Ko Te Faʼahiga Manatu Fea ʼAē ʼe Kotou Fakahā?

“Ko te kalasia o totatou Aliki ko Sesu-Kilisito ke nofo i tou loto!”—FILM. 25.

ʼE FEALA KOA HAKOTOU TALI?

He koʼē ʼe tou fia fakakaukauʼi te faʼahiga manatu ʼaē ʼe tou fakahā?

Ko te ʼu faʼahiga manatu fea ʼaē ʼe tou fia tekeʼi? ʼE feafeaʼi hatatou lava fai te faʼahi ʼaia?

Koteā ʼaē ʼe tou lava fai moʼo fakahā he faʼahiga manatu ʼe lelei ʼi te kōkelekāsio?

1. ʼI te faitohi ʼa te ʼapositolo ko Paulo ki te ʼu kōkelekāsio, koteā ʼaē neʼe ina ʼui tuʼa lahi ai?

 ʼI TE faitohi ʼa te ʼapositolo ko Paulo ki te kau Kilisitiano ʼo tona temi, neʼe ina ʼui tuʼa lahi ai neʼe fakaʼamu ʼe leleiʼia e te ʼAtua mo Kilisito te faʼahiga manatu ʼaē neʼe fakahā ʼi te ʼu kōkelekāsio. Ohagē lā neʼe faitohi fēnei ki te kau Kalate: “U tehina, ke nofo te kalasia o totatou Aliki ko Sesu-Kilisito i okotou laumalie [peʼe ʼi ʼokotou loto]! Ameni!” (Kal. 6:18) Ko te faʼahiga manatu fea ʼaē neʼe fakalotomālohiʼi ai e Paulo ke maʼu e te kau Kilisitiano?

2, 3. (1) Ko te faʼahiga manatu fea ʼaē neʼe fakalotomālohiʼi ai e Paulo ke maʼu e te kau Kilisitiano? (2) Ko te ʼu fehuʼi fea ʼaē ʼe feala ke tou fai ʼo ʼuhiga mo tatatou faʼahiga manatu?

² Ko tatatou faʼahiga manatu ʼe ina uga tātou ke tou palalau peʼe ke tou fai he ʼu meʼa ʼi hona faʼahiga ʼaluʼaga. ʼE feala ke agamalū he tahi, mo loto tokaga, mo agalelei, mo loto foaki, peʼe loto fakamolemole ʼuhi ko tana faʼahiga manatu. ʼE ʼui ʼi te Tohi-Tapu ʼe lelei ke tou maʼu “he loto agamalu mo tokalelei,” ko tona fakaʼuhiga ke tou lolomi ʼatatou manatu. (1 Pet. 3:4) Pea lagi ko he tahi age ʼe ina fai he ʼu palalau ʼe fakalotomamahi peʼe ina fakamaʼuhiga fau te paʼaga heʼe ko tana faʼahiga manatu ʼaia. ʼE lagi hoko ʼita peʼe mole ina leleiʼia ke ʼui age e he tahi te meʼa ʼaē ʼe tonu ke ina fai. Pea ko ʼihi ʼuhi ko ʼanatou faʼahiga manatu, ʼe natou maʼu he ʼu fakakaukau heʼeʼaoga peʼe natou agatuʼu ki te ʼAtua.

³ Koia neʼe fakalotomālohiʼi ai e Paulo ʼona tehina ke natou faʼifaʼitakiʼi ia Kilisito pea mo natou maʼu te manatu ʼaē ʼe leleiʼia e te ʼAtua. (2 Tim. 4:22; lau ia Kolose 3:9-12.) Iā ʼaho nei, ʼe lelei ke tou fai te ʼu fehuʼi ʼaenī: “Ko te faʼahiga manatu fea ʼaē ʼe au fakahā? ʼE au lava hikihiki feafeaʼi taku faʼahiga manatu ke leleiʼia e te ʼAtua? ʼE feafeaʼi haku lava fakalotomālohi ʼihi ʼi te kōkelekāsio ke natou maʼu he faʼahiga manatu ʼe leleiʼia e te ʼAtua?” Ohagē lā, ʼe matalelei he ʼulu siale mokā fua ʼuhi ko te lanu hina ʼo te ʼu matalaʼi siale. ʼE kotou hagē koa ko te ʼu matalaʼi siale ʼaia? ʼE kotou tokoni koa ke matalelei  te kōkelekāsio kātoa? ʼE mahino ia ʼe tonu anai ke tou faiga ʼo fai te faʼahi ʼaia. Tou vakaʼi ʼi te temi nei pe feafeaʼi hatatou fakahā te faʼahiga manatu ʼaē ʼe leleiʼia e te ʼAtua.

TEKEʼI IA “TE LAUMALIE O TE MALAMANEI”

4. Koteā koa ia “te laumalie o te malamanei”?

⁴ ʼE ʼui fēnei mai ʼi te Tohi-Tapu: “Nee mole tou tali te laumalie o te malamanei, kae ko te Laumalie ae e hau mai te Atua.” (1 Ko. 2:12) Koteā koa ia “te laumalie o te malamanei”? ʼE tatau te laumālie ʼaia mo ʼaē ʼe talanoa kiai ia Efeso 2:2, ʼaē ʼe ʼui fēnei ai: “Nee kotou haele ai i mua, o mulimuli ki te teka o te malamanei, o mulimuli ki te aliki o te malohi o te aele, o te laumalie ae e gaue nei i te u foha o te logogataa.” Ko “te aele” ʼaia, peʼe ko “te laumalie o te malamanei,” ʼe fakaʼuhiga ki te faʼahiga manatu ʼa te hahaʼi ʼi te mālamanei. ʼE hagē te faʼahiga manatu ʼaia ko te ʼaele ʼaē ʼe ina ʼātakai tātou. Ohagē lā, tokolahi iā ʼaho nei ʼe natou maʼu te ʼu taʼi manatu ʼaenī: “ ʼE mole leva fakatotonu mai e he tahi te meʼa ʼaē ʼe tonu kau fai!” peʼe, “Faiga mālohi ke ke maʼu te ʼu meʼa ʼaē ʼe ke loto kiai!” ʼE ko nātou ʼaia ko “te u foha o te logogataa” ʼo te mālama ʼa Satana.

5. Ko te faʼahiga manatu kovi fea ʼaē neʼe fakahā e ʼihi ʼi Iselaele?

⁵ Talu mai fualoa te maʼu e te hahaʼi te ʼu faʼahiga manatu ʼaia. ʼI te temi ʼo Moisese, neʼe agatuʼu ia Kole kiā nātou ʼaē neʼe pule ʼi Iselaele. Neʼe ina fai he ʼu palalau ʼe fakafeagai tāfito kiā Alone pea mo ʼona foha, ʼaē neʼe ko he ʼu pelepitelō. Neʼe lagi tokagaʼi e Kole ʼanatou hala. Pe neʼe lagi manatu ia neʼe foaki e Moisese kiā nātou he ʼu pilivilēsio makehe, ʼuhi he neʼe natou kāiga. Koteā pē he manatu neʼe feala ke maʼu e Kole, kae ʼe hā lelei mai neʼe mole kei ina maʼu te faʼahiga manatu ʼaē ʼa Sehova. Neʼe mole fakaʼapaʼapa ia Kole ki te ʼu tagata ʼaē neʼe filifili e Sehova ʼi tana palalau fēnei age: “Kua lahi osi takolua fia pule kia matou.” Pea neʼe ina fehuʼi fēnei age leva: “Kotea e kolua malaga ai i oluga o te fakatahi?” (Num. 16:3) ʼO toe fēia mo Tatane mo Apilame, neʼe nā muhumuhu ʼo ʼuhiga mo Moisese pea mo ʼui age ki ai neʼe ina faiga ke ina puleʼi nātou. ʼI te fekauʼi ʼaē e Moisese ke kumi ake nāua, neʼe nā tali fēnei: “E mole ma hake atu anai!” (Num. 16:12-14) Neʼe fakahā lelei e Sehova tana mole leleiʼia tanatou faʼahiga manatu ʼaia, ʼaki tana fakaʼauha te kau agatuʼu fuli.—Num. 16:28-35.

6. Neʼe fakahā feafeaʼi e ʼihi tagata ʼi te kau ʼuluaki Kilisitiano he faʼahiga manatu kovi? Koteā ʼaē neʼe lagi natou manatu kiai?

⁶ Ko ʼihi tagata ʼi te kau ʼuluaki Kilisitiano, neʼe natou toe valokiʼi nātou ʼaē neʼe foaki age ki ai e te ʼAtua te takitaki ʼi te kōkelekāsio. (Suta 8) Neʼe lagi manatu e te ʼu tagata ʼaia ʼe tonu ke foaki age kiā nātou he tahi age ʼu pilivilēsio. Pea neʼe natou fakaneke ʼihi ke mole natou fakaʼapaʼapa kiā nātou neʼe hinoʼi e te ʼAtua ke takitaki pea mo gāue kinakina ʼi te kōkelekāsio.—Lau ia 3 Soane 9, 10.

7. Ko te faʼahiga manatu fea ʼaē ʼe tonu ke tou tōkakaga kiai?

⁷ Ko te faʼahiga manatu ʼaia ʼe mole tonu ke maʼu ʼi te kōkelekāsio, koia ʼaē ʼe tonu ai ke tou tōkakaga naʼa tou kamata manatu fēia. ʼE mole haohaoa te kau tagata ʼāfea, ohagē pē ko te kau matuʼatuʼa ʼo te temi ʼo Moisese pea mo te ʼapositolo ko Soane. ʼE feala pē ke fai e te kau tagata ʼāfea ni hala ʼe malave kovi kiā kita. Kapau ʼe hoko te faʼahi ʼaia ki he tahi pē iā tātou, pea ʼe mole tonu ke tou maʼu te faʼahiga manatu ʼo te hahaʼi ʼo te mālamanei pea mo ʼui fēnei: “ ʼE maʼua ke fakatonutonuʼi te faʼahi ʼaia neʼe ina fai mai kiā au!” peʼe “ ʼE tonu ke fai he puleʼaki ki te tehina ʼaenā!” ʼE tonu ke tou manatuʼi ko Sehova ʼe feala pē ke mole ina tokagaʼi ʼihi kiʼi hala ʼe feala ke fai e te kau tagata ʼāfea. ʼE feala koa hatatou fai fēia? Ko ʼihi, mokā natou agahala mamafa, ʼe mole natou fia ʼolo ki te kau tagata ʼāfea ʼaē neʼe hinoʼi ke tokoni age ʼuhi ko tanatou mole leleiʼia he ʼu faʼahi ʼo ʼuhiga mo te kau tagata ʼāfea ʼaia. ʼE natou hagē ko he tahi ʼe mahaki ʼe mole ina loto ke faitoʼo ia ia, ʼuhi ko tana mole leleiʼia he faʼahi ʼo ʼuhiga mo te tōketā.

8. Koteā te ʼu vaega ʼaē ʼe feala ke tokoni mai ke tou maʼu te manatu ʼe lelei ʼo ʼuhiga mo te kau tagata ʼāfea ʼi te kōkelekāsio?

⁸ ʼE feala hatatou tekeʼi te faʼahiga manatu ʼaia  mo kapau ʼe tou manatuʼi ko Sesu ʼe ina “too i tona nima matau ni fetuu e fitu.” Ko te ʼu “fetuu” ʼe fakaʼuhiga ki te kau tagata ʼāfea fakanofo, kae ko te faʼahi ʼaē ʼe ʼui ʼo ʼuhiga mo nātou ʼe feala ke toe fakaʼuhiga ki te kau tagata ʼāfea fuli ʼi te ʼu kōkelekāsio. ʼE feala kiā Sesu ke ina fai te meʼa ʼe ina loto kiai mo te ʼu “fetuu” ʼaē ʼi tona nima. (Apk. 1:16, 20) ʼI tona ʼuhiga Pule ʼo te kōkelekāsio, ko Sesu ʼe ina ʼiloʼi lelei pe koteā ʼaē ʼe hoko ʼi te lotolotoiga ʼo te kau tagata ʼāfea. ʼE hagē “ona mata . . . ko he ulo o he afi,” pea ʼe sio ia kiā meʼa fuli. Koia, kapau ʼe ʼaoga ki he tagata ʼāfea he fakatonutonu, pea ʼe tokaga anai ia Sesu ke fakatonutonuʼi ia ia ʼi tona temi totonu pea mo fakahoko lelei te faʼahi ʼaia. (Apk. 1:14) ʼO kaku ki te fakahoko e Sesu te faʼahi ʼaia, ʼe tonu ke tou fakaʼapaʼapa ki te kau tagata ʼāfea, ʼaē ʼi te “nima matau” ʼo Sesu. Neʼe tohi fēnei ia Paulo: “Kotou fakalogo ki okotou takitaki, pea koutou fakaapaapa kia natou, koteuhi e natou leoleo ki okotou laumalie ae e fakamaaui ai anai natou i he aho; koutou fai fena uhi ke natou fai tanatou gaue i te fiafia, kae mole i te lauga, he mole hona fua lelei anai kia koutou.”—Hep. 13:17.

9. (1) Ko te faʼahiga manatu fea ʼe feala ke fakahā e he Kilisitiano mokā fakatonutonuʼi? (2) Mokā fakatonutonuʼi tātou, koteā te meʼa ʼaē ʼe lelei age ke tou fai?

⁹ Mokā fakatonutonuʼi he tahi e te kau tagata ʼāfea peʼe natou toʼo ʼona pilivilēsio, ʼe feala ia ke ina fakahā peʼe lelei peʼe kovi tana faʼahiga manatu. Ko he tehina kei tūpulaga neʼe tokoniʼi ʼaki he agalelei e te kau tagata ʼāfea he neʼe ina fakaʼaogaʼi te ʼu gaoʼi viteo agamālohi. Kae meʼa fakaʼofaʼofa foki he neʼe mole ina tali te tokoni, pea ʼuhi ko tana mole mulimuli ki te ʼu fakamaʼua Fakatohi-tapu ʼo ʼuhiga mo te ʼu tagata faifekau fakaminisitelio, koia neʼe toʼo ai ʼona pilivilēsio. (Pes. 11:5; 1 Tim. 3:8-10) ʼOsi ʼaia, neʼe ina kamata  tala leva ki ʼihi tana mole leleiʼia ia te tonu ʼa te kau tagata ʼāfea. Neʼe ina toe fai foki ni tohi ki te filiale pea mo lau he ʼu meʼa ʼe kovi ʼo ʼuhiga mo te kau tagata ʼāfea. Neʼe ina toe fakaneke ʼihi ʼi te kōkelekāsio ke natou faitohi mo nātou ki te filiale. Kae ʼi tona fakahagatonu, kapau ʼe tou kumi takuʼaki ki ʼatatou aga ʼaē ʼe kovi, pea ʼe fakatupu tuʼutāmaki anai ki te kōkelekāsio kātoa pea ʼe mole tokoni ia ki he tahi. Mokā fakatonutonuʼi tātou, pea ʼe lelei age hatatou fakakaukau ʼe ko he faigamālie ʼaia ke tou ʼiloʼi ai ʼotatou vaivaiʼaga pea mo tali fakalelei te fakatonutonu.—Lau ia Tagi laulau 3:28, 29.

10. (1) Koteā ʼaē ʼe akoʼi mai iā Sakopo 3:16-18 ʼo ʼuhiga mo te faʼahiga manatu ʼaē ʼe lelei pea mo ʼaē ʼe kovi? (2) Mokā tou mulimuli ki te poto ʼaē ʼe foaki mai e te ʼAtua, pea koteā tona fua?

¹⁰ ʼE akoʼi mai iā Sakopo 3:16-18 pe koteā te faʼahiga manatu ʼaē ʼe lelei pea mo ʼaē ʼe kovi ʼe fakahā e he tahi ʼi te kōkelekāsio. ʼE ʼui fēnei ai: “Ko te kogamea ae e i ai he holi kona mo he loto fekeaki, e mau ai te maveuveu pea mo te u gaue kovi kehekehe fuli. Ko te poto mai oluga, e fuafuaki maa ia; pea lua e tokalelei ia, mo agamalu, mo loto lelei, mo fonu i te manavaofa pea mo te u fua lelei, mo maa mai te fakapalatahi pea mo te malualoi. Koteuhi e nunusi te fua o te faitotonu i te tokalelei e natou ae e natou kumi te tokalelei.” Kapau ʼe tou mulimuli ki te poto ʼaē ʼe foaki mai e te ʼAtua, pea ʼe tou faʼifaʼitakiʼi anai tona tokalelei, mo tana agamalū, pea mo tona manavaʼofa. ʼI tatatou fai fēia, ʼe tou fefakalotomālohiʼaki ke tou fakahā te faʼahiga manatu ʼe lelei, pea ʼe maʼu anai te tokalelei ʼi te kōkelekāsio.

FAKAHĀ HE FAʼAHIGA MANATU ʼE FAKAʼAPAʼAPA ʼI TE KŌKELEKĀSIO

11. (1) Kapau ʼe tou maʼu he faʼahiga manatu ʼe lelei, pea koteā ʼaē ʼe mole tou fai anai? (2) Koteā te ako ʼe tou tāʼofi mai te faʼifaʼitaki ʼo Tavite?

¹¹ ʼE tonu ke tou manatuʼi ʼe ko Sehova ʼaē ʼe ina loto ke “fafaga te [“kōkelekāsio,” MN] o te Atua” e te kau tagata ʼāfea. (Gaue 20:28; 1 Pet. 5:2) ʼE tonu ke tou fakaʼapaʼapa ki te ʼu fakatuʼutuʼu ʼaē ʼe fai e Sehova, peʼe tou tagata ʼāfea peʼe kailoa. Kapau ʼe tou maʼu he faʼahiga manatu ʼe lelei, pea ʼe mole tou fakamaʼuhigaʼi fau anai te maʼu ʼo he tuʼulaga peʼe ko he ʼu pilivilēsio. ʼI te temi ʼaē neʼe tuʼania ai Saulo, te Hau ʼo Iselaele, naʼa toʼo tona tuʼulaga hau e Tavite, “nee sio kovi leva ia Saulo kia Tavite mai te aho aena o hoholo mai ai.” (1 Sam. 18:9) Neʼe maʼu e te hau he faʼahiga manatu ʼe kovi pea neʼe ina loto foki ke ina matehi ia Tavite. ʼE mole tou hagē anai ko Saulo pea mo tou tuʼania fau ʼo ʼuhiga mo te tuʼulaga pule, kae ʼe lelei age hatatou hagē ko Tavite. Heʼe logolā neʼe mamahi ia Tavite ʼuhi ko ni aga heʼe faitotonu neʼe fai age ki ai, kae neʼe fakaʼapaʼapa tuʼumaʼu pē ia kiā nātou ʼaē neʼe foaki age ki ai e te ʼAtua te takitaki.—Lau ia 1 Samuele 26:23.

12. Koteā ʼaē ʼe tou lava fai moʼo tokoni ki te taupau ʼo te logotahi ʼi te kōkelekāsio?

¹² Mai tona ʼaluʼaga ʼaē ʼe kehekehe ʼatatou manatu, ʼi ʼihi temi ʼe feala ai ke tou feʼitaʼaki. ʼE feala foki ke hoko te faʼahi ʼaia ʼi te lotolotoiga ʼo te kau tagata ʼāfea. ʼE fakahā mai ʼi te tokoni Fakatohi-tapu ʼaenī te faʼahiga manatu ʼaē ʼe tonu ke tou maʼu: “Ke kotou tokaga ki te fakaapaapa i okotou vahaa” pea “Ke aua naa kotou fia poto.” (Loma 12:10, 16) Ko tona fakaʼuhiga ke ʼaua naʼa tou ʼui ʼe tonu pē tatatou manatu, kae ʼe tonu ke tou fakamoʼoni ʼi te agamāhani ʼe feala mo ʼihi ake ke lelei ʼanatou manatu. Kapau ʼe tou faiga lahi ke tou mahino ki te faʼahiga manatu ʼa ʼihi, pea ʼe feala hatatou tokoni ki te taupau ʼo te logotahi ʼi te kōkelekāsio.—Filp. 4:5.

13. Koteā ʼaē ʼe tonu ke tou fai ʼi te hili ʼo hatatou fakahā he manatu ki te kau tagata ʼāfea? Koteā te faʼifaʼitaki Fakatohi-tapu ʼe ina fakahā mai te meʼa ʼaē ʼe tonu ke tou fai?

¹³ Ko tona fakaʼuhiga koa ʼe mole lelei hatatou fakahā he manatu ki te kau tagata ʼāfea, mo kapau kiā tātou ʼe ʼaoga ke fakatonutonuʼi he faʼahi ʼi te kōkelekāsio? Kailoa ia. ʼI te temi ʼo te kau ʼapositolo, neʼe ʼi ai te faʼahi ʼi te kōkelekāsio neʼe mole manatu tahi kiai te tokolahi. “Nee fakatotonu leva e te u tehina ke hake ia Paulo mo Palenapa, mo ni ihi o natou, ki Selusalemi ki te kau apositolo mo te kau matuatua, o uhiga mo te mea aia.” (Gaue 15:2) ʼE mahino ia, neʼe tahi maʼu e  te ʼu tehina ʼaia he manatu ʼo ʼuhiga mo te meʼa ʼaē neʼe tonu ke fai. Kae, ʼi te hili leva ʼo tanatou tahi fakahā tana manatu pea mo fai he tonu ʼaki te tokoni ʼa te laumālie māʼoniʼoni, neʼe mole kei hoko atu tanatou palalau ki ʼanatou manatu. ʼI te ʼosi maʼu ʼaē e te ʼu kōkelekāsio ia te tohi ʼaē neʼe tuʼu ai te tonu, “nee fiafia leva te u tehina ki te u palalau fakalotomalohi” ʼaia pea mo natou “asilisili malohi . . . i te tui.” (Gaue 15:31; 16:4, 5) ʼO toe fēia iā ʼaho nei, mokā tou ʼosi palalau ki te kau tagata ʼāfea ki he faʼahi ʼe tou tuʼania kiai, pea ʼe tonu ke tou falala ʼe natou fakakaukauʼi fakalelei anai te faʼahi ʼaia pea mo vakaʼi pe ʼi ai anai he meʼa ʼe tonu ke fai.

FAKAHĀ HE FAʼAHIGA MANATU ʼE LELEI ʼI ʼAKOTOU FELŌGOI MO ʼIHI

14. ʼE tou lava fakahā feafeaʼi he faʼahiga manatu ʼe lelei ʼi ʼatatou felōgoi mo ʼihi?

¹⁴ ʼI ʼatatou felōgoi ʼaē mo ʼihi, ʼe lahi te ʼu faigamālie ke tou fakahā ai he faʼahiga manatu ʼe lelei. Ohagē lā, ʼe lahi te lelei ʼaē ʼe feala ke tou fai takitokotahi mo kapau ʼe tou foimo fakamolemole kiā nātou ʼaē ʼe natou fakalotomamahiʼi tātou. ʼE ʼui fēnei mai ʼi te Folafola ʼa te ʼAtua: “Ke kotou fekatakiaki i okotou vahaa, pea kapau e mamahi he tahi ki he tahi i he mea, ke kotou fefakamolemoleaki. Ke kotou fakamolemole foki o hage ko [Sehova] ae nee fakamolemole kia koutou.” (Kol. 3:13) ʼE fakahā ʼi te kupusiga palalau “kapau e mamahi he tahi,” ʼe lagi ʼe ʼi ai ni tupuʼaga lelei ʼo tatatou ʼiʼita ʼaē ki niʼihi. Kae ʼaua naʼa tou ʼiʼita ki he ʼu kiʼi meʼa pē ʼe mole tou leleiʼia ʼi te ʼuluagaaga ʼo he tahi. ʼE feala ki te faʼahi ʼaia ke fakatupu kovi ki te tokalelei ʼo te kōkelekāsio. Kae ʼe tonu ke tou faiga ʼo faʼifaʼitakiʼi ia Sehova ʼaki tatatou lotolelei ʼo fakamolemole ʼotatou tehina mo tuagaʼane pea mo tou haga tauhi fakatahi mo nātou ki te ʼAtua.

15. (1) Koteā ʼaē ʼe feala ke tou ako ʼo ʼuhiga mo te fakamolemole mai te faʼifaʼitaki ʼo Sopo? (2) ʼE tokoni feafeaʼi mai te faikole ke tou fakahā he faʼahiga manatu ʼe lelei?

¹⁵ ʼE feala ke tou ako ʼo ʼuhiga mo te fakamolemole mai te faʼifaʼitaki ʼo Sopo. Ko te foʼi toko tolu tagata ʼaē neʼe tonu ke natou fakalotofīmālie ia ia, neʼe natou fai age ki ai he ʼu palalau fakalotomamahi. Kae neʼe fakamolemole pē e Sopo kiā nātou. Koteā ʼaē neʼe tokoni ki ai ke ina fai te faʼahi ʼaia? Neʼe ko tana “faikole ki ona kaumea.” (Sopo 16:2; 42:10) ʼI te temi ʼaē ʼe tou faikole ai maʼa ʼihi, ʼe feala ke mole kei tatau tatatou faʼahiga manatu ʼo ʼuhiga mo nātou. ʼI te temi ʼaē ʼe tou faikole ai ki ʼotatou tehina mo tuagaʼane fuli, ʼe tokoni mai anai ke tou maʼu te manatu ʼa Sesu. (Soa. 13:34, 35) Pea ʼe tonu foki ke tou kole ki te ʼAtua tona laumālie māʼoniʼoni. (Luka 11:13) ʼE tokoni mai anai te laumālie ʼo te ʼAtua ke tou fakahā ʼi ʼatatou felōgoi ʼaē mo ʼihi te ʼofa, te tokalelei pea mo te tahi atu ʼu agaaga Fakakilisitiano.—Lau ia Kalate 5:22, 23.

ʼE FUA LELEI ANAI TAKOTOU FAʼAHIGA MANATU KI TE KŌKELEKĀSIO KĀTOA

16, 17. Ko te faʼahiga manatu fea ʼaē ʼe kotou fia fakahā?

¹⁶ Kapau ʼe tou gāue mālohi ke tou taupau takitokotahi he faʼahiga manatu ʼe lelei, pea ʼe fua lelei anai ki te kōkelekāsio kātoa. Neʼe lagi tokoni atu te ʼalatike ʼaenī ke kotou fai te tonu ʼaē ke kotou hikihiki takotou faʼahiga manatu pea ke lahi age takotou fakalotomālohi ʼihi. Kapau koia, kotou tuku te Folafola ʼa te ʼAtua ke ina fakahā atu pe feafeaʼi hakotou lava fai he ʼu fetogi. (Hep. 4:12) Ko Paulo, ʼaē neʼe loto ke liliu ko he faʼifaʼitaki ki te ʼu kōkelekāsio, neʼe ina ʼui fēnei: “E mole au mau ni mea i toku loto e au hala ai; kae e mole ko te mea aia e fakamatatonu ai au. Ko ae e ina fakamaaui au, ko [Sehova].”—1 Ko. 4:3, 4.

¹⁷ ʼE feala hatatou fefakalotomālohiʼaki ke tou taupau he faʼahiga manatu ʼe lelei ʼi te kōkelekāsio. ʼE feala hatatou fai te faʼahi ʼaia, ʼaki tatatou faʼifaʼitakiʼi te tokalelei, mo te agamalū, pea mo te manavaʼofa ʼa te ʼAtua pea ʼo mole tou ʼui ʼe tonu pē ʼatatou manatu, peʼe ke foaki mai he tahi age ʼu pilivilēsio. Kapau ʼe tou foimo fakamolemole ki ʼihi pea mo maʼu he ʼu manatu ʼe lelei ʼo ʼuhiga mo nātou, pea ʼe tou taupau anai te tokalelei mo ʼotatou tehina mo tuagaʼane. (Filp. 4:8) ʼE feala hatatou tui papau mokā tou fai te ʼu faʼahi ʼaia, pea ʼe leleiʼia anai e Sehova mo Sesu te faʼahiga manatu ʼaē ʼe tou fakahā.—Film. 25.

[ʼU fehuʼi ʼo te ako]

[Paki ʼo te pāsina 20]

Ko tatatou metitāsio ki te tuʼulaga ʼo Sesu, ʼe tonu ke malave feafeaʼi ki tatatou faʼahiga tali ia he tokoni?