HISITOLIA 56
Ko Saulo—Te ʼUluaki Hau ʼo Iselaele
KOUTOU sio kia Samuele ʼe ina liligi te lolo ki te ʼulu ʼo te tagata. Ko te meʼa ʼaia ʼaē neʼe nātou fakaʼaogaʼi moʼo fakahā ʼo ia ʼaē neʼe fili ke hau. Neʼe ʼui age e Sehova kia Samuele ke ina liligi te lolo ki te ʼulu ʼo Saulo. Neʼe ko he lolo makehe pea mo magoni.
Neʼe manatu ia Saulo ʼe mole tau mo feʼauga ke hau. Neʼe ina ʼui age kia Samuele: ‘ ʼE ʼau haʼu mai te telepi ʼo Pesamino, ko te telepi veliveli tokotahi ʼaia ʼo Iselaele. He koʼe koa ʼe ke ʼui ʼe ʼau hau anai?’ Neʼe ʼofa ia Sehova kia Saulo koteʼuhi neʼe mole fialahi pea mo fia hā. Ko te tupuʼaga la ʼaia ʼo tona fili ʼaē ke hau.
Kae neʼe mole masiva ia Saulo peʼe ko he tagata neʼe mole faʼa maʼuhiga. ʼE haʼu ia mai te famili koloaʼia, pea neʼe ko he tama neʼe talavou ʼaupito pea neʼe lahi. Neʼe lahi age ia ʼi te hahaʼi fuli ʼo Iselaele! Tahi ʼaē meʼa, neʼe gaholo ʼi te lele, pea neʼe ko he tagata mālohi ʼaupito. Neʼe fiafia te hahaʼi ʼi te fili ʼaē e Sehova ke hau ia Saulo. Neʼe nātou kalaga fuli ʼo nātou ʼui fēnei: ‘Ke maʼuli loaloaga te hau!’
Ko te ʼu fili ʼo Iselaele kua toe ʼāsili age tonatou mālohi. Neʼe nātou toe fakatupu te tokakovi lahi ki te kau Iselaelite. ʼI te ʼosi fakanofo hau ʼo Saulo, neʼe ʼōmai te kau Amonite ʼo tauʼi ia Iselaele. Kae neʼe tānaki e Saulo te kautau lahi, pea neʼe nātou mālo ʼi te kau Amonite. ʼAki te meʼa ʼaia neʼe fiafia ai te hahaʼi ʼi te fakanofo ʼo Saulo ke hau.
ʼI te hoholo ʼo te ʼu taʼu, neʼe lahi te ʼu tau neʼe mālo ai ia Saulo mo te kau Iselaelite ʼi tonatou ʼu fili. Neʼe ʼi ai foki mo te foha lototoʼa ʼo Saulo neʼe higoa ko Sonatane. Pea neʼe tokoni ia Sonatane ki Iselaele ke mālo ʼi te ʼu tau. Neʼe kei fakafeagai te kau Filisitini ki te kau Iselaelite. ʼI te tahi ʼaho neʼe ʼōmai te kau Filisitini ʼe toko lauʼi afe ʼo tauʼi te kau Iselaelite.
Neʼe ʼui age e Samuele kia Saulo ke talitali ke haʼu ʼo momoli he sakilifisio, peʼe ko he mōlaga kia Sehova. Kae neʼe tuai mai ia Samuele. Neʼe mataku ia Saulo ki te kau Filisitini naʼa nātou ʼohofi ia nātou, koia neʼe ina momoli totonu ai te sakilifisio. Pea ʼi te tau mai ʼa Samuele, neʼe ina ʼui age kia Saulo kua talagataʼa ia. Neʼe ʼui age e Samuele: ‘ ʼE fili anai e Sehova he tahi kehe ke liliu ko te hau ʼo Iselaele.’
Ki muli age neʼe toe talagataʼa ia Saulo. Pea ʼui age e Samuele ki ai: ‘ ʼE lelei age hakita talagafua kia Sehova ʼi hakita foaki ki ai te ōvi ʼaē ʼe lelei age. ʼUhi ko tau talagataʼa ʼaē kia Sehova, ʼe mole taupau anai koe e Sehova ke ke hau ki Iselaele.’
ʼE ʼi ai te ʼaoga ʼo te hisitolia ʼaia kia tatou. ʼE ina fakahā mai ʼe maʼuhiga ke tou fakalogo tuʼumaʼu kia Sehova. Tahi ʼaē meʼa, ʼe ina fakahā mai ko he tahi ʼe agalelei, ohage ko Saulo, ʼe feala ke fetogi tana aga ʼo liliu ko he tahi ʼe agakovi. ʼE mahino ia ʼe mole tou fia liliu ko he tahi ʼe agakovi.