“Neʼe Au Fia Patele”

LAU

ʼE Fetogi e Te Tohi-Tapu Te ʼu Maʼuli

“Neʼe Au Fia Patele”

Neʼe fakamatala e Roberto Pacheco

TONA TAʼU TUPU: 1957

TONA FENUA: MEKESIKE

TONA HISITOLIA: NEʼE SEMINALIO; NEʼE AGAMALOHI

TOKU MAʼULI ʼI MUʼA ATU: Neʼe au tupu ʼi te kolo ko Texcoco. ʼI te temi ʼaia, neʼe lahi te ʼu ala kele pea mo efuʼia. Neʼe matou sio mahani ki te hahaʼi neʼe ʼomai mai te ʼu kiʼi kolo liliki ʼo te ʼu tafaʼaki pea mo ʼanatou asino, neʼe ʼamo ai te ʼu tuʼuga meʼa moʼo fakatau. Neʼe masiva tomatou famili. Neʼe matou tokohiva fanau, pea ʼe au tuʼulaga fitu. Moʼo taupau tomatou famili, neʼe faʼu e taku tamai te ʼu sulie vagavaga ʼae kua kovi. Kaʼe neʼe mate ia kaʼe kei au taʼu fitu. Neʼe faiga malohi ai leva e tamatou faʼe ke ina taupau te famili.

Neʼe poto taku kui ʼi te faimaholo ʼaki te violon pea neʼe faitafua ʼi te foʼi maholo neʼe natou fai tafitō te ʼu musika lotu. Neʼe teitei pe ko toku famili katoa neʼe popoto ʼi te faimaholo. Neʼe kau taku faʼe ʼi te kau hiva ʼo te ʼekelesia, pea ko taku faʼetagata neʼe hiva pea mo lomi piano. Neʼe matou tauhi lotu lelei, heʼe ʼi taku kei veliveli neʼe au tauhi misa pea neʼe au fia liliu ko he misionea Katolika. Pea neʼe au toe leleiʼia ʼaupito te ʼu ʼata kalate. ʼI taku tau sioʼi te ʼu ʼata ʼaia, neʼe toe lahi ai mo taku agamalohi.

ʼI te kolo ko Puebla, neʼe au hu ki te fale ako lotu neʼe hage he seminalio. Neʼe au fia patele. Kaʼe lolotoga toku taʼu fakaʼosi, neʼe mole kei au tui ki te Lotu Katolika. Ko te taupoʼou kei finemui neʼe ina fakaneke au ke ma fai he ʼu felaveʼi fakasino. Neʼe au fakafisi, kaʼe ʼaki te meʼa ʼaia neʼe hoko, neʼe tupu ai taku fia ʼohoana. Tahi ʼae meʼa, neʼe au tokagaʼi te malualoi ʼa te kau patele. Koia ʼae neʼe mole kei au fia patele ai.

Neʼe au filifili ke au ako te faimusika ʼi te Fale Ako Musika ʼo te Kolo ko Mekesike. ʼI taku ʼosi maʼu taku pepa, neʼe au ʼohoana, pea mole faʼa fualoa, neʼe ma maʼu ʼama toe ʼe tokofa. Neʼe au taupau toku famili ʼo au hiva ʼi te Misa ʼo te ʼEkelesia.

ʼI te kamata pe ʼo toma maʼuli fakataumatuʼa, neʼe ma fetokakoviʼaki. Neʼe ma agamalohi tokolua, tupu tafitō he neʼe ma fefuaʼaʼaki. ʼI te kamata neʼe ma fetauveleʼaki, kaʼe ki muli age neʼe ma fuhu. Pea hili taʼu ʼe 13 ʼo tamā ʼohoana, neʼe ma tahi nofo pea ki muli age neʼe ma mavete.

TE FETOGI ʼO TOKU MAʼULI E TE TOHI-TAPU: Neʼe au ʼuluaki felaveʼi mo te kau Fakamoʼoni ʼa Sehova ʼi muʼa ʼo taku mavete mo toku ʼohoana. Ko te ʼu Fakamoʼoni ʼe tokolua neʼe nā fisifisi ki tamā matapa pea nā fakaafe ke matou faipalalau ki te Tohi-Tapu. Neʼe au manatu ʼe lahi te ʼu faʼahi ʼe au iloʼi ʼo ʼuhiga mo te lotu, koia neʼe au fia fakaha age neʼe nā faihala. Neʼe au fai te ʼu fehuʼi faigataʼa he neʼe au manatu ʼe mole he tali ki ai. Kaʼe neʼe au punamaʼuli, koteʼuhi neʼe nā tali lelei tuʼumaʼu pe ʼaki te Tohi-Tapu. Neʼe au kamata mahino ai neʼe mole lahi te ʼu faʼahi ʼae neʼe au iloʼi. Kaʼe neʼe agakovi toku ʼohoana mo te kau Fakamoʼoni, pea neʼe au maʼumaʼua tuʼumaʼu, koia neʼe gata ai leva tanā ʼomai.

Hili taʼu ʼe nima, neʼe kua au nofo mo te tahi fafine, ko Elvira, pea neʼe au toe felaveʼi ai mo te kau Fakamoʼoni ʼa Sehova. Neʼe mole fakafeagai ia Elvira ki te kau Fakamoʼoni, koia neʼe faigafua age te faihoholo ʼo taku ako Tohi-Tapu. Kaʼe neʼe ʼaoga ni taʼu moʼo fetogi ʼo toku maʼuli.

Neʼe au mahino, kapau ʼe au fia tauhi kia Sehova ʼaki toku loto katoa, pea neʼe tonu ke au fai he ʼu toe fetogi lahi. ʼUluaki, neʼe tonu ke au fakagata taku hiva ʼi te ʼu Misa ʼo te ʼEkelesia, pea mo au toe maʼu he tahi gaue moʼo taupau tomatou maʼuli. (Apokalipisi 18:4) Neʼe toe maʼua foki ke ma olo mo Elvira ʼo lameli.

Kaʼe ko te faʼahi ʼae neʼe faigataʼa ʼaupito, neʼe ko te lolomi ʼo toku ita. Ko vaega Tohi-Tapu tafitō ʼe lua neʼe tokoni mai: Pesalemo 11:5, ʼae ʼe fakaha ai ʼe fehiʼa Sehova ki te agamalohi, pea mo 1 Petelo 3:7, ʼae ʼe akoʼi mai ai, kapau ʼe au loto ke fagono Sehova ki ʼaku faikole, pea ʼe tonu ke au fakaʼapaʼapa ki toku ʼohoana. ʼI taku metitasioʼi te ʼu vaega ʼaia pea mo kole kia Sehova ke tokoni mai, kua feala ʼaki te temi ke au lolomi toku ita.

TE ʼU LELEI NEʼE AU MAʼU AI: ʼI te temi nei kua au maʼu he maʼuli fakafamili fiafia. ʼE au faiga ke au toe felogoʼi lelei mo ʼoku foha ʼae neʼe au maʼu ʼi toku ʼuluaki ʼohoana, pea mo tokoni ki toku kiʼi famili ke malohi tanatou tui.

ʼI taku kei veliveli, neʼe au fia patele pea mo tokoni ki te hahaʼi. Ia ʼaho nei, kua au maʼu he ʼuhiga moʼoni ʼo toku maʼuli. ʼE au taupau toku kiʼi famili ʼaki taku akoʼi te faimusika ki te hahaʼi. ʼE au fakafetaʼi lahi kia Sehova ʼi tana faʼa kataki mo au, ʼo ina tuku mai te faigamalie ke au fetogi ʼo liliu ko he tagata ʼe lelei!

[Paki ʼo te pasina 8]

[Fakamatala ʼo te pasina 8]

Neʼe au tauhi misa ʼi taku kei veliveli, he neʼe au fia liliu ko he misionea Katolika, kaʼe neʼe au toe leleiʼia ʼaupito mo te ʼu ʼata kalate pea neʼe au liliu ai ʼo agamalohi

[Fakamatala ʼo te pasina 9]

Neʼe au ako ʼi te Tohi-Tapu, kapau ʼe au loto ke fagono Sehova ki ʼaku faikole, pea ʼe tonu ke au fakaʼapaʼapa ki toku ʼohoana

[Paki ʼo te pasina 9]