Neʼe au lahi ake ʼi Puerto Limón, ko he kolo ʼe tuʼu ʼi te potu esite ʼo Costa Rica. Neʼe matou toko valu pea neʼe au tuʼulaga fitu. Neʼe mate taku tamai kaʼe au taʼu valu. Pea neʼe taupau tokotahi matou ʼe tamatou faʼe.

Neʼe maʼuhiga tuʼumaʼu kia au te base-ball. Neʼe au leleiʼia te faigaoʼi ʼaia talu mai taku kei veliveli. ʼI taku kei tupulaga, neʼe au kau ki he foʼi gaoʼi. Ki muli age ʼi toku taʼu 20 tupu, neʼe ʼi ai te tagata neʼe ina kole mai ke au kau ʼi te foʼi gaoʼi ʼa Nicaragua. Ko te tagata ʼaia ʼae ʼe fealuʼaki ʼo kumi ia natou ʼae ʼe faiva ʼi he faigaoʼi. Kaʼe neʼe mole au fia maʼuli ʼi Nicaragua. Kotea tona tupuʼaga? Koteʼuhi neʼe mahaki kovi taku faʼe pea neʼe ko au ʼae neʼe tokaga ki ai. Koia, neʼe au fakafisi ai. Ki muli age, neʼe toe fakaafe au e te tahi tagata ke au alu ʼo gaoʼi ʼi te foʼi gaoʼi base-ball ʼa Costa Rica pea ko ʼihi kau faigaoʼi neʼe hage pe ko au. Neʼe au tali te fakaafe ʼaia. Pea neʼe au kau ki te foʼi gaoʼi ʼaia talu mai te taʼu 1949 ki te taʼu 1952. Neʼe au alu ʼo gaoʼi ʼi Cuba, mo Mexique pea mo Nicaragua. Neʼe ko au ko he tama gaoʼi base-ball lelei. Neʼe mole pe la au fai haku hala ʼe tahi ʼi te ʼu gaoʼi ʼe 17 hoholo ʼae neʼe au kau ai. ʼEi, neʼe au fiameʼameʼa moka au logo ʼe kalagaʼi toku higoa e te hahaʼi.

Neʼe au toe fai he ʼu aga heʼe ʼaoga ʼi toku maʼuli. Logo la neʼe ko taku kiʼi fafine pe ʼe tahi, kaʼe neʼe ʼi ai mo taku tahi ʼu fafine. Neʼe au toe inu kava foki. ʼI te tahi ʼaho, ʼi taku kua konahia kovi neʼe mole au iloʼi pe la pe neʼe feafeaʼi taku alu ki toku ʼapi. Koteʼuhi neʼe au ala ake kua au moe ʼi toku palepale. Neʼe au toe gaoʼi paʼaga foki.

ʼI te temi ʼaia, neʼe kua liliu taku faʼe ko te Fakamoʼoni ʼa Sehova. Pea neʼe faiga ke au ako te moʼoni kaʼe ʼi te kamata neʼe mole ʼi ai hona fua. Koteʼuhi neʼe kei malohi ʼosi pe taku manako ki taku faigaoʼi. Kapau neʼe au faigaoʼi ʼi te ʼu temi kai, neʼe mole au fia kai au. Neʼe au tokaga tafito pe au ki te faigaoʼi. Neʼe au leleiʼia te base-ball ʼo laka age ia meʼa fuli.

Kaʼe ʼi toku taʼu 29, neʼe au lavea kovi ʼi taku hapo te foʼi fiti polo ʼi tamatou tahi gaoʼi. ʼI taku ʼosi malolo mahaki, neʼe au fa kagata ai taku gaoʼi. Kaʼe neʼe au ako pe leva ʼihi kau faigaoʼi ʼe ovi mai kio ʼoku.

ʼI te taʼu 1957, neʼe au tali te fakaafe ki te fakatahi lahi ʼa te kau Fakamoʼoni ʼa Sehova neʼe fai ʼi te malaʼe faigaoʼi ʼae neʼe au gaoʼi ai. ʼI taku heka fakatahi mo te nofoʼaki, neʼe au tokagaʼi ai te kehekehe ʼo te aga fakaʼapaʼapa ʼa te kau Fakamoʼoni ʼa Sehova mo te logoaʼa ʼa te hahaʼi ʼae ʼe mamata ki te base-ball. ʼI taku sio ki te faʼahi ʼaia, neʼe ʼekenaki ai au ke au kamata haku ako Tohi-Tapu mo te kau Fakamoʼoni pea ke au kau ki ʼanatou fono.

Neʼe au punamaʼuli ʼosi ki te ʼu faʼahi ʼae neʼe au ako ʼi te Tohi-Tapu. Ohage la, neʼe fakakikite e Sesu ʼi te ʼu ʼaho fakamuli, ʼe fakamafola anai e ʼana tisipulo te logo lelei ʼo te Puleʼaga ʼo te ʼAtua ʼi te malamanei katoa. (Mateo 24:14) Neʼe au toe ako ʼe mole totogi te gaue faifakamafola ʼa te kau Kilisitiano moʼoni. Neʼe ui fenei e Sesu: “Neʼe kotou maʼu noa, kotou foaki noa.”—Mateo 10:8.

ʼI taku ako te Tohi-Tapu, neʼe au fakatatau te ʼu faʼahi ʼae ʼe ui ʼi te Tohi-Tapu mo ʼae neʼe au sio ki ai ʼi te kau Fakamoʼoni ʼa Sehova. Neʼe au leleiʼia ʼanatou faiga malohi ʼae ke natou fakamafola te logo lelei ʼo te Puleʼaga ʼo te ʼAtua ʼi te malamanei katoa. Neʼe au sio ki tanatou loto foaki ohage pe ko tona fakatotonu e Sesu ki te kau Kilisitiano. Koia, ka au lau ia Maleko 10:21 pea mo tokagaʼi te fakaafe ʼa Sesu “Haʼu ʼo mulimuli mai ia te au,” neʼe au fia liliu ai ko he Fakamoʼoni.

Kaʼe, neʼe ʼaoga kia au he temi ke au fetogi toku maʼuli. Ohage la, lolotoga ni taʼu neʼe au gaoʼi paʼaga ʼi te vahaʼa fuli. Kaʼe neʼe au ako ʼi te Tohi-Tapu ko te ʼAtua ʼe ina tauteaʼi ia natou ʼae ʼe tauhi ki “te ’atua ʼo te Lasio,” ohage ko ni hahaʼi manumanū. (Isaia 65:11, MN; Kolose 3:5) Koia, neʼe au fakatotonu ai ke au fakagata te gaoʼi paʼaga. ʼI te ʼuluaki ʼAhotapu pe hili taku fakagata te gaoʼi paʼaga, neʼe ko toku foʼi numelo ʼae neʼe malo. Neʼe vaʼi au e te hahaʼi ʼi taku mole gaoʼi paʼaga ʼi te vahaʼa ʼaia pea neʼe natou fakaneke malohi au ke au toe alu ʼo gaoʼi paʼaga. Kaʼe neʼe au fakafisi. Neʼe mole au toe liliu ai ʼo gaoʼi paʼaga.

Neʼe au toe tau mo te tahi ʼahiʼahi ʼo ʼuhiga mo toku “ ʼulugaaga foʼou.” Neʼe hoko te aluʼaga ʼaia ʼi te ʼaho tonu pe ʼae neʼe au papitema ai ʼi te fakatahi lahi ʼa te kau Fakamoʼoni ʼa Sehova. (Efeso 4:24) ʼI te afiafi, neʼe au liliu ki te otele ʼae neʼe au nofo ai. Neʼe au maʼu atu ki ai taku kiʼi fafine ʼae neʼe ma ʼuluaki fakatahi ʼe tuʼu mai ʼi tuʼa ʼi toku koga fale. Neʼe ina ui fenei mai: “Haʼu ke ta momoe, Sammy.” Kaʼe neʼe au foimo tali fenei age ki ai: “ ʼOho ia.” Neʼe au fakamanatuʼi age kua au mulimuli ki te ʼu pelesepeto ʼo te Tohi-Tapu. (1 Kolonito 6:18) Neʼe leʼo lahi fenei mai: “Kotea koa?” Pea neʼe ina meʼa noaʼi te manatu ʼa te Tohi-Tapu ʼo ʼuhiga mo te aga heʼe ʼaoga. Neʼe faiga mai ke ma toe fakatahi. Kaʼe, neʼe au ulu ki toku koga fale ʼo kalaviʼi mai te matapa. Ia ʼaho nei, ʼe au fiafia ʼi te ui neʼe au liliu ko he Fakamoʼoni ʼi te taʼu 1958 he neʼe au agatonu ʼo fetogi katoa te ʼu faʼahi ʼae neʼe au fai ʼi toku maʼuli.

Ka na pau la neʼe feala, ʼe au tohi anai te ʼu lelei ʼae neʼe au maʼu ʼi taku fakalogo ki te ʼu tokoni ʼo te Tohi-Tapu. Ohage la, ia ʼaho nei kua maʼu ʼoku kaumeʼa lelei, kua ʼi ai he ʼuhiga moʼoni ʼo toku maʼuli pea ʼe au fiafia moʼoni.

Neʼe kei au leleiʼia pe ia te base-ball, kaʼe ʼe mole kei au fakamaʼuhigaʼi ʼi toku maʼuli. ʼI taku gaoʼi ʼi te base-ball neʼe au iloa pea neʼe au maʼu paʼaga ai kaʼe neʼe mole tologa te ʼu faʼahi ʼaia. Kaʼe, ko ʼaku felogoʼi mo te ʼAtua mo te fale tau tehina mo tuagaʼane ʼae ʼe au kau ai, ʼe heʼe gata ia. ʼE ui fenei ʼi te Tohi-Tapu: “ ʼE puli anai te malamanei pea mo ʼona holi, kaʼe ko ia ʼae ʼe ina fai te finegalo ʼo te ʼAtua ʼe nofo anai ia ʼo talu ai.” (1 Soane 2:17) Ia ʼaho nei, ʼe au ʼofa ia Sehova ʼAtua pea mo tana hahaʼi ʼo laka age ia meʼa fuli.