HEʼEKI faʼa fualoa ki ai, neʼe fai e te tagata fekumi ia he sivi mai te kau tupulaga ʼe toko 800 ʼe natou kau ki te ʼu lotu ʼe 15 tupu. Neʼe ina fakalavelave age pe ʼe natou manatu ʼe tali e Sesu ia te ʼu faikole. Teitei pe ko te toko 60 ki te teau neʼe natou tui papau ki te faʼahi ʼaia. Koia, ko te tupulaga e tahi neʼe ina molehi ia te higoa ʼo Sesu ʼi te sivi ʼaia kaʼe neʼe ina tohi “ ʼAtua.”

Kotea ia takotou manatu? ʼE tonu koa ke tou fakahagahaga ʼatatou faikole kia Sesu peʼe ki te ʼAtua? * Moʼo tali ki te faʼahi ʼaia, tou vakaʼi age muʼa pe ʼe kotea ʼae neʼe akoʼi e Sesu ki ʼana tisipulo ʼo ʼuhiga mo te faikole.

Neʼe mole pe akoʼi tatou e Sesu kaʼe neʼe ina toe fakaha mai pe ʼe fakahagahaga kia ai ʼatatou faikole.

TANA FAIAKONAKI: ʼI te kole fenei age e he tahi ʼo ʼana tisipulo kia Sesu: “Aliki, ako mai kia matou te faikole,” neʼe tali fenei age Sesu: “Ka kotou faikole, pea kotou ui: Tamai!” (Luka 11:1, 2) Pea tahi, ʼi tana Akonaki ʼi te Moʼuga neʼe ina fakalotomalohiʼi te hahaʼi ke natou faikole. Neʼe ina ui fenei: “Faikole ki tau Tamai.” Neʼe toe foaki e Sesu ia te fakalotofimalie ʼaeni: “E iloi e tokotou Tamai te mea ae e aoga kia koutou, i mua o takotou kole kia ia.” (Mateo 6:6, 8) ʼI te po fakaʼosi ʼo tana ʼi te kele, neʼe ui fenei e Sesu ki ʼana tisipulo: “Ko te mea ae e kotou kole anai ki te Tamai, e ina foaki atu anai ia kia koutou i toku huafa.” (Soane 16:23) Neʼe akoʼi mai kia tatou e Sesu ke tou faikole ki tana Tamai pea mo tatatou Tamai, ia Sehova ʼAtua.—Soane 20:17.

TANA FAʼIFAʼITAKI: ʼO mulimuli ki te faʼahi ʼae neʼe ina akoʼi, neʼe faikole fenei ia Sesu: “E au fakavikiviki kia te koe [ʼi muʼa ʼo te hahaʼi], Tamai, Aliki o te lagi mo te kele.” (Luka 10:21) Koʼeni te tahi faigamalie: “Nee hiki leva e Sesu ona mata ki oluga, o ui: Tamai, e au fakafetai kia koe koteuhi nee ke tali taku kole.” (Soane 11:41) ʼI tana lolotoga tugaki, neʼe faikole fenei: “Tamai, e au tuku atu toku laumalie ki ou nima.” (Luka 23:46) ʼI tana faikole ki tana Tamai—te “Aliki o te lagi mo te kele”, neʼe tuku mai e Sesu ia he faʼifaʼitaki lelei kia tatou fuli ke tou muliʼi. (Mateo 11:25; 26:41, 42; 1 Soane 2:6) Neʼe mahino feafeaʼi ʼana ʼuluaki tisipulo ki ʼana fakatotonu?

Hili te ʼu vahaʼa ʼo te toe liliu ʼa Sesu ki te lagi, neʼe gaohi koviʼi pea mo fakatagaʼi ʼana tisipulo e ʼonatou fili. (Gaue 4:18) ʼE moʼoni, neʼe natou kumi tokoni ʼi te faikole. Kaʼe ko ai ʼae neʼe natou kumi tokoni ki ai? “Nee natou hiki ake leva ki te Atua onatou leo,” ʼo natou faikole “i te huafa o [tana] tagata faifekau maonioni ko Sesu.” (Gaue 4:24, 30) Koia, neʼe mulimuli ʼana tisipulo ki te ʼu fakatotonu ʼa Sesu. Neʼe natou faikole ki te ʼAtua kaʼe mole kia Sesu.

Hili ni taʼu ki muli age, neʼe talanoa ia te apositolo ko Paulo ki te faʼahiga faikole ʼa ia pea mo ʼona tehina. Neʼe faitohi fenei ki ʼona tehina Kilisitiano: “E ma fakafetai ki te Atua, te Tamai o totatou Aliki ko Sesu-Kilisito, pea e mole toe gata tama faikole o uhiga mo koutou.” (Kolose 1:3) Neʼe toe faitohi ia Paulo ki ʼona tehina ke natou “fakafetai tuumau ki te Atua te Tamai i te u mea fuli, i te huafa o totatou Aliki ko Sesu-Kilisito.” (Efeso 5:20) ʼAki ʼana palalau ʼaia, ʼe tou mahino ai neʼe fakalomalohiʼi e Paulo ʼihi ke natou faikole  ki “te Atua te Tamai i te u mea fuli” kaʼe ʼe tonu ke fai ʼi te huafa ʼo Sesu.—Kolose 3:17.

Ohage ko te ʼu ʼuluaki Kilisitiano, ʼe feala ke tou fakaha totatou ʼofa ʼae kia Sesu ʼaki tatatou muliʼi ʼana tokoni ʼo ʼuhiga mo te faikole. (Soane 14:15) Kapau ʼe tou faikole ki tatatou Tamai ʼae ʼe ʼi selo pea kia ia tokotahi, ʼe tou tui papau anai ʼe fagono ia Sehova ki ʼatatou faikole pea ʼe tou hage anai ko te tagata faipesalemo. Ia Pesalemo 116:1, 2 ʼe ui fenei ai: “E au ofa [kia Sehova], koteuhi e logo ia ia, ki toku leo . . . E au fetapa anai kia ia i toku mauli katoa.” *