu ʼe ina fai anai ia te finegalo ʼo te ʼAtua. Ko tona fakaʼuhiga, ʼe ina fai anai ia meʼa fuli neʼe fakakikite ʼo ʼuhiga mo te Hako ʼaē neʼe fakapapauʼi, pea mo fakafealagia kiā Satana ke ina “uusi . . . tona mulivae.” (Sen. 3:15) Neʼe mole he tagata ʼi te kele neʼe kua foaki age ki ai he toe maʼua fēia. Neʼe tali e Sehova ia tana kole, pea neʼe ina fakahā ʼe ina tuku kātoa tana falala ki tona ʼAlo, tatau aipē pe neʼe mole ina kole age kiā Sesu ke ina fai age he fakamoʼoni ʼe ina fakahoko anai tona maʼua.—Luka 3:21, 22.

4. Koteā ʼaē neʼe fai e Sesu ke feala hana fakahoko ia meʼa fuli ʼaē neʼe kua ʼio kiai?

⁴ Neʼe fai tuʼumaʼu e Sesu ia meʼa fuli ʼaē neʼe kua ʼio kiai. Pea neʼe mole ina tuku he faʼahi ke ina fakaleluʼi ia ia mai te gāue ʼaē neʼe tuku age e tana Tamai. Neʼe ina haga tala ia te logo lelei ʼo te Puleʼaga ʼo te ʼAtua pea mo fai he ʼu tisipulo mai te ʼu hahaʼi neʼe taki mai e te ʼAtua kiā te ia. (Soa. 6:44) ʼE fakamoʼoni mai ʼi te Tohi-Tapu neʼe fakahoko e Sesu ia tana fakapapau ʼaē ke ina fai ia te finegalo ʼo tana Tamai, heʼe tou lau fēnei ai: “Koteuhi ko te u fakapapau fuli a te Atua e io ia te ia.” (2 Ko. 1:20) Ko Sesu ʼe ko he faʼifaʼitaki lelei ʼo he tahi ʼe ina fakahoko kātoa ia meʼa fuli neʼe kua ina fakapapauʼi ki tana Tamai. Koia ʼi te lakaga leva ʼaenī, ʼe tou talanoa anai ki he tahi neʼe gāue kinakina ke feala hana faʼifaʼitakiʼi ia Sesu.

KĀ ʼIO IA PAULO PEA ʼE INA FAKAHOKO

5. He koʼē ʼe ko he faʼifaʼitaki lelei ia Paulo kiā tātou?

⁵ “Kotea te mea [ke au] fai anai, Aliki?” (Gaue 22:9) Ko te tali ʼaia neʼe fai e Saulo ki te ʼAliki ko Sesu ʼi te temi ʼaē neʼe hā age ai ki ai. Neʼe mole ina loto ke fakatagaʼi e Saulo ia te kau Kilisitiano. Ki muli age, neʼe fakahemala ia Saulo ki ʼana aga ʼo papitema pea mo ina tali ia te gāue makehe ʼaē ko te tala ʼo te logo lelei ʼo ʼuhiga mo Sesu ki te hahaʼi ʼo te ʼu puleʼaga. Talu mai ai, ko Saulo, ʼaē neʼe fakahigoaʼi ki muli age ko Paulo, neʼe ina haga ʼui ko Sesu ko tona “Aliki” pea mo fakalogo ki ai. (Gaue 22:6-16; 2 Ko. 4:5; 2 Tim. 4:8) Ko ʼihi neʼe natou higoaʼi ia Sesu ko tonatou ʼAliki, kae neʼe mole natou fai ia te ʼu meʼa ʼaē neʼe natou ʼio kiai. Neʼe ʼui fēnei e Sesu ʼo ʼuhiga mo nātou: “Kotea e kotou fakahigoa ai au: Aliki, Aliki! Pea e mole kotou fai te mea ae e au palalau ki ai?” (Luka 6:46) ʼE fakaʼamu ia Sesu kiā nātou fuli ʼe natou fakahigoaʼi ia ia “Aliki” ke natou fai ia meʼa fuli ʼaē neʼe kua natou ʼio kiai, ohagē ko tona fai e te ʼapositolo ko Paulo.

6, 7. (1) He koʼē neʼe fakatuatuai e Paulo ia tana ʼaʼahi ia te kōkelekāsio ʼo Kolinito? He koʼē neʼe manatu hala ʼihi ʼi tanatou ʼui ʼaē ʼe mole tuha ia Paulo mo te falala? (2) Koteā te manatu ʼe tonu ke tou maʼu ʼo ʼuhiga mo nātou ʼaē ʼe natou takitaki tātou?

 ⁶ Neʼe fakamafola e Paulo ia te logo ʼo te Puleʼaga ʼaki he faʼafai ʼi Asia Veliveli pea mo te Eulopa. Neʼe ina fakatuʼu te ʼu kōkelekāsio pea mo toe ʼaʼahi nātou. ʼI ʼihi temi, neʼe ʼaoga ke ina fai he fakamoʼoni moʼo fakahā ʼe moʼoni ia te ʼu meʼa ʼaē neʼe ina tohi. (Kal. 1:20) Ki te manatu ʼa ʼihi ʼi te kōkelekāsio ʼo Kolinito, neʼe mole feala ke natou falala kiā Paulo. Kae neʼe loto e Paulo ke natou fakatui ʼe ina fakahā ia te moʼoni, ko te tupuʼaga lā ʼaia ʼo tana ʼui fēnei: “E au fakamooni atu i te Atua, ae e agatonu, ko te folafola nee ma fakaha atu kia koutou nee mole ko te io mo te kailoa.” (2 Ko. 1:18) ʼI tana tohi ia te faʼahi ʼaia, neʼe mavae ia Paulo mai Efeso ʼo fakalaka ʼi Masetonia ʼo ʼalu ki Kolinito. Ki muʼa atu, neʼe ina fakatuʼutuʼu ke toe liliu ki Kolinito ʼi muʼa ʼo tana ʼalu ki Masetonia. (2 Ko. 1:15, 16) Kae ʼi ʼihi temi, ʼe ʼi ai te tupuʼaga ʼe ʼaoga ai ke fetogi ia te ʼu fakatuʼutuʼu. Ohagē lā, ʼe ʼaoga ki te ʼu taupau feʼoloʼaki ke natou fetogi ia te ʼu ʼaho ʼaē ʼe tonu ke natou ʼaʼahi ai te ʼu kōkelekāsio. ʼE mole natou hoʼi fetogi pē ʼanatou fakatuʼutuʼu, ʼuhi heʼe natou loto kiai, kae ʼuhi ʼe ʼi ai tona tupuʼaga tāfito. Neʼe ʼi ai te tupuʼaga tāfito ʼo te fakatuatuai e Paulo ia tana ʼaʼahi ia Kolinito. Ke feala hona fua lelei ki te kōkelekāsio. ʼO feafeaʼi?

⁷ ʼI te temi ʼaē neʼe fakalaka ai ia Paulo ʼi Efeso, neʼe ina logoʼi ʼe tau ia te kōkelekāsio ʼo Kolinito mo te ʼu fihifihia. Neʼe mole kei natou logotahi, pea neʼe natou tali ʼi te kōkelekāsio ia te tehina neʼe ina fakahoko ia te ʼu aga heʼe ʼaoga. (1 Ko. 1:11; 5:1) ʼI tana ʼuluaki tohi ki te kau Kolinito, neʼe foaki e Paulo ia te tokoni maʼuhiga ke feala hanatou fakatokatoka ʼonatou fihifihia. Pea mole ʼui ke ʼalu muʼa ki Kolinito, neʼe fakatuʼutuʼu e Paulo ke ina foaki age he temi kiā nātou ke natou maʼuliʼi tana tokoni ʼi muʼa ʼo tana fakakaku atu. ʼUhi ko te ʼaluʼaga ʼaia, ʼe fakalotomālohi ʼaupitō anai ia tana ʼaʼahi ʼaia. ʼI tana lua tohi, neʼe fakahā ai e Paulo ko te tupuʼaga lā ʼaia ʼo tana fetogi tana fakatuʼutuʼu. Neʼe ina tohi fēnei: “E au too te Atua ko te fakamooni, ke ina matehi au mo ka e au loi, uhi pe ke kotou hao, koia nee au tonu ai e mole au toe liliu atu ki Kolinito.” (2 Ko. 1:23) ʼE mole tonu anai ke tou hagē ko te hahaʼi ʼaē neʼe natou fatufatuʼi ia Paulo. Kae, ʼe tonu ke tou maʼu he fakaʼapaʼapa lahi kiā nātou ʼaē neʼe fakanofo ke natou takitaki tātou. Neʼe fakahoko kātoa e Paulo ia meʼa fuli ʼaē neʼe kua fakapapau kiai. ʼE tonu anai ke tou mulimuli ki te faʼifaʼitaki ʼo Paulo ohagē ko tana mulimuli ki ʼaē ʼo Kilisito.—1 Ko. 11:1; Hep. 13:7.

KĀ ʼIO ʼIHI PEA ʼE NATOU FAKAHOKO

8. He koʼē ʼe ko he faʼifaʼitaki lelei ia Lepeka maʼa tātou?

⁸ “E au alu anai.” (Sen. 24:58) Ko te palalau ʼaia neʼe fai e Lepeka ʼi te temi ʼaē neʼe kole age ai e tana faʼē pea mo tona tokolua peʼe lotolelei ke ʼohoana mo Isaake, te foha ʼo Apalahamo. ʼE tonu anai ke mavae ʼi tona ʼapi ʼi te ʼaho pē ʼaia, pea mo fai folau mo he tahi ʼe mole nā feʼiloʼiʼaki iā kilometa e 800. (Sen. 24:50-58) Neʼe fakahoko e Lepeka ia te faʼahi ʼaē neʼe kua ʼio kiai. Neʼe liliu ko he ʼohoana lelei ʼo Isaake pea neʼe tauhi agatonu ki te ʼAtua. Ko tona fakaʼuhiga, talu mai ai, neʼe maʼuli ʼi te ʼu falelā ohagē ko he kau matāpule ʼi te Kele ʼo Te Fakapapau. Neʼe tapuakinaʼi ia ia e te ʼAtua ʼuhi ko tana fakahoko ia te faʼahi ʼaē neʼe kua fakatuʼutuʼu kiai. Neʼe hifo mai ia Sesu Kilisito, te Hako ʼaē neʼe fakapapauʼi, mai tona hōloga.—Hep. 11:9, 13.

9. Neʼe mulimuli feafeaʼi ia Lute ki tana palalau?

⁹ “Kailoa, e ma olo mo koe ki tau hahai.” (Lute 1:10) Ko te ʼu palalau ʼaia neʼe fai liuliuga e te ʼu fafine vītua Moapite ko Lute mo Olipa ki te faʼē ʼo ʼonā ʼohoana, ia Naomi. Neʼe ko he fafine vītua neʼe liliu mai te fenua ko Moape ki Petelehemi. Neʼe kole age e Naomi kiā nāua ke nā liliu ki ʼonā ʼapi, pea neʼe liliu ia Olipa, kae neʼe mulimuli ia Lute ki tana palalau. (Lau ia Lute 1:16, 17.) Neʼe nofo agatonu kiā Naomi pea neʼe nofo mo ia, tatau aipē peʼe ina ʼiloʼi ʼe mole toe fesioʼaki anai mo tona fāmili pea mo mavae mai te lotu hala ʼo te fenua ko Moape. Talu mai ai, neʼe tauhi kiā Sehova ʼo kaku ki tona mate, pea neʼe ina maʼu te tapuakina ʼa Sehova. Neʼe kau ki te ʼu higoa e nima ʼo te  ʼu fafine ʼaē neʼe talanoa kiai ia Mateo, ʼe kau ki te hōloga ʼaē ʼe hifo mai ai ia Kilisito.—Mat. 1:1, 3, 5, 6, 16.

10. He koʼē ʼe ko he faʼifaʼitaki lelei ia Esaia maʼa tātou?

¹⁰ “Koeni au, ke ke fekau au.” (Esa. 6:8) ʼI muʼa ʼo tana fai ia te ʼu palalau ʼaia, neʼe sio ia Esaia ʼi he moemisi kiā Sehova ʼe heka ʼi Tona hekaʼaga fakahau ʼi te fale tapu ʼo Iselaele. ʼI te meʼa ʼaia neʼe hā, neʼe logo ia Esaia ki te ʼui ʼa Sehova: “Ko ai ka au fekaui anai, pea ko ai ka haele anai kia matou?” Neʼe kole e Sehova ke ʼalu he tahi ʼo ʼave ia Tana logo ki Tana hahaʼi talagataʼa. Neʼe tali fēnei e Esaia: “Koeni au, ke ke fekau au,” neʼe hagē pē neʼe ina ʼui fēnei: “ ʼEī, ʼe au ʼalu anai pea ʼe au fakahoko anai ia te gāue ʼaē neʼe ke foaki mai.” Neʼe fakahoko e Esaia ia te meʼa ʼaē neʼe kua ʼio kiai. Lolotoga taʼu e 46, neʼe ina fakakikite ʼe tauteaʼi anai e te ʼAtua ia Tana hahaʼi talagataʼa pea ki muli age ʼe ina toe ʼaumai anai nātou ki te koga meʼa ʼaē ʼe Ina loto ke natou fakahoko ai tanatou tauhi kiā te Ia.

11. (1) He koʼē ʼe maʼuhiga ke tou fakahoko ia te ʼu meʼa ʼaē neʼe kua tou ʼio kiai? (2) Ko te ʼu faʼifaʼitaki ʼo ʼai ʼaē neʼe mole natou fakahoko ia te ʼu meʼa ʼaē neʼe kua natou ʼio kiai?

¹¹ He koʼē neʼe loto e Sehova ke maʼu ia te ʼu faʼifaʼitaki ʼaia ʼi te Tohi-Tapu? Pea he koʼē ʼe maʼuhiga ke tou fakahoko ia te ʼu meʼa ʼaē neʼe kua tou ʼio kiai? ʼE fakahā lelei mai ʼi te Tohi-Tapu ko he tahi ʼe “hala taofi fakapapau,” peʼe ko he tahi ʼe mole ina fakahoko ia te meʼa ʼaē neʼe kua fakapapau kiai, ʼe tuha ia mo te mate. (Loma 1:31, 32) Neʼe mole fakahoko e te Falaone ʼo Esipito, mo te Hau ʼo Suta ko Setesiasi pea mo Ananiasi pea mo Safila ia te ʼu meʼa ʼaē neʼe kua natou ʼio kiai, pea ʼuhi ko te faʼahi ʼaia, neʼe natou tau mo te ʼu mamahi. Ko te ʼu faʼifaʼitaki ʼaia ʼe ko he ʼu fakatokaga kiā tātou.—Eke. 9:27, 28, 34, 35; Esk. 17:13-15, 19, 20; Gaue 5:1-10.

12. Koteā ʼaē kā tokoni mai anai ke tou fakahoko ia te ʼu meʼa ʼaē neʼe kua tou ʼio kiai?

¹² Koteʼuhi ʼaē ʼe tou māʼuʼuli nei “i te u aho fakamuli,” ʼe tou māʼuʼuli fakatahi mo he ʼu hahaʼi “hee lotu,” he ʼu hahaʼi “e natou taupau te ulugaaga a te lotu, kae e natou fakafisi ki te mea ae e ina fakatupu tona malohi.” (2 Tim. 3:1-5) Koia, ʼe tonu ke tou faiga ke ʼaua naʼa tou fakatahi mo he ʼu hahaʼi ʼe aga fēia. Kae, ʼe tonu anai ke tou fakatahi tuʼumaʼu mo nātou ʼaē ʼe natou fai ia te ʼu meʼa ʼaē neʼe kua natou ʼio kiai.—Hep. 10:24, 25.

KO TAKOTOU ʼIO ʼAĒ ʼE MAʼUHIGA TĀFITO

13. Koteā ia te fakapapau maʼuhiga tāfito ʼaē ʼe ʼio kiai he tisipulo ʼa Sesu Kilisito?

¹³ Ko te fakapapau ʼaē ʼe maʼuhiga tāfito maʼa he tahi ʼe ko te foaki ʼo tona maʼuli ki te ʼAtua. Ko nātou ʼaē ʼe fia liliu ko he ʼu tisipulo ʼa Sesu, ʼe kole tuʼa tolu age kiā nātou peʼe kua natou fia fakahoko ʼonatou maʼua. (Mat. 16:24) Kā fakafehuʼi e he ʼu tagata ʼāfea e toko lua ia he tahi ʼe fia kaugā fagona ʼe nā fehuʼi age fēnei: “ ʼE ke fia liliu moʼoni koa ko he Fakamoʼoni ʼa Sehova?” Ki muli age, ʼi tana tuputupu ʼi te faʼahi fakalaumālie, pea mo fia papitema, ʼe fehuʼi age e te ʼu tagata ʼāfea: “Neʼe kua ke momoli koa ia tou maʼuli kiā Sehova ʼi te faikole?” Pea ʼi te ʼaho ʼo te papitema, ʼe fai e te tehina faiakonaki ia te fehuʼi ʼaenī kiā nātou ʼaē kā  ʼamanaki papitema: “ ʼO fakatafito ki te sākilifisio ʼo Sesu Kilisito, kua kotou fakahemala koa ki ʼakotou agahala pea mo momoli tokotou maʼuli kiā Sehova moʼo fai ʼo tona finegalo?” Iā muʼa ʼo te nofoʼaki, ʼe natou ʼio fuli pea mo natou fakapapau ʼe natou tauhi anai ki te ʼAtua ʼo talu ai.

14. Koteā te ʼu fehuʼi ʼe tonu ke tou tahi fai?

¹⁴ Tatau aipē pe neʼe hoki kotou papitema pē peʼe kua fualoa hakotou tauhi ki te ʼAtua, ʼe ʼaoga ke kotou tahi fai ia te ʼu fehuʼi ʼaenī: “ ʼE au faʼifaʼitakiʼi koa ia Sesu ʼo au fakahoko ia te ʼu meʼa ʼaē neʼe kua au ʼio kiai pea mo fakahoko ia taku fakapapau kiā Sehova? ʼE kei au fakamaʼuhigaʼi koa ia te fai fakamafola pea mo te fai ʼo ni tisipulo ʼi toku maʼuli, ohagē ko tona kole mai e Sesu?”—Lau ia 2 Kolinito 13:5.

15. Ko te ʼu ʼaluʼaga fea ʼe maʼuhiga ai ke tou fakahoko ia te meʼa ʼaē neʼe kua tou ʼio kiai?

¹⁵ Moʼo fakahoko ia te fakapapau ʼaē neʼe tou fai ki te ʼAtua, ʼe toe ʼaoga foki ke tou aga fakahagatonu ʼi ʼihi atu ʼaluʼaga maʼuhiga. Ohagē lā: Kapau kua kotou ʼohoana, ʼe tonu anai ke kotou mulimuli ki takotou fakapapau makehe ʼaē neʼe kotou fai ke kotou ʼofa ki tokotou hoa. Kapau neʼe kotou fakamoʼoni he kotala, pe neʼe kotou tohi tokotou higoa ki he gāue pē maʼa te kautahi, ʼe tonu anai ke kotou fakahoko ia te meʼa ʼaē neʼe kua kotou fakapapau kiai. Kapau neʼe fakaafe koutou e he tahi ʼe masiva, pea toe fakaafe koutou e he tahi age, ʼe tonu anai ke kotou ʼolo ki te fakaafe ʼaē neʼe kua kotou ʼuluaki ʼio kiai. Kapau ʼe kotou fakapapau ki he tahi ʼi te telituale ʼe kotou toe liliu age anai ʼo toe ʼaʼahi, ʼe tonu ke kotou fakahoko ia te meʼa ʼaē neʼe kua kotou ʼio kiai. ʼE tapuakina anai e Sehova ia takotou minisitelio.—Lau ia Luka 16:10.

ʼE TOKONI MAI ANAI IA SESU, TOTATOU PELEPITELŌ LAHI PEA MO HAU

16. Koteā ʼaē ʼe tonu ke tou fai mo kapau neʼe mole tou fakahoko he fakapapau?

¹⁶ ʼE fakahā mai ʼi te Tohi-Tapu ʼi totatou ʼuhiga heʼe haohaoa, “e tou tukia fuli i te u mea kehekehe,” peʼe tou faihala tuʼumaʼu, tāfito lā ʼi te palalau. (Sakp. 3:2) Koteā ʼaē ʼe tonu ke tou fai mo kapau ʼe tou tokagaʼi ʼe mole tou fakahoko tatatou fakapapau? ʼI te Lao ʼaē neʼe foaki e te ʼAtua ki te kau Iselaele, ko he tahi ʼe mole ina fakakaukauʼi ʼana palalau, ʼe feala ke fakamolemole tana aga. (Lev. 5:4-7, 11) ʼE toe feala ke fakamolemole ia Sehova ki te kau Kilisitiano mo kapau ʼe mole natou fai ia te meʼa ʼaē neʼe kua natou fakapapau kiai. Kapau ʼe tou fakahā kiā Sehova neʼe mole tou fakahoko he fakapapau, ʼe fakamolemole anai kiā tātou. ʼE tokoni mai anai ia Sesu, totatou Pelepitelō Lahi ke tou toe maʼu ia te ʼofa ʼo te ʼAtua. (1 Soa. 2:1, 2) Kae ke feala hatatou nonofo ʼi te ʼofa ʼo te ʼAtua, ʼe tonu ke tou fakahā ʼe tou fakahemala moʼoni. Ohagē lā, ʼe mole tonu anai ke liliu tatatou mole fakahoko ʼatatou fakapapau ko he agamāhani. ʼE tonu anai ke tou fai ia meʼa fuli moʼo fakatokatoka ia te ʼu fihifihia ʼe tupu ʼuhi ko tatatou mole fakahoko tatatou fakapapau. (Taag. 6:2, 3) ʼE mahino ia, ʼe lelei ke tou fakakaukauʼi lelei ʼi muʼa ʼo hatatou fai he fakapapau ʼe lagi mole feala anai ke tou fakahoko.—Lau ia Ekelesiasi 5:2.

17, 18. Koteā ia te kā haʼu taulekaleka maʼa nātou ʼaē ʼe natou faiga mālohi ke natou fakahoko ia te meʼa ʼaē neʼe kua natou ʼio kiai?

¹⁷ ʼE foaki ia he kā haʼu taulekaleka ki te kau ʼatolasio ʼa Sehova ʼaē ʼe natou faiga mālohi ke natou fakahoko ia te meʼa ʼaē neʼe kua natou ʼio kiai. ʼE maʼuli tuputupua anai ia te toko 144 000 kau Kilisitiano fakanofo ʼi te lagi, pea ʼe natou kaugā hau anai mo Sesu iā taʼu e afe. (Apk. 20:6) ʼE māʼuʼuli anai ia te toko lauʼi miliona hahaʼi ʼi te Palatiso fakakelekele. Lolotoga te ʼafio ʼa Kilisito ʼi tona ʼuhiga Hau ʼi te Puleʼaga ʼo te ʼAtua, ʼe natou liliu anai ʼo haohaoa ʼi te faʼahi ʼo te sino mo te fakakaukau.—Apk. 21:3-5.

¹⁸ ʼI te fakaʼosi ʼo te ʼafio ʼa Sesu, ʼe fakahoko anai ia te ʼahiʼahi fakaʼosi. Ko nātou pē anai ʼaē kā nonofo agatonu ʼi te ʼahiʼahi ʼaia, ʼe feala anai ke natou nonofo ʼi te Palatiso. ʼE natou haga falala anai ki te ʼu palalau ʼa ʼihi. (Apk. 20:7-10) Ko nātou fuli kā māʼuʼuli anai, ʼe natou fakahoko ia meʼa fuli ʼaē neʼe kua natou ʼio peʼe kua natou kailoa kiai. ʼE feala anai ke natou faʼifaʼitaki lelei tatatou Tamai ʼaē ʼe ʼi selō, ia Sehova, te “Atua o te mooni.”—Pes. 31:6.

[ʼU fehuʼi ʼo te ako]

[Paki ʼo te pasina 29]

Talu mai tona papitema ʼo kaku ki tona mate, neʼe fakahoko moʼoni e Sesu ia te meʼa ʼaē neʼe ina fakapapauʼi

[Paki ʼo te pasina 31]

ʼE kotou haga fakahoko koa ia te fakapapau maʼuhiga ʼaē neʼe kotou ʼio kiai?