Te ʼu Tali Ki Te ʼu Fehuʼi Fakatohi-Tapu

He ko ʼe ʼe faigataʼa te maʼu ʼo te tokalelei ʼi te kele?

ʼE talanoa ʼi te Tohi-Tapu kia tupuʼaga tafitō ʼe lua. ʼUluaki, logola te fakahoko e te tagata ia te ʼu gaue fakaofoofo kaʼe neʼe mole fakatupu ia ia ʼaki te fealagia ʼae ke ina takitaki tona ʼala. Lua, neʼe mole feala ke hoko te ʼu fakatuʼutuʼu ʼa te tagata koteʼuhi “e malolo te malamanei katoa i te malohi o te kovi,” ia Satana te Tevolo. Koia la ʼae, ʼe mole he fua lelei ʼo te ʼu faiga ʼa te tagata ke ina fakatuʼu te tokalelei ʼi te kele.—Lau ia Selemia 10:23; 1 Soane 5:19.

ʼE toe faigataʼa te maʼu ʼo te tokalelei ʼi te kele ʼuhi ko te tagata, tana manatu pe kia ia totonu pea mo tana fia maʼu tuʼulaga. ʼE hoki feala ke maʼu te tokalelei ʼi te kele mo kapau ʼe akoʼi e he puleʼaga fakamalamanei ia te hahaʼi ke natou ʼofa ki te faitotonu pea mo natou fetokoniʼaki.—Lau ia Esaia 32:17; 48:18, 22.

Ko ai ʼae ka ina fakatuʼu anai te tokalelei ʼi te kele?

Neʼe fakapapau e te ʼAtua Mafimafi ʼe ina fakatuʼu anai he puleʼaga ke ina takitaki te malamanei katoa pea ʼe ina fetogi anai te ʼu puleʼaga fakatagata. (Taniela 2:44) ʼE pule anai ia Sesu, te ʼAlo ʼo te ʼAtua, ʼi tona ʼuhiga ʼAliki ʼo te Tokalelei. ʼE ina pulihi katoa anai ia te agakovi ʼi te kele pea mo ina akoʼi te maʼuli ʼo te tokalelei ki te hahaʼi.—Lau ia Esaia 9:5, 6; 11:4, 9.

Ia ʼaho nei, ʼaki te takitaki ʼa Sesu, ko te toko lau ʼi miliona hahaʼi ʼi te kele katoa ʼe natou fakaʼaogaʼi ia te Folafola ʼa te ʼAtua, te Tohi-Tapu, moʼo akoʼi te hahaʼi ke natou maʼuliʼi te tokalelei. Kua vave hoko mai te temi ʼae ka fakatuʼu anai te tokalelei ʼi te malamanei katoa.—Lau ia Esaia 2:3, 4; 54:13.

Kapau ʼe kotou fia maʼu he tahi ʼu fakamahino, vakaʼi te kapite 3 ʼo te tohi ʼaeni Koteā ʼAē ʼe Akoʼi Moʼoni Mai ʼi Te Tohi-Tapu?, neʼe ta e te kau Fakamoʼoni ʼa Sehova

[Paki ʼo te pasina 10]

ʼE hoki feala ke maʼu te tokalelei ʼi te kele mo kapau ʼe fetogi e he puleʼaga fakamalamanei ia te aga ʼo te hahaʼi

Haʼuʼaga ʼo te paki]

Fatmir Boshnjaku