ʼE Fetogi e Te Tohi-Tapu Te ʼu Maʼuli

“Neʼe Nā Loto Ke Au Maʼu e Au Totonu Te Moʼoni”

Neʼe fakamatala e Luis Alifonso

TONA TAʼU TUPU: 1982

TONA FENUA: REPUBLIQUE DOMINICAINE

TONA HISITOLIA: NEʼE MORMON

TOKU MAʼULI ʼI MUʼA ATU: Neʼe au tupu ʼi Saint-Domingue, ʼi te fenua ko République Dominicaine, ko au ko te muli ʼo te toko fa. Ko ʼaku matuʼā neʼe ko te ʼu hahaʼi neʼe lelei tona ako pea neʼe nā loto ke toe feia mo ʼanā tamaliki. Ia taʼu ʼe fa ʼi muʼa ʼo taku tupu, neʼe felaveʼi ʼaku matuʼā mo te ʼu misionea Mormon. ʼI te lave ki ʼamatou matuʼā ia te maʼa ʼo ʼonā teu pea mo te lelei ʼo tanā aga kaʼe ʼe kei tupulaga, neʼe nā fakatotonu ai ke matou liliu ko te ʼuluaki famili ʼo te motu ʼe kau ki te Ekelesia ʼo Sesu Kilisito ʼo te ʼu Sagato ʼo te ʼu ʼaho Fakamuli, ia te kau Mormon.

ʼAki taku lahilahi ake, neʼe au leleiʼia te ʼu meʼa ʼae ʼe fai e te lotu, pea neʼe au fakaʼapaʼapa ki te ʼu fakatuʼutuʼu ʼa te kau Mormons ʼo ʼuhiga mo te maʼuli fakafamili pea mo te ʼu aga ʼae ʼe tonu ke fai. Neʼe au fiameʼameʼa ʼi toku ʼuhiga Mormon pea neʼe au fakatuʼutuʼu ke au liliu ko he misionea.

ʼI toku taʼu 18, neʼe folau leva tomatou famili ki Amelika ʼo nonofo ai ke feala haku alu ʼo ako ʼi he univelesite lelei. Hili te taʼu katoa, pea neʼe olo age te kiʼi tehina ʼo taku faʼe mo tona ʼohoana, neʼe ko te u Fakamoʼoni ʼa Sehova, ʼo fakasiosio ia matou ʼi Floride. Neʼe nā fakaafe ia matou ke matou olo mo naua ki te fakatahi ʼe fakatafito te ʼu akonaki ki te Tohi-Tapu. Neʼe au punamaʼuli ʼi taku sio ki te hahaʼi ʼo te fakatahi ʼe natou kumi te ʼu vaega Tohi-Tapu pea mo natou tohi te ʼu manatu ʼo te ʼu akonaki. Koia, neʼe au kole ai haku peni pea mo he mo ʼi pepa ke au fai ohage ko natou.

ʼI te ʼosi ʼo te fakatahi, neʼe ui mai e taku kiʼi faʼe pea mo tona ʼohoana kapau ʼe au fia liliu ko he misionea, pea ʼe feala ke nā tokoni mai kia au ke au mahino ki te Tohi-Tapu. Neʼe au manatu ʼe ko he puleʼaki lelei ʼaia, koteʼuhi neʼe lahi age taku iloʼi te Livre de Mormon ʼi te Tohi-Tapu.

TE FETOGI ʼO TOKU MAʼULI E TE TOHI-TAPU: ʼI te lolotoga ʼo ʼamatou faipalalau ʼi te telefoni ki te Tohi-Tapu, neʼe fakalotomalohiʼi tuʼumaʼu au e taku kiʼi faʼe pea mo tona ʼohoana ke au fakatatau te ʼu akonaki ʼa te kau Mormons pea mo te ʼu akonaki  ʼa te Tohi-Tapu. Neʼe nā loto ke au maʼu e au totonu te moʼoni ʼi te Tohi-Tapu.

Neʼe lahi te ʼu akonaki ʼa te kau Mormon neʼe au tali, kaʼe neʼe mole au iloʼi papau pe ʼe tuʼu ʼi te Tohi-Tapu ia te ʼu manatu ʼaia. Neʼe momoli mai e taku kiʼi faʼe te nusipepa Réveillez-vous ! ʼo te ʼaho 8 ʼo Novepeli 1995 neʼe ta e te kau Fakamoʼoni ʼa Sehova, ʼe maʼu ai te ʼu alatike ʼo ʼuhiga mo te ʼu akonaki ʼa te kau Mormon. Neʼe au punamaʼuli ai ki te lahi ʼo te ʼu akonaki ʼa te kau Mormon ʼae neʼe mole au iloʼi. Neʼe tupu ai taku kumi ki te tuʼa sila ʼo te kau Mormon ʼi te Neti ke au sio pe ʼe moʼoni te ʼu manatu ʼae ʼe tuʼu ʼi te Réveillez-vous !. Neʼe moʼoni ia, pea neʼe au toe sio ki tona moʼoni ʼi taku alu ʼo mamata ki te fale tanakiʼaga mataga ʼo te kau Mormon ʼi Utah.

ʼI taku manatu, ʼe alu tahi tuʼumaʼu te Livre de Mormon pea mo te Tohi-Tapu. Kaʼe ʼi taku kamata lau fakalelei te Tohi-Tapu, neʼe au tokagaʼi ai te kehekehe ʼo te ʼu akonaki ʼa te kau Mormon mo ʼae ʼi te Tohi-Tapu.

ʼO hilifaki ki te mole felogoʼi ʼa te ʼu akonaki, neʼe toe faikehe kia au te akonakiʼi e te kau Mormon ia te ʼu manatu fakapolitike. Ohage la, neʼe natou tala ko te ʼoloto ʼo Eteni neʼe tuʼu ʼi Amelika, ʼi te comté de Jackson ʼo Missouri. Pea neʼe toe ui e te kau polofeta ʼa te kau Mormon, ka kamata pule anai te “Puleʼaga ʼo te ʼAtua, pea ʼe fiameʼameʼa anai te hahaʼi ʼi te toho fakafiafia ʼo te fuka ʼo Amelika pea ʼe mole ʼi ai anai hona mele ʼi te faʼahi ʼo te ʼu lao ʼo te ʼateaina ʼo te tagata.”

Pea neʼe au feʼekeʼaki pe ʼe hoko feafeaʼi anai te akonaki ʼaia ki te tahi ʼu fenua, ohage la ko te fenua ʼae neʼe au tupu ai. Neʼe au talanoa ki ai ʼi taku tahi faipalalau ʼi te telefoni mo te tupulaga Mormon ʼe lolotoga ako ke liliu ko he misionea. Neʼe au fehuʼi fakalelei age kia ia pe ʼe ina tauʼi anai te kau Mormon ʼo he tahi fenua mo kapau ʼe natou laga tau mai ki tona fenua. Neʼe au punamaʼuli ki tana ʼio mai ki te faʼahi ʼaia! Neʼe toe ʼasili ai ʼaku fekumi ʼo ʼuhiga mo taku tui pea mo au fakafehuʼi ia te kau takitaki pule ʼo te lotu Mormon. Neʼe au iloʼi, ʼe maʼu anai ʼi he ʼaho ia te ʼu tali ki ʼaku fehuʼi ʼae ʼe faigataʼa, ohage pe ko te fakahaʼuhaʼu mamalie ʼo te malama ʼo te ʼaho.

ʼI te mole fimalie ʼae ʼo toku loto ʼi ʼanatou fakamahino, neʼe au toe vakaʼi ai toku maʼuli pea mo te tupuʼaga ʼae ʼo taku fia liliu ko he misionea Mormon. Neʼe au tokagaʼi ai neʼe au fia misionea ʼuhi ko taku fia tokoni ʼae ki te hahaʼi. Ko te tahi tupuʼaga ʼe ko taku loto ʼae ke fakaʼapaʼapaʼi au e te hahaʼi. Kaʼe neʼe mole lahi he ʼu meʼa ʼe au iloʼi ʼo ʼuhiga mo te ʼAtua. Logola te kua lahi ʼo taku vakaʼi ʼi muʼa atu te Tohi-Tapu, kaʼe neʼe mole faʼa maʼuhiga fau kia au. Neʼe mole au iloʼi pe la te finegalo ʼo te ʼAtua ʼo ʼuhiga mo te kele pea mo te tagata.

TE ʼU LELEI NEʼE AU MAʼU AI: ʼAki taku ako te Tohi-Tapu mo te kau Fakamoʼoni ʼa Sehova, neʼe au iloʼi ai te tahi ʼu meʼa, ohage la ko te huafa ʼo te ʼAtua, mo te meʼa ʼae ʼe hoko moka mate he tahi, pea mo te gaue ʼa Sesu ʼi te fakahoko ʼo te finegalo ʼo te ʼAtua. ʼAki te temi, neʼe au fakamamahani leva ki te tohi lelei ʼaia pea neʼe au fiafia ʼi te fakaha ki ʼihi ia te ʼu moʼoni ʼae neʼe au ako. Neʼe au iloʼi tuʼumaʼu pe ʼe ʼi ai te ʼAtua, kaʼe ʼi te temi nei kua feala taku palalau kia ia ʼi te faikole ohage ko hoku kaumeʼa lelei. Neʼe au papitema ʼo liliu ko he Fakamoʼoni ʼa Sehova ʼi te ʼaho 12 ʼo Sulio 2004, pea hili mahina ʼe ono neʼe au kamata leva taku selevisi temi katoa ʼi te minisitelio Fakakilisitiano.

Lolotoga taʼu ʼe nima, neʼe au gaue ʼi te ʼu pilo lalahi ʼo te kau Fakamoʼoni ʼa Sehova ʼi Brooklyn, ʼi New York. ʼE au fiafia lahi ʼi te tokoni ki te ta ʼo te ʼu Tohi-Tapu pea mo te ʼu tohi Fakatohi-tapu ʼe ʼaoga ki te toko miliona hahaʼi ʼi te kele katoa, pea ʼe au hoko atu taku tokoni ki te hahaʼi ke natou ako te iloʼi ʼo te ʼAtua.