HISITOLIA 20
ʼE Hoko Te Tuʼutāmaki Kia Tina
ʼE KOUTOU sio koa ki te ʼu taʼahine ʼaē ʼe ʼalu ki ai ia Tina? ʼE ʼalu ia ʼo ʼaʼahi te ʼu taʼahine ʼaē ʼe nonofo ʼi te fenua ʼo Kanaane. Neʼe fiafia koa tana matuʼa ko Sakopo ʼi tana fai te faʼahi ʼaia? Moʼo tali ki te fehuʼi ʼaia, tou manatuʼi te meʼa ʼaē neʼe ʼui e Apalahamo pea mo Isaake ʼo ʼuhiga mo te ʼu fafine ʼo Kanaane.
Neʼe loto koa ia Apalahamo ke ʼohoana tona foha ko Isaake mo he taʼahine Kanaane? Kailoa. Neʼe loto koa ia Isaake pea mo Lepeka ke ʼohoana tanā tama ko Sakopo mo he taʼahine Kanaane? Kailoa. ʼE koutou ʼiloʼi pe koteā tona tupuʼaga?
Koteʼuhi neʼe tauhi te hahaʼi ʼo Kanaane ki te ʼu ʼatua loi. Neʼe mole feala ke nātou ʼohoana mo te ʼu hahaʼi ʼaia, pea neʼe mole lelei hanatou fakakaugā mo nātou. Koia ʼe tou ʼiloʼi papau ai neʼe mole leleiʼia e Sakopo te fakakaugā ʼo tona ʼofafine mo te ʼu taʼahine ʼaia ʼo Kanaane.
Kae ohage ko te meʼa ʼaē neʼe tou ʼui, neʼe hoko te tuʼutāmaki kia Tina. ʼE koutou sio koa ʼi te paki ki te tama Kanaane ʼaē ʼe ina sioʼi ia Tina? Ko tona higoa ko Sisemi. ʼI te tahi ʼaho neʼe ʼalu ia Tina ki tona ʼu kaufafine, pea neʼe toʼo e Sisemi ia Tina pea ina fakamālohiʼi ke nā momoe fakatahi. Neʼe kovi te meʼa ʼaia, koteʼuhi ʼe gata pe ki te tagata mo te fafine kua ʼosi ʼohoana ʼe feala ke nā momoe fakatahi. Ko te meʼa kovi ʼaia ʼaē neʼe fai e Sisemi kia Tina neʼe iku ai ki te tuʼutāmaki lahi.
ʼI te logo ʼo te ʼu tokolua ʼo Tina ki te meʼa ʼaē neʼe hoko kia ia, neʼe nātou ʼiʼita ʼaupito ai. Ko te toko lua ia nātou, ko Simeone pea mo Levi, ʼi te lahi fau ʼo tonā ʼiʼita, neʼe nā toʼo te ʼu heletā pea neʼe nā ʼolo ki te kolo pea neʼe nā ʼohofi fakapunamaʼuli te hahaʼi tagata. Ko nāua pea mo ʼonā ʼu tēhina neʼe nātou matehi ia Sisemi pea mo te ʼu tagata fuli ʼo te kolo. Neʼe ʼita ai ia Sakopo ʼuhi ko te meʼa kovi ʼaia neʼe fai e tona ʼu foha.
He koʼe neʼe hoko te fai fakapō ʼaia? Neʼe hoko ʼuhi ko te fakakaugā ʼa Tina mo te hahaʼi ʼaē ʼe mole fakalogo ki te ʼu lao ʼa te ʼAtua. ʼE mahino ia ʼe mole tou fia fakakaugā anai mo te faʼahiga hahaʼi ʼaia.