KOTOU FAʼIFAʼITAKIʼI TANATOU TUI

Laape ‘Neʼe Fakamatatonu Ia Ia ʼe ʼAna Gaue’

NEʼE fakasiosio ia Laape mai tona matapa fakamalama, kaʼe lolotoga hopo ake te laʼa ʼi te tuʼa kolo ko Seliko. Kua fakatahitahi ai te foʼi kautau ʼa Iselaele. Neʼe ko te tahi ʼaho ʼaia, neʼe natou toe kamata ai te foli ʼo te kolo, pea neʼe ina tokagaʼi te malaga ʼo te efu pea mo logo ki ʼanatou fakatagi pupuhi.

Neʼe maʼuli ia Laape ʼi te kolo ko Seliko; koia neʼe ina iloʼi lelei ai ia te ʼu ala, mo te ʼu ʼapi pea mo te ʼu fale koloa. Neʼe ina iloʼi lelei mo te hahaʼi. Neʼe ina logoʼi te ʼaʼasili ʼo te matataku ʼa te hahaʼi ʼi tanatou sisio ʼae ki te haga foli e te kau Iselaele ia te kolo, ʼo tuʼa tahi ʼi te ʼaho. Kaʼe neʼe mole mataku ia Laape pea mo lotovaivai ohage ko natou moka natou logo ʼi Seliko ki te tagi ʼo te ʼu fakatagi pupuhi.

ʼI te fitu ʼaho, ʼi te kei hegihegi, neʼe sio ia Laape ki te kamata haʼele ʼo te foʼi kautau. Neʼe ina tokagaʼi te haʼele ʼa te kau pelepitelo ʼi te lotolotoiga ʼo te kau solia Iselaele. ʼE natou pupuhi ʼanatou fakatagi pupuhi pea mo ʼamo te aleka taputapu ʼae ʼe ina fakafofoga tonatou ʼAtua, ia Sehova. Kotou fakakaukauʼi age muʼa, ʼe puke e Laape ia te maea kula ʼe tautau ʼi tona matapa fakamalama pea mo ha ʼi te tuʼa kaupa lahi ʼo Seliko. Ko te maea ʼaia ʼe ko he fakamanatu kia Laape tana fakaʼamu ʼae ʼe haofaki anai ia ia pea mo tona famili mai te fakaʼauha ʼo te kolo. Neʼe aga fakakakā koa ia Laape ki tana hahaʼi? Neʼe mole ko te manatu ʼaia ʼa Sehova; neʼe ina tokagaʼi te lahi ʼaupito ʼo te tui ʼa te fafine ʼaia. Tou toe vakaʼi age muʼa ia te kamataʼaga ʼo te hisitolia ʼo Laape pea mo tou vakaʼi peʼe kotea te ʼu ako ʼe feala ke tou maʼu mai tona faʼifaʼitaki.

KO LAAPE, NEʼE KO HE FAFINE FAIAGA

Ko Laape, neʼe ko he fafine faiaga. Neʼe punamaʼuli ʼosi ʼihi kau faifakamahino ʼo te Tohi-Tapu ʼo te temi muʼa ʼuhi ko te faʼahi ʼaia. Koia neʼe natou lau ai, neʼe gaue ʼi te fale tali fagona. Kaʼe ʼe ui fakahagatonu ʼi te Tohi-Tapu neʼe ko he fafine faiaga. Pea ʼe mole ina fufu ia te faʼahi ʼaia. (Sosue 2:1; Hepeleo 11:31; Sakopo 2:25) ʼI te fenua ʼo te kau Kanaane, neʼe mole koviʼia e te hahaʼi ia te gaue ʼa Laape. Logo la ʼi tanatou aga ʼi fenua neʼe natou tali lelei ia te gaue ʼa he fafine faiaga, kaʼe neʼe iloʼi lelei pe e Laape, ʼi tona leʼo ʼo loto, neʼe mole ko he faʼahi ʼe lelei. (Loma 2:14, 15) Neʼe lagi ufiufi ia Laape ʼuhi ko tona faʼahiga maʼuli ʼaia. Neʼe lagi hage ia ia ko te tokolahi ʼi te temi nei ʼe natou maʼuli feia, pea neʼe ko te puleʼaki pe ʼaia ʼe tahi ke feala hana taupau tona kiʼi famili.

Neʼe lagi fakaʼamu ia Laape ki he tahi faʼahiga maʼuli ʼe lelei age. Neʼe lahi ʼaupito te ʼu aga ʼe kovi pea mo fakalialia neʼe fai ʼi tona kolo, ʼo kau ai te ʼu felaveʼi fakasino mo he kaiga totonu peʼe ko he manu. (Levitiko 18:3, 6, 21-24) Neʼe ʼi ai te pikipikiga ʼo te mafola ʼo te ʼu agakovi ʼaia pea mo te lotu. Neʼe fakamaʼuhigaʼi ʼi te ʼu fale lotu ia te ʼu faiaga pea mo te tauhi ki te ʼu ʼatua fakatemonio ohage ko Paale pea mo Moloke, ʼo kau ai mo te sakilifisioʼi ʼo te kau tamaliki ʼe tutu ʼi te afi.

Neʼe tokagaʼi e Sehova ia te ʼu meʼa fuli neʼe hoko ʼi Kanaane. ʼI tana sio ki te ʼu agakovi fuli ʼae neʼe fai e te kau Kanaane, neʼe ui fenei e Sehova: “Kua uli te fenua ia natou; e tautea anai tana agakovi, pea e luai anai e te fenua tana hahai.” (Levitiko 18:25) Kotea ia te “tautea” ʼaia? Neʼe kua fai e te ʼAtua ia te fakapapau ʼaeni ki te kau Iselaele: “E kapu mamalie anai e [Sehova], tou Atua, te u puleaga aia o mamao mai ou  mata.” (Tetelonome 7:22) ʼI te ʼu sekulo ki muʼa atu, neʼe fakapapauʼi e Sehova ʼe maʼu anai e te famili ʼo Apalahamo ia te fenua ʼaia pea ko “te Atua . . . e mole loi.”—Tito 1:2; Senesi 12:7.

Kaʼe neʼe toe fakatotonu e Sehova ʼe tonu anai ke pulihi katoa ʼihi telepi ʼi te fenua ʼaia. (Tetelonome 7:1, 2) Koia mai tona aluʼaga ʼae, ko Sehova “ae e ina fakamaaui te kele katoa” pea ʼe faitotonu, neʼe kua ina iloʼi lelei te loto ʼo te tagata takitokotahi pea mo tana aga kovi. (Senesi 18:25; 1 Koloniko 28:9) Neʼe feafeaʼi ia te maʼuli ʼo Laape ʼi te fenua agakovi ʼaia? Kotea tana manatu ʼi tana logo ʼae ki te ʼu fakamatala ʼo ʼuhiga mo te kau Iselaele. Neʼe logo neʼe taki e te ʼAtua ʼo Iselaele ia tana hahaʼi, ʼae ko he hahaʼi kaugana, ke natou tau pea mo malo ʼi te foʼi kautau ʼo Esipito, ia te malohi fakamalamanei ʼo te temi ʼaia. Pea ʼi te temi leva ʼaeni, ʼe natou fia ʼohofi ia Seliko! Kaʼe neʼe hoko atu aipe ia te agakovi ʼa te hahaʼi. Ko te tupuʼaga la ʼaia ʼo te ui ʼi te Tohi-Tapu, ko te kau Kanaane ʼo te temi ʼo Laape “nee mole tui,” peʼe neʼe talagataʼa.—Hepeleo 11:31.

Neʼe mole hage ia Laape ko natou ʼaia. ʼAki te alu ʼo te temi, neʼe ina fakakaukauʼi ia te ʼu fakamatala ʼae neʼe logo ki ai ʼo ʼuhiga mo te kau Iselaele pea mo tonatou ʼAtua ko Sehova. Neʼe ina tokagaʼi ia te kehekehe ʼo te ʼAtua ʼaia pea mo ʼae ʼa te kau Kanaane. Ohage la, neʼe tau ia te ʼAtua ʼaia maʼa tana hahaʼi kaʼe neʼe mole ina fakamamahiʼi natou. Neʼe ina foaki age he ʼu lekula maʼoluga moʼo fakamaʼuhigaʼi natou kaʼe mole fakamalaloʼi natou. Pea neʼe fakamaʼuhigaʼi e te ʼAtua ʼaia ia te hahaʼi fafine, kaʼe neʼe mole hage natou ko he ʼu meʼa ʼe fakatau moʼo fai ʼaki he ʼu aga heʼe ʼaoga pea moʼo fakalainoaʼi ʼo natou ʼi he tauhi fakalialia. Neʼe lagi tuʼania ia Laape ʼo ʼuhiga mo tana hahaʼi ʼi tana logo ʼae kua fakalaka ia te kau Iselaele ʼi te Vaitafe ʼo Solotane, pea kua natou vave ʼohofi te kolo. Neʼe tokagaʼi koa e Sehova ia Laape pea mo te lelei ʼo tona loto?

Tokolahi ia ʼaho nei, ʼe natou hage ko Laape. ʼE natou haʼisia ʼi te faʼahiga maʼuli ʼaia, ʼo puli ai tonatou matagafua pea mo tonatou fiafia. ʼE natou logoʼi ʼe mole he tahi ʼe ina tokagaʼi natou pea mo fakamaʼuhigaʼi ia natou. ʼE ko he fakamanatu fakalotofimalie ia te hisitolia ʼaeni ʼo Laape, ʼe mole he tahi ʼe ugia kia mata ʼo te ʼAtua. Tatau aipe peʼe kotea ʼae ʼe tou logoʼi, kaʼe “e mole mamao ia maia tatou takitahi.” (Gaue 17:27) ʼE nofo ovi ia tatou, ʼe nofo teuteu pea mo fakaʼamu lahi ke ina foaki he ʼamanaki kia natou fuli ʼae ʼe tui kia te ia. Neʼe ko te faʼahi koa ʼaia neʼe fai e Laape?

NEʼE INA TALI TE ʼU TAGATA NEʼE OMAI FAKAFUFU

ʼI te tahi ʼaho, ʼi muʼa ʼo te kamata foli e te kau Iselaele ia Seliko, neʼe olo age te ʼu tagata matapule ʼe tokolua ki te ʼapi ʼo Laape. Neʼe faigaʼi e te ʼu tagata ʼaia ke ʼaua naʼa tokagaʼi naua e te hahaʼi, kaʼe ʼi te lahi fau ʼo tonatou matataku neʼe nonofo te hahaʼi ʼo lamalama naʼa fokifa ʼe olo fakafufu age he kau Iselaele. Neʼe mole punamaʼuli ia Laape ʼi te olo age ʼa te ʼu matapule ki tona ʼapi kaʼe neʼe mata faikehe kia ia tanā olo age ke fakaʼapi naua, kaʼe mole ʼuhi heʼe ko ia ko te fafine faiaga. Neʼe lagi ina iloʼi atu aipe pe ko ai ia naua.

Ko te ʼu tagata ʼaia ʼe tokolua neʼe ko he ʼu tagata fakafufu mai te nofoʼaga ʼo te kau Iselaele. Neʼe fekauʼi naua e tonā pule ko Sosue ke nā olo ʼo vakavakaʼi pe kotea te ʼu malohi pea mo te ʼu vaivaiʼaga ʼo te kolo ko Seliko. Ko te ʼuluaki kolo ʼaia ʼo Kanaane  neʼe tonu ke ʼohofi e te kau Iselaele pea neʼe lagi ko te kolo ʼaia neʼe malohi age ʼi te ʼu kolo fuli ʼae. Neʼe fia iloʼi e Sosue peʼe ko ai ia natou ʼae ka natou tauʼi anai. ʼE mahino ia, neʼe filifili tonu e te ʼu tagata fakafufu ia te ʼapi ʼo Laape. ʼI te ʼu ʼapi fuli ʼae, neʼe gata pe ki te ʼapi ʼo he fafine faiaga neʼe feala ke olo ki ai he ʼu matapule kaʼe mole tokagaʼi e te hahaʼi. Pea tahi, neʼe lagi manatu ia te ʼu tagata fakafufu ʼaia ʼe feala anai ke nā logo ʼi ai ki he ʼu fakamatala, ʼo nā maʼu ai ni logo.

ʼE ui ʼi te Tohi-Tapu ko Laape neʼe ina “tali te u tagata [“fakafufu,” MN].” (Sakopo 2:25) Neʼe ina fakaʼapi naua. Logo la neʼe mole ina iloʼi papau peʼe ko ai ia naua pea mo te tupuʼaga ʼo tanā olo age, kaʼe neʼe ina taupau pe ia naua. Neʼe lagi fakaʼamu ke ina maʼu he tahi age ʼu logo ʼo ʼuhiga mo tonatou ʼAtua, ia Sehova.

Kaʼe fokifa pe, neʼe tau age ia te ʼu tagata ʼae neʼe fekauʼi e te hau ʼo Seliko! Kua mafola ia te logo ʼae neʼe olo age ia te ʼu tagata fakafufu Iselaele ki te ʼapi ʼo Laape. Neʼe ʼaoga ke fai e Laape ia he tonu. Kapau neʼe ina puipui ia te ʼu matapule ʼe tokolua ʼaia, neʼe mole koa la feala ke tuʼutamakiʼia ai tona maʼuli pea mo ʼae ʼo tona famili katoa? Kapau neʼe ina puipui ia te ʼu fili ʼaia, neʼe mole koa la feala ke tamateʼi ai natou e te hahaʼi ʼo Seliko? Kaʼe ʼi te lakaga ʼaia, neʼe iloʼi papau ai e Laape peʼe ko ai ia naua ʼaia. Neʼe kua ina iloʼi papau ʼe agalelei age ia Sehova ʼi ʼana ʼatua, pea neʼe lagi ko he faigamalie ʼaia ke ina fakaha ʼe fia kau kia Sehova.

Neʼe tonu ke toʼo fakavilivili e Laape ia he tonu fakapotopoto. Neʼe ina fufu ia te ʼu tagata fakafufu ʼi te ʼu fuhiga kau ʼi lino ʼae neʼe ina ta laʼa ʼi te ʼato ʼo tona ʼapi. Pea neʼe ina ui fenei ki te ʼu tagata ʼae neʼe fekauʼi age e te hau: “E mooni nee omai te u tagata aena ki toku fale, kae nee mole au iloi te kogamea ae nee na omai mai ai; pea nee toe olo te u tagata aena i te pouli, i te temi ae nee tapunui ai te matapa o te kolo, pea nee mole au iloi pe nee na olo ki fea. Kae kapau e kotou fakavilivili nei o tuli ia naua pea e kotou mau anai naua.” (Sosue 2:4, 5) Kotou fakakaukau age muʼa tana sio fakahagatonu ki te ʼu tagata ʼaia pea mo palalau kia natou. Neʼe lagi tuʼania naʼa natou tokagaʼi ia tona mataku.

Neʼe lava lelei tana kiʼi kakā! Pea neʼe feleleʼi atu aipe ia te ʼu tagata ʼa te hau ki te vaitafe ʼo Solotane. (Sosue 2:7) Neʼe lagi hoki tau lelei te manava ʼa Laape. ʼAki tana kiʼi kakā ʼaia, neʼe ina taki ia te kau faifakapo ki te tahi age koga meʼa. Neʼe mole tonu ke natou iloʼi te moʼoni, koia neʼe ina haofaki ai te ʼu kaugana ʼa te ʼAtua moʼoni, ia Sehova.

Neʼe toe hake fakavilivili ia Laape ki te ʼato ʼo tona ʼapi, ʼo fakamatala age ki te ʼu tagata fakafufu ia te meʼa ʼae neʼe ina fai. Neʼe ina toe fakaha age kia naua ia te logo maʼuhiga: Kua lotovaivai tana hahaʼi pea mo matataku ʼuhi ko te kau Iselaele. Neʼe lagi fiafia ia te ʼu tagata fakafufu ʼi tanā logo ʼae ʼe matataku te kau Kanaane agakovi ʼaia ki te malohi ʼo Sehova, te ʼAtua ʼo Iselaele! Pea neʼe fai e Laape he ʼu palalau ʼe maʼuhiga  ʼaupito kia tatou. Neʼe ina ui fenei: “Ko tokotou Atua, e Atua ia ia i oluga i te atu lagi, pea i lalo i te kele.” (Sosue 2:11) Neʼe ʼi ai te ako maʼuhiga neʼe ina maʼu mai te ʼu fakamatala ʼae neʼe logo ki ai ʼo ʼuhiga mo Sehova: Neʼe tuha ia te ʼAtua ʼo Iselaele mo tana falala. Koia neʼe ina tuku ai tana falala kia Sehova.

Neʼe tui papau ia Laape, ʼe maʼu anai te malo e te hahaʼi ʼa Sehova. Ko te tupuʼaga la ʼaia ʼo tana kole ia te manavaʼofa, ʼo ina kole ai ke haofaki ia ia pea mo tona famili. Pea neʼe ʼio te ʼu tagata fakafufu ki tana kole, ʼo kole age ke ʼaua naʼa ina fakaha ia te faʼahi ʼaia, pea mo ina tautau he maea kula mai tona matapa fakamalama ʼi te kaupa ʼo te kolo, ke feala ai ke puipui e te kau solia Iselaele ia ia pea mo tona famili.—Sosue 2:12-14, 18.

ʼE ʼi ai te ako maʼuhiga ʼe feala ke tou maʼu mai te faʼifaʼitaki ʼo te tui ʼa Laape. Ohage ko tona ui ʼi te Tohi-Tapu, ‘ ʼe haʼu ia te tui mai te ʼu meʼa ʼae ʼe tou logo ki ai.’ (Loma 10:17) Neʼe tupu tana tui pea mo tana falala ʼae kia Sehova heʼe neʼe logo ki te ʼu fakamatala ʼo ʼuhiga mo te mafimafi pea mo te faitotonu ʼa Sehova ʼAtua. Kaʼe ia ʼaho nei, ʼe feala ke lahi age tatatou iloʼi ia Sehova. ʼE tou faigaʼi anai koa ke tou iloʼi lelei age ia ia pea mo tou tui ki ai ʼaki tatatou ako ia tana Folafola te Tohi-Tapu?

NEʼE HOLO TE KOLO TAU

Neʼe mulimuli ia te ʼu tagata fakafufu ʼe tokolua ki te tokoni ʼa Laape, ʼo nā hihifo ʼi te kaupa mai tona matapa fakamalama ʼi he maea. ʼOsi ʼaia, pea nā feholaki fakavilivili ki te ʼu moʼuga. Neʼe lahi ia te ʼu ʼana neʼe feala ke nā fenonoʼi ai, ʼi te ala ʼae ʼe alu ki te potu Noleto ʼo Seliko. Pea ʼi te temi leva ʼae kua liliu ai te ʼu tagata faifekau ʼa te hau, kua feala leva ke nā toe liliu ki te nofoʼaga ʼo te kau Iselaele ʼo fakaha age ia te logo lelei ʼae neʼe nā maʼu mai ia Laape.

Ki muli age leva, neʼe lagi matataku te hahaʼi ʼo Seliko ʼi tanatou logo ʼae neʼe taʼofi fakamilakulo e Sehova ia te Vaitafe ʼo Solotane, ke feala ki te kau Iselaele ke natou fakalaka ai. (Sosue 3:14-17) Kaʼe kia Laape, ko te ʼu logo ʼaia neʼe ko he ʼu fakamoʼoni neʼe lelei ia tana tuku ia tana falala kia Sehova.

ʼOsi ʼaia, pea kamata ia te ʼu ʼaho ʼae neʼe foli ai e te kau Iselaele ia te kolo ko Seliko, lolotoga ʼaho ʼe ono, ʼo tuʼa tahi ʼi te ʼaho. ʼI te fitu ʼaho leva, neʼe mole tatau tanatou haʼele. Ohage pe ko tona fakamatala ʼi te kamataʼaga ʼo te alatike ʼaeni, neʼe natou kamata haʼele ʼi te kei hegihegi. ʼI te kua foli e te foʼi kautau ia te kolo, neʼe natou toe fai liuliuga. (Sosue 6:15) Kotea ʼae neʼe natou lolotoga fai?

ʼI te fitu ʼaho, ʼi te hili ʼo tanatou foli tuʼa fitu ia te kolo, neʼe tuʼu maʼu ia te foʼi kautau. Neʼe fakagata ia te tagi ʼo te ʼu fakatagi pupuhi. Neʼe kua gogona. Neʼe lagi matataku te hahaʼi ʼo te kolo. Pea ʼi te temi pe ʼae neʼe fakatotonu ai e Sosue, neʼe kalaga leʼo lahi ai leva ia te foʼi kautau ʼo Iselaele. Pea ko tanatou hoki logo ʼaia ki ʼonatou leʼo. ʼI tanatou logo ki tanatou kalaga tuʼa tahi ʼaia, neʼe mata faikehe ki te kau solia ʼae neʼe tutuʼu ʼi te foʼi kaupa ʼo Seliko ia te faʼahiga tau ʼa te kau Iselaele. Kaʼe neʼe natou faihala. Neʼe kamata galulu te foʼi kaupa ʼae neʼe natou tutuʼu ai. Neʼe gaugaue pea mo makafaʼafaʼa ia te kaupa pea ʼosi ʼaia pea neʼe holo! Hili ia, pea neʼe natou tokagaʼi ko te koga pe ʼo te foʼi kaupa neʼe mole holoʼi. Neʼe mole maumau ia te ʼapi ʼo Laape, koteʼuhi ʼae neʼe tui ia ia. Kotou fakakaukauʼi age muʼa ia te meʼa ʼae neʼe ina logoʼi ʼi tana sio ʼae neʼe puipui e Sehova ia ia pea mo tona famili! *—Sosue 6:10, 16, 20, 21.

Neʼe fakamaʼuhigaʼi e te hahaʼi ʼa Sehova ia Laape ʼuhi ko tana tui. ʼI tanatou sisio ʼae neʼe mole maumauʼi ia te ʼapi ʼo Laape, neʼe natou mahino ai neʼe kau ia Sehova mo te fafine ʼaia. Neʼe hao ia ia pea mo tona famili mai te tautea ʼae neʼe hoko ki te kolo agakovi ʼaia. ʼI te hili ʼo te tau, neʼe fakagafua kia Laape ke nofo ovi ki te nofoʼaga ʼo te kau Iselaele. ʼAki leva te alu ʼo te temi, neʼe kau ia Laape ki te kau Sutea. Neʼe ʼohoana mo te tagata neʼe higoa ko Salamone. Pea neʼe lahilahi ake leva tanā tama ko Poase ʼo liliu ko he tagata neʼe malohi tana tui. Neʼe ʼohoana leva tanā tama mo te fafine Moape neʼe higoa ko Lute. * (Lute 4:13, 22) Ko te Hau ko Tavite pea ki muli age mo te Mesia totonu ia Sesu Kilisito, neʼe nā hifo mai te famili ʼo Laape, ko te famili ʼaia neʼe makehe tanatou tui.—Sosue 6:22-25; Mateo 1:5, 6, 16.

ʼE tou ako mai te hisitolia ʼo Laape, ʼe mole he tahi ʼe ugia kia mata ʼo Sehova. ʼE ina tokagaʼi ia tatou fuli. ʼE ina iloʼi totatou loto pea ʼe fiafia moka ina tokagaʼi tatatou tui, ohage pe ko tana tokagaʼi ia te tui ʼa Laape. Neʼe fai e Laape he ʼu gaue ʼuhi ko tana tui. Ohage pe ko tona ui ʼi te Tohi-Tapu, neʼe “fakamatatonu foki ia i te u gaue.” (Sakopo 2:25) ʼE tou aga fakapotopoto mo kapau ʼe tou faʼifaʼitakiʼi tana tui. ▪

[ʼU nota]

[Paki ʼo te pasina 13]

Neʼe tui ia Laape ki te ʼAtua ʼo te kau Iselaele

[Paki ʼo te pasina 14]

Neʼe fakanono e Laape ia te ʼu kaugana ʼa Sehova ʼe tokolua ʼi he ʼu fuhiga kau ʼi lino, ʼo feala ke tuʼutamakiʼia ai tona maʼuli