ʼE Mole Ko He Mahino Hala Pe Koa?
Neʼe sio te kiʼi taʼahine ki he kohu ʼe hake ake mai he fale gaue ʼo mafola pea liliu ʼo matolu ohage he ʼao. Neʼe manatu te kiʼi taʼahine ʼe ko he fale gaue faʼu ʼao. Ko te faihala la ʼaia ʼa te kiʼi taʼahine, ʼe feala ke tou fekataʼi ai. Kaʼe ʼe ʼi ai ʼihi faihala ʼe feala ke fakatupu tuʼutamaki. Ohage la ka tou lau hala te ʼu mataʼi tohi ʼo te ʼu tasini foʼi ʼakau, ʼe feala ke fua kovi kia tatou.
Kaʼe ʼe kovi age la moka ʼe tou mahino hala ʼi te faʼahi fakalaumalie. Ohage la, neʼe mahino hala ʼihi hahaʼi ki te ʼu akonaki ʼa Sesu. (Soane 6:48-68) ʼO natou situʼa ai kia Sesu pea mole natou maʼu ai he ʼu ako mai ia te ia. ʼI ʼanatou faihala leva.
ʼE ke lau koa te Tohi-Tapu ke ke maʼu ai he takitaki? ʼE ko he faʼahi ia ʼe lelei. Kaʼe, ʼe tonu ke ke tokaga he ʼe feala pe ke ke mahino hala ki he ʼu manatu ʼe ke lau. Neʼe hoko te aluʼaga ʼaia ki te tokolahi. Tou vakaʼi te ʼu faʼahiga mahino hala ʼe tolu ʼe tautau hoko.
-
Ko ʼihi ʼe mahino hala ki te fakatotonu Fakatohi-tapu ʼaeni: “Manavasiʼi ki te ʼAtua moʼoni.” He ʼe natou manatu ʼe tonu ke tou matataku ki te ʼAtua. (Tagata Tanaki 12:13, MN) Kaʼe ʼe loto e te ʼAtua kia natou ʼae ʼe atolasio age ke ʼaua naʼa natou matataku kia te ia. He ʼe ina ui fenei: “Aua naa ke mataku ki he mea, koteuhi e au nofo mo koe; aua naa ke feaveaki ni mata tuania, koteuhi ko au ko tou Atua; e au fakamalohii ia koe, e au hau o tokoni kia koe.” (Esaia 41:10) Koia ko te fakaʼuhiga ʼo te manavasiʼi ki te ʼAtua, ʼe ko hatatou fakaʼapaʼapa lahi mo loloto kia te ia.
-
ʼE pulihi anai koa te kele ʼaki he afi?
Ko ʼihi ʼe mahino hala ki te ʼu palalau ʼaeni neʼe tohi ʼaki te takitaki ʼa te ʼAtua: “Kia meʼa fuli ʼe ’i ai tona temi kua fakatuʼutuʼu ki ai, . . . ko he temi ki te tupu pea mo he temi ki te mate.” ʼI tanatou manatu, kua fakatuʼutuʼu pe e te ʼAtua ia te temi ʼae ka mate ai te tagata takitokotahi. (Ekelesiasi 3:1, 2) Kaʼe, ʼi tona fakahagatonu, ʼe talanoa te vaega ʼaeni ki te agaaga ʼo te maʼuli pea ʼe fakaha lelei ai ʼe tou tofiga fuli ki te mate. ʼE tou toe ako ʼi te Tohi-Tapu ʼe ʼi ai te ʼu nunuʼa ʼo ʼatatou tonu ki te loaloaga ʼo totatou maʼuli. Ohage la, ʼe tou lau fenei: “Ko te manavasiʼi kia Sehova ʼe ina hilifaki anai he ’u ʼaho.” (Taʼaga Lea 10:27, MN; Pesalemo 90:10; Esaia 55:3) ʼO feafeaʼi? Ohage la, kapau ʼe tou fakaʼapaʼapa ki te Folafola ʼa te ʼAtua, ʼe ʼekenaki ai tatou ke mole tou inu kava fakavale peʼe ke mole tou fai te ʼu aga heʼe ʼaoga.—1 Kolonito 6:9, 10.
-
Ko te ui ʼae ʼi te Tohi-Tapu, ko te lagi mo te kele kua “taʼofi ki te afi,” ʼe manatu ai ʼihi ʼe pulihi anai e te ʼAtua ia totatou nofoʼaga te kele. (2 Petelo 3:7) Kaʼe ʼe fakapapauʼi mai e te ʼAtua ʼe mole ina fakagafua anai ʼi he temi ke pulihi te kele. “Nee . . . fakatuu [e te ʼAtua] te kele i ona fakatafito, e mole gaugaue anai ia ia i he aho.” (Pesalemo 104:5; Esaia 45:18) ʼE ko te malama fakahehema ʼaeni ʼae ka pulihi anai ʼo talu ai ohage pe ʼe tutu ʼi he afi, kaʼe ʼe mole pulihi anai te kele. ʼO ʼuhiga leva mo te lagi, ʼe feala ke fakaʼuhiga ki te ʼatulaulau peʼe ko te ʼafioʼaga ʼo te ʼAtua. Pea ʼe mole pulihi anai te ʼu potu ʼaia.
HE KOʼE ʼI ʼIHI TEMI ʼE TOU MAHINO HALA KI TE TOHI-TAPU?
Ohage pe ko te ʼu faʼifaʼitaki ʼae neʼe tou vakaʼi, ko te tokolahi ʼe mahino hala ki te ʼu vaega ʼae ʼe natou lau ʼi te Tohi-Tapu. Kaʼe he koʼe ʼe tuku e te ʼAtua ke hoko te aluʼaga ʼaia? ʼE lagi manatu fenei ʼihi: ʻKapau ko te ʼAtua ʼe poto mo ina iloʼi ia meʼa fuli, neʼe feala pe ke ina foaki mai he tohi ʼe faigafua tona faʼahiga tohi pea mo tasilo ki te hahaʼi fuli. Kaʼe he koʼe koa neʼe mole ina fai te faʼahi ʼaia?’ Tou vakaʼi te ʼu tupuʼaga ʼe tolu ʼe tau mahino hala ai te hahaʼi ki te Tohi-Tapu.
-
Neʼe tohi te Tohi-Tapu ke mahino ki ai te kau agavaivai pea mo natou ʼae ʼe loto lelei ke natou ako. Neʼe ui fenei e Sesu ki tana Tamai: “Tamai, ʼAliki ʼo te lagi pea mo te kele, ʼe au fakavikiviki Luka 10:21) Neʼe tohi te Tohi-Tapu ke mahino ki ai ia natou pe ʼae ʼe natou maʼu he manatu ʼe lelei ki te logo ʼae ʼe tuʼu ai. ʼI te agamahani, ʼe mahino hala te hahaʼi ʼae ʼe fiatuʼu ki te Tohi-Tapu, pea ʼe ko he agaaga ʼaia ʼo ʼihi ʼo “te kau popoto pea mo te kau ʼatamai.” Kaʼe ko te hahaʼi ʼae ʼe natou lau te Tohi-Tapu ʼaki he agavaivai mo he fia ako moʼoni ohage ko “natou liliki,” ʼe mahino lelei anai ki te logo ʼo te ʼAtua. ʼE ha lelei te poto ʼo te ʼAtua ʼi te faʼahiga tohi ʼo te Tohi-Tapu.
kia te koe ia muʼa ʼo te hahaʼi, koteʼuhi neʼe ke fufu fakalelei te ʼu meʼa ʼaeni ki te kau popoto pea mo te kau ʼatamai, kaʼe neʼe ke fakaha kia natou liliki.” ( -
Neʼe fakahagahaga te Tohi-Tapu ki te hahaʼi ʼae ʼe natou kole fakamalotoloto ke tokoni age te ʼAtua ke natou mahino ki te Tohi-Tapu. Neʼe iloʼi e Sesu ʼe ʼaoga anai ki te hahaʼi ia he tokoni ke natou mahino katoa ki ʼana akonaki. Kaʼe ʼe natou maʼu feafeaʼi anai te tokoni ʼaia? Neʼe fakamahino fenei e Sesu: “Ko te tokoni, ia te laumalie maʼoniʼoni, ʼae ka foaki atu anai e te Tamai ʼi toku huafa, ʼe ina akoʼi atu anai kia koutou ia meʼa fuli.” (Soane 14:26) ʼE ha mai ai, ko te ʼAtua pe ʼae ʼe ina foaki tona laumalie maʼoniʼoni, ia tona malohi gaue, ki te hahaʼi ke natou mahino ki te ʼu manatu ʼae ʼe natou lau ʼi te Tohi-Tapu. Kaʼe ʼe mole foaki e te ʼAtua ia tona laumalie ki te hahaʼi ʼae ʼe mole falala ki tana tokoni, pea koia la ʼae ʼe mole natou mahino ai ki te Tohi-Tapu. ʼE toe uga e te laumalie maʼoniʼoni ia he kau Kilisitiano faiva ke natou tokoni kia natou ʼae ʼe fia mahino lelei age ki te Tohi-Tapu.—Gaue 8:26-35.
-
Ko ʼihi vaega Tohi-Tapu ʼe hoki mahino anai ki ai te hahaʼi ʼi tona temi tonu. Ohage la ko te polofeta ko Taniela, neʼe fakatotonu age ke ina tohi he ʼu folafola ʼo ʼuhiga mo te ka haʼu. Neʼe ui fenei e he ʼaselo kia ia: “Taniela, taupau fakafufu te u folafola aeni, pea ke fakamau te tohi o kaku ki te temi fakamuli.” Lolotoga ni sekulo, neʼe lau e te tokolahi ia te tohi ʼo Taniela ʼi te Tohi-Tapu, kaʼe neʼe mole natou mahino ki ai. ʼO feia pe la mo Taniela, neʼe mole mahino ki ʼihi folafola ʼae neʼe ina tohi. He neʼe ina ui fenei ʼaki he lotovaivai: “Nee au logo leva, kae nee mole au mahino.” ʼE moʼoni ia, ʼe hoki mahino lelei anai te hahaʼi ki te ʼu lea fakapolofeta ʼa te ʼAtua ʼae neʼe tohi e Taniela ʼi te temi ʼae kua fakatuʼutuʼu ki ai te ʼAtua. Neʼe fakamahino fenei age e te ʼaselo: “Alu, Taniela, koteuhi e taofi fakafufu anai te u folafola aeni pea e fakamau anai natou o kaku ki te temi fakaosi.” Kaʼe ko ai ʼae ka mahino anai ki te ʼu logo ʼa te ʼAtua? “E mole pe . . . mahihino [te kau agatuu] ki he mea, kae e mahihino anai natou ae e atamai.” (Taniela 12:4, 8-10) Koia ʼae ʼe hoki fakaha pe anai e te ʼAtua ia te fakaʼuhiga ʼo ʼihi vaega Tohi-Tapu ʼi tona temi totonu.
Neʼe kua hoko koa he mahino hala ʼi te kau Fakamoʼoni ʼa Sehova ki te Tohi-Tapu? ʼEi. Kaʼe kapau ʼe tonu ke fetogi e te ʼAtua he fakamahino, ʼe tali lelei e te kau Fakamoʼoni te fetogi ʼaia. ʼE natou tui papau, ʼe natou faʼifaʼitakiʼi te ʼu apositolo ʼa Kilisito, ʼae neʼe natou fetogi tanatou faʼahiga manatu ʼi te temi fuli pe neʼe fakatonutonuʼi ai natou e Sesu.—Gaue 1:6, 7.
Ko te manatu ʼa te kiʼi taʼahine ʼo ʼuhiga mo te ʼu ʼao, neʼe ko hana faihala pe. Kaʼe ko te ʼu ako ʼae ʼe foaki mai ʼi te Tohi-Tapu, ʼe maʼuhiga ʼaupito age kia koe. Ko te Tohi-Tapu ʼe maʼuhiga fau, koia ʼae ʼe ʼaoga ai ki te tagata he tokoni he ʼe mole feala ke mahino tokotahi. ʼE lelei hau kumi tokoni ke ke mahino ki te ʼu manatu ʼae ʼe ke lau. Kumi ia natou ʼae ʼe natou ako te Tohi-Tapu ʼaki he agavaivai, te hahaʼi ʼae ʼe falala ki te laumalie ʼo te ʼAtua ke natou mahino ki te Tohi-Tapu. Peʼe ko natou ʼae ʼe tui papau ʼe tou maʼuʼuli nei ʼi te temi ʼae ʼe loto e te ʼAtua ke tou mahino lelei age ki te Tohi-Tapu. ʼAua tau fakatuatuai te palalau mo te kau Fakamoʼoni ʼa Sehova peʼe ko tau alu ki tonatou tuʼasila ʼi te Neti jw.org. ʼE fakapapau fenei mai ʼi te Tohi-Tapu: “Kapau e ke kole te poto . . . , e ke mau anai te iloilo o te Atua.”—Taaga Lea 2:3-5.