HISITOLIA 16
ʼE Maʼu e Isaake Tona ʼOhoana Lelei
ʼE KOUTOU ʼiloʼi koa pe ko ai te fafine ʼaē ʼe tuʼu ʼi te paki ʼaenī? ʼE higoa ko Lepeka. Pea ko te tagata ʼaē ʼe felāveʼi mo ia ʼe ko Isaake. ʼE liliu anai ia Lepeka ko tona ʼohoana. Neʼe hoko feafeaʼi te faʼahi ʼaia?
Neʼe loto ia Apalahamo, te tāmai ʼa Isaake, ke maʼu he ʼohoana lelei ʼo tona foha. Neʼe mole loto ia ke ʼohoana ia Isaake mo he fafine ʼi Kanaane, koteʼuhi neʼe tauhi te hahaʼi ʼaia ki te ʼu ʼatua loi. Koia neʼe pāuiʼi ai e Apalahamo tana tagata kaugana pea ina ʼui age: ‘ ʼE ʼau loto ke ke ʼalu ki te koga meʼa ʼaē ʼe nofo ai toku ʼu kāiga ʼi Halane pea ke ke maʼu mai ai he ʼohoana ʼo toku foha ko Isaake.’
Ko te tagata kaugana ʼa Apalahamo neʼe ina toʼo te ʼu kamelo e hogofulu pea neʼe loaloaga tona fagona. ʼI tana kaku atu ki te koga meʼa ʼaē neʼe nonofo ai te ʼu kāiga ʼo Apalahamo, neʼe tuʼu ia ʼi te vai keli. Neʼe ko te afiafi, te temi ʼaē ʼe ʼolo ai te ʼu fafine ʼo te kolo ʼo ʼohu vai ʼi te vai keli. Koia neʼe faikole ai te tagata kaugana ʼa Apalahamo kia Sehova ʼo fēnei: ‘Ke liliu te fafine ʼaē ka ina foaki mai anai he moʼi vai maʼa ʼaku pea mo te ʼu kamelo, ko ia ʼaē ka ke fili ke ʼohoana mo Isaake.’
Mole tuai pea haʼu ia Lepeka ʼo ʼohu vai. ʼI te kole age ʼa te tagata kaugana hana moʼi vai ke ʼinu, neʼe ina foaki age tana moʼi vai. ʼOsi ʼaia pea ʼalu ʼo ʼohu vai moʼo faka ʼinu ʼo te ʼu kamelo fuli. Neʼe ko he gāue kinakina koteʼuhi ʼe lahi te vai ʼe ʼinu e te ʼu kamelo.
ʼI te ʼosi fai e Lepeka ia te faʼahi ʼaia, neʼe fehuʼi age e te tagata kaugana ʼa Apalahamo te higoa ʼo tana tāmai. Tahi ʼaē meʼa, neʼe ina kole age peʼe feala hana nofo ʼi te pōʼuli ʼi tonatou ʼapi. Neʼe ʼui maʼana: ‘Ko taku tāmai ko Petuele, pea ʼe ʼi ai te kogafale ʼi tomatou ʼapi ke ke moe ai.’ Neʼe ʼiloʼi e te tagata kaugana ʼa Apalahamo, ko Petuele ʼe ko te foha ʼo te tēhina ʼo Apalahamo ʼaē ko Naole. Koia neʼe tuʼutuli aipe ʼo fakamālo kia Sehova ʼi tana taki mai ia ia ki te ʼu kāiga ʼo Apalahamo.
ʼI te po ʼaia neʼe tala age e te tagata kaugana ʼa Apalahamo kia Petuele pea mo Lapane te tokolua ʼo Lepeka te tupuʼaga ʼo tana haʼu. Neʼe nā lotolelei ke ʼalu ia Lepeka mo ia ʼo ʼohoana mo Isaake. Koteā te meʼa neʼe ʼui e Lepeka ʼi te kole ʼaē neʼe fai ʼo ʼuhiga mo ia? Neʼe ina ʼui, ‘Ei,’ ʼe ʼau fia ʼalu. Koia ʼi te ʼaho ake neʼe nā ʼolo ai ʼi te ʼu kamelo pea neʼe loaloaga tonā fagona ʼaē ki Kanaane.
ʼI tanā kaku atu, neʼe ko te afiafi. Neʼe sio ia Lepeka ki te tagata ʼe haʼele ʼi te tuvao. Neʼe ko Isaake. Neʼe fiafia ia ʼi tana sio ʼaē kia Lepeka. Neʼe mate tana faʼe ko Sala kua hili kiai taʼu e tolu, pea ʼe kei hoko atu pe tona lotomamahi ʼo ʼuhiga mo te faʼahi ʼaia. Kae ʼi te temi nei kua lahi ʼaupito te ʼofa ʼo Isaake kia Lepeka, pea kua toe fiafia.