KOUTOU sio muʼa ki te famili lahi ʼaenī. Ko te ʼu foha ʼaia e toko 12 ʼo Sakopo. Pea neʼe ʼi ai foki mo tona ʼu ʼofafine. ʼE koutou ʼiloʼi koa te ʼu higoa ʼo tana ʼu tamaliki? Tou vakaʼi muʼa tonatou ʼu higoa.

Neʼe fānauʼi e Lea ia Lupeni, mo Simeone, mo Levi pea mo Suta. ʼI te sio ʼa Lasele ʼe mole hana fānau, neʼe lotomamahi ʼaupito ia. Koia neʼe ina foaki ai tana fafine faifekau ko Pilea kia Sakopo, pea neʼe fānauʼi e Pilea te ʼu tama e toko lua ko Tani pea mo Nefetali. Pea neʼe toe foaki e Lea tana fafine faifekau ko Silipa kia Sakopo, pea neʼe fānauʼi e Silipa ia Kate pea mo Asea. Neʼe toe maʼu e Lea tana ʼu tama e toko lua ko Isakale pea mo Sapulo.

Ki muli age, neʼe maʼu leva e Lasele te tamasiʼi. Neʼe ina fakahigoa ko Sosefo. Ki muli mai ʼe lahi anai te ʼu meʼa ʼaē ka tou ako ʼo ʼuhiga mo Sosefo, koteʼuhi neʼe liliu ia ko he tahi ʼe maʼuhiga ʼaupito. Ko te ʼu foha ʼaia e toko 11 ʼo Sakopo ʼi tana kei nofo mo Lapane te tāmai ʼa Lasele.

Neʼe toe ʼi ai foki mo te ʼu ʼofafine ʼo Sakopo, kae ʼe fakahā e te Tohi-Tapu te higoa ʼo te taʼahine pe e tahi. ʼE higoa ko Tina.

Kua hoko leva te temi ʼaē kua fakatotonu ai e Sakopo ke mavae ʼi te ʼapi ʼo Lapane ʼo liliu ki Kanaane. Koia neʼe ina fakatahitahiʼi ai tona famili pea mo tana faga ōvi pea mo tana faga manu, pea kamata ai tonatou fagona.

ʼI te fagona ʼaia ʼa Sakopo pea mo tona famili ki Kanaane, neʼe fānauʼi e Lasele te tahi tama. Ko te meʼa ʼaia neʼe hoko ʼi te temi ʼaē neʼe nātou fagona ai. Neʼe faigataʼa ʼaupito kia Lasele te temi faifānau, pea neʼe mate ia ʼi tana fānauʼi tana tamasiʼi. Kae neʼe hāo te kiʼi tamasiʼi. Neʼe fakahigoaʼi e Sakopo te tamasiʼi ko Pesamino.

ʼE tonu ke tou manatuʼi te ʼu higoa ʼo te ʼu foha e toko 12 ʼo Sakopo, koteʼuhi ko te puleʼaga ʼo Iselaele katoa ʼe haʼu mai ia nātou ʼaia. ʼI tona fakahagatonu, neʼe fakahigoaʼi te ʼu telepi e 12 ʼo Iselaele ʼaki te ʼu higoa ʼo te ʼu foha e toko 10 ʼo Sakopo pea mo te ʼu foha e toko lua ʼo Sosefo. Neʼe maʼuli fualoa ia Isaake ʼi te ʼosi tupu ʼo tana ʼu tamaliki, pea ʼe mahino ia neʼe fiafia ʼi te kaugamālie ʼo tona ʼu mokopuna. Kae tou vakaʼi muʼa te meʼa ʼaē neʼe hoko ki tona mokopuna ʼaē ko Tina.