ʼE KOUTOU sio ki te meʼa ʼaē ʼe hoko! ʼE faoʼi e Moisese tona tokotoko ki te Tai Kula. Ko te hahaʼi ʼaē ʼe tutuʼu mo ia ʼi te tahi kauvai ʼe ko te kau Iselaelite. Kae kua malelemo ia Falaone pea mo tana kautau ʼi te tai. Tou vakaʼi muʼa pe neʼe hoko feafeaʼi te meʼa ʼaia.

Ohage ko te meʼa kua tou talanoa kiai, neʼe ʼui e Falaone ki te kau Iselaelite ke nātou mavae ʼi Esipito ʼi te ʼosi fakahoko e te ʼAtua te 10 tautea ki te kau Esipito. Neʼe ko te toko 600 000 tagata Iselaelite neʼe mavae, ʼo kau ai mo te ʼu fafine pea mo te ʼu tamaliki. Koia, ko te hahaʼi fuli ʼaē neʼe tui kia Sehova, neʼe nātou ʼolo mo te kau Iselaelite. Neʼe nātou ʼave tanatou ʼu ōvi mo tanatou ʼu tao pea mo tanatou faga pipi.

ʼI muʼa ʼo tanatou mavae, neʼe kole e te kau Iselaelite ki te kau Esipito he ʼu mutuʼi meʼa pea mo he ʼu meʼa aulo pea mo he ʼu meʼa siliva. Neʼe matataku ʼaupito te kau Esipito, ʼuhi ko te tautea fakaʼosi ʼaē neʼe hoko kia nātou. Koia neʼe nātou foaki age ai ki te kau Iselaelite te ʼu meʼa fuli ʼaē neʼe nātou kole age.

Hili pe he ʼu kiʼi ʼaho, pea kaku te kau Iselaelite ki te Tai Kula. Neʼe nātou mālōlō ai. ʼI te temi ʼaia, kua fakahemala ia Falaone pea mo tana ʼu tagata ʼi tanatou fakagafua ʼaē ke mavae te kau Iselaelite. Neʼe nātou ʼui fēnei: ‘Neʼe tou tuku tatatou ʼu hahaʼi kaugana ke ʼolo!’

Pea neʼe toe fetogi ai te tonu ʼa Falaone. Neʼe ina foimo teuteuʼi tana saliote pea mo tana kautau. Pea neʼe ina tuli ia te kau Iselaelite mo tana ʼu saliote makehe e 600, pea mo ʼihi age saliote ʼo Esipito.

ʼI te sio ʼa te kau Iselaelite kia Falaone pea mo tana kautau ʼe muli mai ia nātou, neʼe nātou matataku ʼaupito. Neʼe mole ʼi ai he faʼahi ke nātou feholaki kiai. Ko te Tai Kula neʼe haga mai kia nātou, pea ko te kau Esipito ʼe ʼōmai mai muli. Kae neʼe fakatupu e Sehova te ʼao moʼo fakavaha ʼo tana hahaʼi mo te kau Esipito. Koia neʼe mole feala ai ke sisio te kau Esipito ki te kau Iselaelite pea mo nātou tauʼi ia nātou.

Pea neʼe ʼui age e Sehova kia Moisese ke ina faoʼi tona tokotoko ki te Tai Kula. ʼI tana fai te faʼahi ʼaia, neʼe faka agi e Sehova te matagi mālohi mai te potu hahake. Neʼe vaheʼi lua ai te tai, pea neʼe tuʼu te tai ʼi te ʼu faʼahi e lua.

Pea neʼe kamata fakalaka ai te kau Iselaelite ʼi te tai ʼaē kua moamoa. Neʼe loaloaga te temi ʼaē neʼe fakalaka ai te toko lauʼi miliona hahaʼi mo tanatou ʼu faga manu fuli ki te tahi kauvai. Pea kua feala te sisio ʼa te kau Esipito ki te kau Iselaelite. Kua feholaki tanatou ʼu kaugana! Koia neʼe nātou fakatau mai ki te tai ʼo tuli ia nātou.

ʼI tanatou fai te faʼahi ʼaia, neʼe haga ia Sehova ʼo toʼo te ʼu teka ʼo tanatou ʼu saliote. Neʼe matataku ʼaupito te kau Esipito pea neʼe nātou kalaga fēnei: ‘Ko Sehova ʼe tau maʼa te kau Iselaelite ʼo fakafeagai kia tatou. Tou feholaki!’ Kae neʼe kua tauhala.

ʼI te temi ʼaia neʼe ʼui age e Sehova kia Moisese ke ina faoʼi tona tokotoko ki te Tai Kula, ohage ko takotou sio kiai ʼi te paki. Pea ʼi te fai e Moisese te meʼa ʼaia, neʼe mapeʼe ifo ai te tai, ʼo moū ai te kau Esipito pea mo tanatou ʼu saliote. Ko te kautau fuli ʼaē neʼe nātou tuli te kau Iselaelite neʼe nātou moū ʼi te loto tai. Pea neʼe mole hāo he tahi ʼi te kau Esipito!

ʼI toe fiafia lahi leva ʼaē neʼe maʼu e te hahaʼi fuli ʼa te ʼAtua ʼi tonatou hāofaki! Pea neʼe hivaʼi e te hahaʼi tagata te hiva fakafetaʼi kia Sehova, ʼo nātou ʼui fēnei: ‘Kua maʼu e Sehova te mālo faka kolōlia. Neʼe ina lī ki te tai te ʼu hōsi pea mo te ʼu tagata heka hōsi.’ Neʼe muli mai ia Miliame te tokolua ʼo Moisese mo tana kiʼi nafa, pea mo te hahaʼi fafine fuli mo tanatou ʼu kiʼi nafa. Pea neʼe nātou meʼe fakafiafia, ʼo nātou toe hiva te hiva ʼaē neʼe hivaʼi e te hahaʼi tagata: ‘Kua maʼu e Sehova te mālo faka kolōlia. Neʼe ina lī ki te tai te ʼu hōsi pea mo te ʼu tagata heka hōsi.’