Te ʼu Tali Ki Te ʼu Fehuʼi Fakatohi-tapu

He ko ʼe ʼe toe liliu mai ia Kilisito?

ʼI muʼa ʼo tana hake ki selo ʼi te taʼu 33 Hili te Temi ʼo Sesu, neʼe fakapapauʼi e Sesu ʼe toe liliu mai anai. Neʼe ina fakatatau ia ia ki he tagata ʼaliki neʼe faifolau fualoa pea neʼe toe liliu mai mo te malohi ke pule ʼi tona ʼuhiga hau. Koia ʼe toe liliu mai ia Sesu moʼo foaki ki te malamanei ia he puleʼaga ʼe lelei.—Lau ia Luka 19:11, 12.

ʼE toe liliu mai anai ia Sesu ʼaki he sino feafeaʼi? Neʼe fakatuʼuake ia ia ko he laumalie fakapulipuli. (1 Petelo 3:18) Pea neʼe hake ki te lagi ʼo nofo ʼi te toʼomataʼu ʼo te ʼAtua. (Pesalemo 110:1) Pea fualoa ki muli age, neʼe tuʼu ia Sesu ia muʼa ʼo Sehova ʼAtua, “te Matua o te u aho,” ia ia ʼae neʼe ina foaki kia Sesu ia te malohi ke pule ki te malamanei. Koia ʼe liliu mai anai ia Sesu, ʼo mole hage ko he tagata, kaʼe ohage ko he Hau fakapulipuli.—Lau ia Taniela 7:13, 14.

Kotea ʼae ka fai anai e Sesu moka haʼu?

ʼI te temi ʼae ka haʼu ai anai ia Sesu, ʼi te fakapulipuli mo tana kau ʼaselo, ʼe ina fakamau anai ia te malamanei. ʼE ina fakaʼauha anai ia te kau agakovi, kaʼe ʼe ina foaki ia te maʼuli heʼe gata kia natou fuli ʼae ʼe natou tali ia ia ko honatou Hau.—Lau ia Mateo 25:31-33, 46.

Ko te pule ʼa Sesu ʼi tona ʼuhiga Hau, ʼe ina fakaliliu anai ia te kele ko he palatiso. ʼE ina fakatuʼuake anai te kau mate ke feala hanatou maʼuʼuli ʼo fiafia ʼi te Palatiso fakakelekele.—Lau ia Gaue 24:15.

Kapau ʼe kotou fia maʼu he tahi ʼu fakamahino, vakaʼi te pasina 73 ki te 85 ʼo te tohi ʼaeni neʼe ta e te kau Fakamoʼoni ʼa Sehova

ʼE feala ke kotou toe toʼo ʼi te tuʼasila ʼaeni ʼi te Neti www.pr418.com/wls

[Paki ʼo te pasina 16]

ʼE foaki anai e Sesu ki te malamanei he puleʼaga ʼe lelei

[Paki ʼo te pasina 16]