Neʼe au tupu ʼi te kolo hahaʼi ʼo Paddington ʼi Londres, ʼi Pilitania. Neʼe au maʼuli mo taku faʼe mo ʼoku kiʼi tehina lalahi ʼe toko tolu. Ko taku tamai neʼe tahitahiga tana nofo ʼi fale koteʼuhi neʼe lahi tana inu kava.

ʼI taku kei veliveli, neʼe akoʼi mai e taku faʼe ke au faikole ʼi te po fuli. Neʼe ʼi ai taku kiʼi Tohi-Tapu neʼe ko te ʼu Pesalemo pe. Pea neʼe au fai ʼona fasi ke au hiva te ʼu Pesalemo. ʼE kei au manatuʼi taku lau te tohi ʼe ui fenei ai: “ ʼE mole toe ʼi ai anai he ka haʼu.” ʼUhi ko te ʼu palalau ʼaia, neʼe mole au moe ʼi te ʼu poʼuli kaʼe au fakakaukauʼi te ka haʼu. ʼI taku manatu, ʻʼe lagi ʼi ai pe he tahi age meʼa ʼi te maʼuli. Pe ʼe koʼe ʼe au ʼi heni?’ Neʼe mole au fia mate.

Neʼe au fia iloʼi meʼa fuli leva ʼo ʼuhiga mo te ʼu meʼa fakatemonio. Pea neʼe au faiga ke au palalau mo te kau mate, neʼe matou olo ʼo haʼele ʼi te ʼu tanuma mo ʼoku kaumeʼa pea mo matou sioʼi te ʼu ʼata fakatemonio. Neʼe ko he ʼu aluʼaga neʼe matou fiafia ai pea neʼe matou toe matataku ai foki.

ʼI toku taʼu hogofulu neʼe au kamata agatuʼu pea kamata ai taku suluka. Pea neʼe au fakaʼaogaʼi leva te toloke ʼae ko te marijuana. ʼI toku taʼu 11, neʼe au kamata inu kava. Logo la neʼe au fehiʼa ki te kava, kaʼe neʼe au leleiʼia taku konahia. Neʼe au manako ki te musika mo te meʼe. Neʼe au alu ki te ʼu fakafiafia fuli mo te ʼu fale meʼe. Neʼe au mavae ʼi fale ʼi te poʼuli, pea hoki au tolotolo mai ʼi te kei hegihegi. Pea ʼi toku gaʼegaʼe, neʼe au to ako tuʼumaʼu ai. Neʼe au toe inu kava pe ʼi te fale ako.

Neʼe kovi ʼoku nota ʼi te taʼu fakaʼosi ʼo taku ako. ʼI te iloʼi e taku faʼe ʼoku nota, neʼe mahino ai ki te ʼu meʼa kovi fuli ʼae neʼe au fai pea neʼe lotomamahi mo ita ai. Neʼe ma ke pea neʼe au hola ai ʼi toku ʼapi. Lolotoga he temi, neʼe ma nonofo mo te tama ʼe higoa ko Tony pea neʼe ko te Rasta. Neʼe ko he tama kaihaʼa mo agamalohi pea neʼe ina fakatau te toloke. Pea neʼe mole faʼa fualoa ki ai, neʼe au faitama leva. Neʼe au fanauʼi tamā kiʼi tamasiʼi tagata kaʼe neʼe ko toku taʼu 16 pe ʼaia.

Neʼe hoki au felaveʼi mo te kau Fakamoʼoni ʼa Sehova ʼi taku nofo ʼi te nofoʼaga ʼo natou ʼae ʼe fanau taka pea mo faigataʼaʼia.  Neʼe au maʼu toku koga fale ʼuhi ko te ʼu selevisi fakasosiale. Pea neʼe ʼaʼahi ʼihi ʼo tomatou nofoʼaga e te ʼu fafine Fakamoʼoni ʼa Sehova ʼe toko lua. ʼI te tahi ʼaho, neʼe au kau ʼi tanatou faipalalau. He neʼe au fia fakaha age ʼe faihala te ʼu fafine Fakamoʼoni. Kaʼe neʼe nā tali fakavaivai pea mo tasilo ki ʼaku fehuʼi fuli ʼaki te Tohi-Tapu. Neʼe malave kia au tanā agalelei mo agamalū. Koia neʼe au tali ai ke nā fai haku ako Tohi-Tapu.

Neʼe mole fualoa, pea au ako ʼi te Tohi-Tapu ia te manatu neʼe fetogi ai toku maʼuli. Neʼe au tuʼania te mate talu mai taku kei veliveli. Kaʼe ʼi te temi leva ʼaeni kua au iloʼi ia te akonaki ʼa Sesu ʼo ʼuhiga mo te fakatuʼuake. (Soane 5:28, 29) Neʼe au toe ako ko Sehova ʼe tokaga mai kia au. (1 Petelo 5:7) Pea neʼe malave tafito kia au te ʼu palalau ʼaeni ʼa Selemia 29:11: “Koteuhi e ui e [Sehova], e au iloi te u fakatuutuu ae kua au fai kia koutou, ko te u fakatuutuu o te tokalelei kae mole ko te malaia, o tupu ke foaki kia koutou he apogipogi mo he amanaki lelei.” Neʼe au kamata tui ai, ʼe feala ke au maʼu te ʼamanaki ki te maʼuli heʼe gata ʼi he Palatiso ʼi te kele.—Pesalemo 37:29.

Neʼe fakaha mai e te kau Fakamoʼoni ʼa Sehova ia tanatou ʼoʼofa ia au. ʼI taku ʼuluaki kau ki ʼanatou fono, neʼe au logoʼi ai he lotomafana mo te agalelei ʼa natou. (Soane 13:34, 35) Neʼe kehekehe ʼosi mo toku fakatalitali ʼi tomatou ʼekelesia. Logo la te ʼu aluʼaga ʼae neʼe au nofo ai, kaʼe neʼe fakatalitali leleiʼi au e te kau Fakamoʼoni ʼa Sehova. Neʼe natou foaki mai tonatou temi, mo tokakaga kia au pea mo tokoni mai. Neʼe hage kia au kua au kau ki he foʼi famili fonu ʼi te ʼofa.

ʼAki taku ako te Tohi-Tapu, neʼe au mahino ai ʼe tonu ke au fetogi toku maʼuli ke alu tahi mo te ʼu lekula maʼoluga ʼa te ʼAtua. Neʼe faigataʼa kia au te tuku ʼo taku suluka. Pea neʼe ʼi ai mo te ʼu musika ka au fakalogo pea neʼe tupu ai taku toe fia toʼo te toloke, koia neʼe au fetogi ai te musika ʼae neʼe au leleiʼia. Neʼe au fakagata ia taku alu ki te ʼu fakafiafia mo te ʼu fale meʼe, he neʼe au fia tuku taku inu kava. Pea neʼe au kumi hoku ʼu kaumeʼa foʼou ʼe tologa ai toku maʼuli foʼou.—Taaga Lea 13:20.

ʼI te temi ʼaia, neʼe toe ako e Tony ia te Tohi-Tapu mo te kau Fakamoʼoni ʼa Sehova. He ʼe ʼi te tali ʼa te kau Fakamoʼoni ʼa Sehova ki ʼana fehuʼi ʼaki te Tohi-Tapu, neʼe tui ai ʼe moʼoni te ʼu manatu ʼae neʼe ina ako. Neʼe ina fai ai te ʼu toe fetogi ʼaeni ʼi tona maʼuli: neʼe ina liakī ʼona kaumeʼa ʼafeā ʼae neʼe agamalohi, neʼe mole kei kaihaʼa pea neʼe mole kei ina fakaʼaoga te toloke. Pea ʼuhi ko tamā fia fakafiafiaʼi ia Sehova, neʼe ma mahino ai ʼe tonu ke ma ʼohoana pea mo ma foaki ki tamā kiʼi tama ia he faʼahiga maʼuli ʼe fiafia. Koia neʼe ma ʼohoana leva ʼi te taʼu 1982.

ʼE au manatuʼi, neʼe au fai te ʼu fekumi ʼi Te ʼu Tule Leʼo pea mo te ʼu Réveillez-vous ! * Neʼe au fia lau te ʼu alatike ʼo natou ʼae neʼe tatau ʼonatou aluʼaga pea mo au kaʼe neʼe natou lavaʼi te fetogi ʼo tonatou maʼuli. Neʼe au lotomalohi ʼi ʼonatou faʼifaʼitaki. Koia neʼe au faiga malohi ai ʼo hoko atu te ʼu fetogi ʼi toku maʼuli. Neʼe au faikole tuʼumaʼu kia Sehova ke tokoni mai. Pea neʼe ma papitema leva mo Tony ʼi Sulio 1982.

ʼI taku kua maʼu he ʼu felogoʼi lelei mo Sehova ʼAtua, neʼe haofaki ai toku maʼuli. Neʼe toe sio ia Tony ki te lagolago ʼa Sehova ʼi te ʼu temi faigataʼa. Neʼe ma ako ke ma falala ki te ʼAtua ʼi te ʼu ʼahiʼahi pea neʼe ma logoʼi tuʼumaʼu ia tana tokoni mo tana tokaga ʼae ki toma kiʼi famili.—Pesalemo 55:23.

Neʼe au fiafia ʼi te akoʼi ʼo tamā kiʼi tama mo tamā kiʼi taʼahine ke nā iloʼi ia Sehova. Pea kua au toe fiafia ʼi te temi nei, he ʼe kua toe tuputupu mo ʼanā fanau ʼi te moʼoni ʼo ʼuhiga mo te ʼAtua.

ʼI te temi nei, kua au moe lelei ʼi te poʼuli pea ʼe mole kei au tuʼania te ka haʼu mo te mate. ʼE ma ʼaʼahi mo Tony ʼi te vahaʼa fuli te ʼu kokelekasio kehekehe ʼo te kau Fakamoʼoni ʼa Sehova ʼo fakalotomalohiʼi natou. ʼE ma toe kaugā olo mo natou ʼo akoʼi ki te hahaʼi ʼe feala tanatou tui kia Sesu pea mo natou maʼu te maʼuli heʼe gata.