HISITOLIA 18
ʼE ʼAlu Ia Sakopo Ki Halane
ʼE KOUTOU ʼiloʼi koa pe ko ai te ʼu tagata ʼaē ʼe palalau mo Sakopo? ʼI te hili ʼo tona fagona loaloaga, neʼe felāveʼi ia Sakopo mo nātou ʼi te vai keli. Neʼe nātou lolotoga gaohi tanatou ʼu ōvi. Neʼe fehuʼi age e Sakopo: ‘ ʼE koutou ʼōmai maifea?’
Neʼe nātou ʼui age: ‘Mai Halane.’
Pea fehuʼi age e Sakopo: ‘ ʼE koutou ʼiloʼi ia Lapane?’
Pea nātou tali age: ‘Ei, sio, koʼeni tona ʼofafine ko Lasele ʼe haʼu mo tana faga ōvi.’ ʼE koutou sio koa ki te haʼu ʼaē ʼa Lasele?
ʼI te sio ʼa Sakopo ki te haʼu ʼaē ʼa Lasele mo te faga ōvi ʼa tana faʼetagata ko Lapane, neʼe ina toʼo te foʼi maka ʼaē neʼe pupunu ʼaki te vai keli ke feala ai he ʼiʼinu ʼa te ʼu ōvi. Pea neʼe ʼuma ia Sakopo kia Lasele pea ina fakahā age tona higoa. Neʼe fiafia ʼaupito ia Lasele, pea neʼe ʼalu ki tona ʼapi ʼo fakahā ki tana matuʼa ko Lapane.
Neʼe loto ia Lapane ke nofo ia Sakopo ʼi tona ʼapi. Pea ʼi te kole age e Sakopo ke ʼohoana mo Lasele, neʼe fiafia ia Lapane. Kae neʼe ʼui age e Lapane ke gāue ʼi tana gāueʼaga ia taʼu e fitu pea hoki ʼohoana leva mo Lasele. ʼI te lahi ʼaupito ʼo te ʼofa ʼa Sakopo kia Lasele, neʼe ina fai ai te faʼahi ʼaia. Kae ʼi te hoko mai ʼo te temi ʼohoana, ʼe koutou ʼiloʼi pe koteā te meʼa ʼaē neʼe hoko?
Neʼe foaki e Lapane tona ʼuluaki ʼofafine ʼaē ko Lea ke ʼohoana mo Sakopo, kae mole ina foaki age ia Lasele. ʼI te tali e Sakopo ke toe gāue kia Lapane ʼi te tahi ʼu taʼu e fitu, neʼe toe foaki age ai e Lapane ia Lasele ke ʼohoana mo ia. ʼI te ʼu temi ʼaia neʼe fakagafua e te ʼAtua ki te hahaʼi tagata ke nātou ʼohoana mo he ʼu fafine e tokolahi. Kae ʼi te temi nei, ohage ko tona fakahā ʼi te Tohi-Tapu, ʼe tonu ke ʼohoana he tagata mo he fafine pe e tahi.