HISITOLIA 68
Ko Te ʼu Tamaliki e Lua Neʼe Toe Fakatuʼuake
KAPAU kua koutou mate, koteā anai te meʼa ʼaē ka logoʼi e takotou faʼe mo kapau ʼe koutou toe maʼuli mai? ʼE fiafia ʼaupito anai! Kae ʼe feala koa ki he tahi kua mate ke toe fakatuʼuake? Neʼe kua hoko koa he meʼa feiā ʼi muʼa atu?
Koutou sio ki te tagata, mo te fafine pea mo te tama ʼaē ʼe tutuʼu ʼi te paki. Ko te tagata ʼe ko te polofeta ko Elia. Ko te fafine neʼe ko te fafine vitua ʼo te kolo ko Salefate, pea ko te tamasiʼi tagata neʼe ko tana kiʼi tama. ʼI te tahi ʼaho neʼe mahaki ai te kiʼi tama. Neʼe ʼāsili kovi tona mahaki pea neʼe mate ai. Neʼe ʼui age e Elia ki te fafine: ‘Tuku mai tau kiʼi tama.’
Neʼe ʼave e Elia te tamasiʼi ʼaē kua mate ki te kogafale ʼaē ʼi fata, pea ina fakatakoto ki te palepale. Pea neʼe faikole fēnei: ‘Ê Sehova, toe fakamaʼuli mai te kiʼi tama ʼaenī.’ Pea neʼe kamata mānava ai te kiʼi tama! Pea neʼe toe hifo ifo ia Elia mai te kogafale pea ina ʼui age ki te fafine: ‘Sio, kua toe maʼuli tau kiʼi tama!’ Ko te tupuʼaga la ʼaia ʼo te fiafia ʼaupito ʼo tana faʼe.
Ko te tahi polofeta lahi ʼa Sehova neʼe higoa ko Eliseo. Neʼe ko ia ʼaē neʼe tokoni kia Elia. Kae ʼaki te temi neʼe toe fakaʼaogaʼi foki e Sehova ia Eliseo ke ina fai he ʼu milakulo. ʼI te tahi ʼaho neʼe ʼalu ia Eliseo ki te kolo ko Sunemi, ʼe nofo ai te fafine neʼe agalelei ʼaupito kia ia. Ki muli age neʼe maʼu e te fafine ʼaia tana kiʼi tamasiʼi tagata.
ʼI te tahi uhu, ka kua lahi te tamasiʼi, neʼe ʼalu ia ki tana tāmai ʼaē neʼe gāue ʼi te gāueʼaga. Fokifā pe neʼe kalaga fēnei te tama: ‘ ʼE mamahi toku ʼulu!’ ʼI tana tau atu ki tona ʼapi, pea mate ai te kiʼi tama. Neʼe lotomamahi tana faʼe! Neʼe ʼalu atu aipe te fafine ʼo kumi ia Eliseo.
ʼI te tau mai ʼa Eliseo, neʼe ʼalu ki te kogafale mo te kiʼi tama ʼaē kua mate. Neʼe faikole kia Sehova, pea neʼe takoto ia ki te sino ʼo te kiʼi tama. Pea māmāfana ai te sino ʼo te kiʼi tama, pea neʼe mafatua tuʼa fitu. Neʼe fiafia ʼaupito tana faʼe ʼi tana sio kua toe maʼuli mai tana tama!
ʼE lahi ʼaupito te hahaʼi ʼaē kua mamate. ʼE ko he meʼa fakatupu mamahi ʼaia ki tonatou ʼu famili pea mo tonatou ʼu kaumeʼa. ʼE mole tou maʼu te mālohi ʼaē moʼo fakatuʼuake ʼo te kau mate. Kae ʼe maʼu e Sehova ia te mālohi ʼaia. Ki muli age ʼe hoki tou ʼiloʼi anai peʼe feafeaʼi tana toe fakatuʼuake ia te toko lauʼi miliona hahaʼi ʼaē kua mamate.