HISITOLIA 22
ʼE ʼAve Ia Sosefo ʼo Pilisoniʼi
NEʼE taʼu 17 ia Sosefo ʼi te temi ʼaē neʼe ʼave ai ki Esipito. ʼI te fenua ʼaia neʼe fakatau ai ia ia ki te tagata ko Potifale. ʼE gāue ia Potifale ki te hau ʼo Esipito, ʼaē ʼe fakahigoaʼi ko Falaone.
Neʼe gāue kinakina ia Sosefo ki tona pule, ʼaē ko Potifale. Koia ʼi te katoa ʼo tona tagata, neʼe fakanofo e Potifale ia ia ke pule ki tona ʼapi katoa. Kae he koʼe ʼe pilisoniʼi ia Sosefo? ʼUhi ko te ʼohoana ʼo Potifale.
ʼI te kua katoa te tagata ʼo Sosefo neʼe ko te tagata talavou, pea neʼe fia momoe te ʼohoana ʼo Potifale mo ia. Kae neʼe ʼiloʼi e Sosefo ko te meʼa ʼaia ʼe kovi, pea neʼe mole ina fai. Neʼe ʼita ʼaupito ai te ʼohoana ʼo Potifale. Koia ʼi te tau mai ʼo tona ʼohoana, neʼe ina fakatupu te loi ʼo ʼui maʼana: ‘Neʼe faigaʼi e Sosefo ke ma momoe!’ Neʼe tui ia Potifale ki tona ʼohoana, pea neʼe ʼita ʼaupito ai kia Sosefo. Koia neʼe ina ʼave ai ʼo pilisoniʼi.
Neʼe mole tuai te mahino ʼa te tagata pule ʼo te fale pilisoni, ko Sosefo ʼe ko te tagata agalelei. Koia neʼe ina hinoʼi ia ia ke ina leʼoleʼo te kau pilisoni. Ki muli age neʼe ʼita ia Falaone ki tana tagata ʼaē ʼe tokaga ki tana meʼa ʼinu pea mo tana tagata taʼo pane, pea neʼe ina ʼave ia nāua ʼo pilisoniʼi. ʼI te tahi po, neʼe nā tahi fai tanā moemisi makehe, kae ʼe mole nā ʼiloʼi te faka ʼuhiga ʼo tanā moemisi. ʼI te ʼaho ake neʼe ʼui age e Sosefo kia nāua: ‘Fakamatala mai takolua ʼu moemisi.’ Pea neʼe nā fakamatala age kia Sosefo, pea ʼaki te tokoni ʼa te ʼAtua neʼe fakamahino age e Sosefo kia nāua te faka ʼuhiga ʼo tanā ʼu moemisi.
Ki te tagata ʼaē ʼe tokaga ki te meʼa ʼinu, neʼe ʼui fēnei e Sosefo: ‘ ʼE kei toe pe ʼaho e tolu pea ʼe ke mavae anai ʼi te fale pilisoni, pea ʼe toe foaki atu anai e Falaone tau gāue.’ Pea toe ʼui maʼa Sosefo: ‘Ka ke mavae anai, palalau kia Falaone ʼo ʼuhiga mo ʼau, pea ke tokoni mai ke feala haku mavae ʼi te fale pilisoni ʼaenī.’ Kae ki te tagata taʼo pane, neʼe ʼui age e Sosefo: ‘ ʼE kei toe pe ʼaho e tolu pea ʼe tuʼusi anai tou ʼulu e Falaone.’
Hili pe ʼaho e tolu pea neʼe hoko te ʼu palalau ʼa Sosefo. Neʼe tuʼusi e Falaone te ʼulu ʼo te tagata taʼo pane. Kae ki te tagata ʼaē ʼe tokaga ki te meʼa ʼinu, neʼe ina fakamavae ʼi te fale pilisoni, pea neʼe hoko atu tana gāue ki te hau. Kae neʼe mole kei manatuʼi e te tagata ʼaē ʼe tokaga ki te meʼa ʼinu te meʼa ʼaē neʼe ʼui age e Sosefo! Neʼe mole palalau ia kia Falaone ʼo ʼuhiga mo ia, pea neʼe haga nofo aipe ia Sosefo ʼi te fale pilisoni.