HISITOLIA 21
ʼE Fehiʼaʼinaʼi Ia Sosefo e Tona ʼu Tēhina
ʼE KOUTOU sio ki te lotomamahi pea mo te loto heʼe ʼamanaki ʼo te tama. Ko te tama ʼaia ko Sosefo. Neʼe fakatau ia ia e tona ʼu tēhina ki te ʼu tagata ʼe ʼolo ki Esipito. ʼE liliu anai ia Sosefo ko te tagata popūla ʼi te fenua ʼaia. He koʼe neʼe fai e tona ʼu tēhina te meʼa kovi ʼaia? Koteʼuhi neʼe nātou maheka kia Sosefo.
Ko tanatou tāmai ko Sakopo neʼe ʼofa mamahi kia Sosefo. Neʼe ina fakahā tona ʼofa ʼaē kia ia ʼo ina fai tona pulupulu matalelei. ʼI te sio ʼo tona ʼu tēhina e toko 10 ki te ʼofa mamahi ʼo Sakopo kia Sosefo, neʼe nātou maheka ai pea mo fehihiʼa kia Sosefo. Kae neʼe ʼi ai foki te tahi tupuʼaga ʼo tanatou fehihiʼa kia ia.
Neʼe ʼi ai te ʼu moemisi e lua ʼa Sosefo. ʼI tana ʼu moemisi ʼaia e lua neʼe sio ia ʼe tulolo ʼona ʼu tēhina ʼi ʼona muʼa. ʼI te fakamatala age e Sosefo tana ʼu moemisi ʼaia ki tona ʼu tēhina, neʼe toe ʼāsili age ai tonatou ʼiʼita.
ʼI te tahi ʼaho neʼe leʼoleʼo ai e te ʼu tēhina ʼo Sosefo te ʼu ōvi ʼo tanatou tāmai, pea neʼe ʼui age e Sakopo kia Sosefo ke ʼalu ʼo fakasiosio peʼe nātou lelei pe. ʼI te sio ʼo te ʼu tēhina ʼo Sosefo ki tana haʼu, neʼe ʼui e ʼihi ia nātou: ‘Tou matehi ia ia!’ Kae neʼe ʼui age e Lupeni, ʼaē ko tonatou taʼokete: ‘ ʼAua naʼa koutou fai te faʼahi ʼaia!’ ʼO mole nātou matehi ia Sosefo kae nātou lī ia ia ki te luo ʼo te vai keli neʼe kua magemage. Pea nātou nonofo ki lalo ʼo fakatuʼutuʼu pe koteā te meʼa ʼaē ka nātou fai anai ki ai.
ʼI te temi ʼaia neʼe tau mai te fagona ʼo te ʼu tagata Isimaelite. Neʼe ʼui fēnei e Suta ki tona ʼu tēhina: ‘Tou fakatau ia ia ki te kau Isimaelite.’ Pea neʼe nātou fai te meʼa ʼaia. Neʼe nātou fakatau ia Sosefo ki te ʼu foʼi piesi siliva e 20. Neʼe kovi pea mo heʼeʼofa te aga ʼaē neʼe nātou fai!
Koteā koa te meʼa ka fakamatala anai e te fale tautēhina ki tanatou tāmai? Neʼe nātou matehi te tao pea nātou fufuʼi te pulupulu matalelei ʼo Sosefo ki te toto ʼo te manu. Pea nātou ʼave tona pulupulu ki tanatou tāmai pea mo nātou ʼui fēnei: ‘Neʼe mātou maʼu te meʼa ʼaenī. Sio muʼa kiai, pea ke vakaʼi peʼe mole ko te pulupulu ʼaē ʼo Sosefo.’
Neʼe sio ia Sakopo ki te pulupulu ʼaia. ‘Ko he lagi manu fekai ʼaē neʼe ina matehi ia Sosefo,’ ko tana kalaga ʼaia. Pea neʼe ko te meʼa tonu ʼaia ʼaē neʼe loto ia te ʼu tēhina ʼo Sosefo ke manatu kiai tanatou tāmai. Neʼe lotomamahi ʼaupito ia Sakopo. Neʼe tagi ia ʼi te ʼu ʼaho loaloaga. Kae neʼe mole heʼeki mate ia Sosefo. Tou vakaʼi muʼa pe koteā te meʼa ʼaē neʼe hoko ki ai ʼi Esipito.