KOUTOU sisio ki te kele ʼi te paki ʼaenī! ʼI matalelei leva ʼo te ʼu meʼa fuli ʼaenī! ʼE koutou sisio ki te vao pea mo te ʼu fuʼu ʼakau, te ʼu fisiʼi teu pea mo te ʼu manu fuli. ʼE koutou sisio koa ki te alefani pea mo te ʼu laione?

Neʼe tupu feafeaʼi koa te ʼōloto taulekaleka ʼaia? Tou vakaʼi pe neʼe feafeaʼi te teuteuʼi e te ʼAtua te kele maʼa tatou.

ʼUluaki, neʼe fakatupu e te ʼAtua te vao moʼo ʼaofi ʼo te kele. Pea neʼe ina fakatupu te ʼu fuʼu ʼakau liliki kehekehe, pea mo te ʼu vao matuʼa pea mo te ʼu fuʼu ʼakau. Neʼe homo te ʼu meʼa ʼaia moʼo fakamataleleiʼi ʼo te kele. Kae ʼe mole gata ʼaki pe tonatou ʼaoga ʼaia. ʼE lahi te ʼu fuʼu ʼakau ʼe nātou foaki mai te ʼu fuaʼi ʼakau ʼe kano lelei ʼaupito.

Ki muli age neʼe fakatupu e te ʼAtua te ʼu ika ʼi te tai pea mo te ʼu manulele ʼi te lagi. Neʼe ina fakatupu te ʼu kuli, te ʼu pusi pea mo te ʼu hōsi; te ʼu manu lalahi pea mo te ʼu manu liliki. Ko te ʼu manu fea ʼaē ʼe koutou maʼu? ʼE mole tonu koa la ke tou fiafia ʼi te fakatupu e te ʼAtua te ʼu meʼa fuli ʼaia maʼa tatou?

Pea, neʼe gaohi e te ʼAtua te potu ʼo te kele ko he koga meʼa ʼe makehe ʼaupito. Neʼe ina fakahigoaʼi te potu ʼaia ko te ʼōloto ʼo Eteni. Neʼe ko he koga meʼa haohaoa. Ko meʼa fuli ʼi te koga meʼa ʼaia neʼe matalelei. Pea neʼe loto te ʼAtua ke liliu te kele katoa ohage ko te ʼōloto matalelei ʼaia ʼaē neʼe ina gaohi.

Kae koutou toe sioʼi muʼa te paki ʼo te ʼōloto ʼaia. ʼE koutou ʼiloʼi koa pe koteā te meʼa ʼaē neʼe fakatokagaʼi e te ʼAtua ʼe mole maʼu ai? Tou vakaʼi muʼa.