HISITOLIA 1
Te ʼu Meʼa ʼAē ʼe Kamata Fakatupu e Te ʼAtua
KO MEʼA lelei fuli ʼaē ʼe tou maʼu ʼe haʼu mai te ʼAtua. Neʼe ina fakatupu te laʼā ke ina foaki mai kia tatou te mālama ʼi te ʼaho, pea ko te māhina pea mo te ʼu fetuʼu ke nātou foaki mai te mālama ʼi te pōʼuli. Pea neʼe fakatupu e te ʼAtua te kele maʼa tatou ke tou maʼuʼuli ai.
Kae ko te laʼā, te māhina, te ʼu fetuʼu pea mo te kele neʼe mole ko te ʼu ʼuluaki meʼa ʼaia ʼaē neʼe fakatupu e te ʼAtua. ʼE koutou ʼiloʼi koa pe koteā te ʼu meʼa ʼaē neʼe ina ʼuluaki fakatupu? Neʼe ʼuluaki fakatupu e te ʼAtua te ʼu laumālie ohage pe ko ia. ʼE mole feala hatatou sisio ki te ʼu laumālie ʼaia, ohage pe ko te mole feala ʼaē ke tou sio ki te ʼAtua. ʼI te Tohi-Tapu ʼe fakahigoaʼi te ʼu laumālie ʼaia ko te kau ʼaselo. Neʼe fakatupu e te ʼAtua te kau ʼaselo ke nātou maʼuʼuli mo ia ʼi te lagi.
Ko te ʼuluaki ʼaselo ʼaē neʼe fakatupu e te ʼAtua neʼe makehe ʼaupito. Neʼe ko te ʼuluaki Foha ʼo te ʼAtua, pea neʼe gāue ia mo tana Tāmai. Neʼe tokoni ki te ʼAtua moʼo fakatupu ia meʼa fuli. Neʼe tokoni ki te ʼAtua ki te fakatupu ʼo te laʼā, te māhina, te ʼu fetuʼu pea mo totatou kele.
Ka neʼe feafeaʼi koa te kele? ʼI te kamataʼaga neʼe mole feala ke maʼuli he tahi ʼi te kele. Neʼe mole maʼu ai he meʼa, kae gata pe ki te moana lahi neʼe ina ʼaofi te kele katoa. Kae neʼe loto e te ʼAtua ke maʼuli te hahaʼi ʼi te kele. Koia neʼe ina kamata teuteuʼi ai te ʼu meʼa maʼa tatou. Koteā te meʼa ʼaē neʼe ina fai?
ʼUluaki, neʼe ʼaoga ke mālamagia te kele. Koia neʼe fakamālama ai e te ʼAtua te kele ʼaki te mālama ʼo te laʼā. Neʼe ina fai ke ʼi ai he pōʼuli pea mo he ʼaho. ʼOsi ʼaia pea neʼe fakamafuta e te ʼAtua te kele ke māʼoluga ake ʼi te moana.
ʼI te kamata neʼe mole ʼi ai he meʼa ʼi te kele. Neʼe hage pe te kele ko te meʼa ʼaē ʼe koutou sisio kiai ʼi te paki ʼaenī. Neʼe mole ʼi ai he ʼu fisiʼi teu peʼe ko he ʼu fuʼu ʼakau peʼe ko he ʼu manu. Neʼe mole ʼi ai pe la he ʼu ika ʼi te moana. Neʼe lahi ʼaupito te ʼu gāue ʼaē neʼe kei toe ke fai e te ʼAtua moʼo fakaliliu ʼo te kele ko he koga meʼa ʼe lelei ʼaupito ke maʼuʼuli ai te ʼu manu pea mo te hahaʼi.