HISITOLIA 71
ʼE Fakapapauʼi Mai e Te ʼAtua Te Palatiso
ʼE KO te paki ʼaenī ʼo te palatiso ʼaē neʼe fakahā e te ʼAtua ki tana polofeta ko Isaia. Neʼe maʼuli ia Isaia ki muli mai ia Sonasi.
ʼE faka ʼuhiga te kupu palatiso ki he “ ʼōloto” peʼe ko he “lotoʼā.” Ko te paki ʼaenī ʼe mole ina fakamanatuʼi atu koa la kia koutou te meʼa ʼaē neʼe koutou sio kiai ʼi te kamata ʼo te tohi ʼaenī? ʼE mole tatau koa la mo te ʼōloto taulekaleka ʼaē neʼe fai e Sehova ʼAtua maʼa Atama mo Eva? Kae ʼe liliu anai koa te kele katoa ko he palatiso?
Neʼe ʼui age e Sehova ki tana polofeta ko Isaia ke faitohi ʼo ʼuhiga mo te agaaga ʼo te palatiso foʼou ʼaē ka foaki anai e Sehova ki tana hahaʼi ʼi te temi ka haʼu. Neʼe ina ʼui fēnei: ‘Ko te lupo pea mo te akeno ʼe nā maʼuʼuli fakatahi anai ʼi te tokalelei. Ko te pipi mui pea mo te laione mui ʼe nā kakai fakatahi anai, pea ʼe takitaki anai nātou e he kiʼi tamasiʼi. Māʼiape la mo te kiʼi toe veliveli ʼe mole hoko anai he meʼa kovi ki ai mokā ʼe gaoʼi mo te gata.’
ʼE ʼui anai e te tokolahi: ‘ ʼE mole feala anai ke hoko te faʼahi ʼaia. Neʼe hoko tuʼumaʼu pe te ʼu fihifihia ʼi te kele, pea ʼe mole fetogi anai.’ Kae koutou fakakaukauʼi muʼa te faʼahi ʼaenī: Neʼe feafeaʼi te nofoʼaga ʼaē neʼe foaki e te ʼAtua kia Atama pea mo Eva?
Neʼe tuku e te ʼAtua ia Atama mo Eva ki he palatiso. ʼUhi ko tanā talagataʼa ʼaē ki te ʼAtua, neʼe pulihi ai tonā nofoʼaga taulekaleka, pea nā matutuʼa pea nā mamate ai. ʼE fakapapau mai e te ʼAtua ʼe ina foaki anai ki te hahaʼi ʼaē ʼe ʼoʼofa kia te ia te ʼu meʼa ʼaē neʼe pulihi e Atama pea mo Eva.
ʼI te palatiso foʼou, ʼe mole toe ʼi ai anai he ʼu mamahi pe ko he ʼu tuʼutāmaki. ʼE maʼu ai anai te tokalelei. ʼE maʼu anai e te hahaʼi fuli he maʼuli mālōlō pea mo maʼuli fiafia. ʼE toe hage pe anai ko te meʼa ʼaē neʼe fakatuʼutuʼu e te ʼAtua ʼi te kamataʼaga. Kae ʼe tou vakaʼi anai ki muli mai peʼe fakahoko feafeaʼi anai e te ʼAtua ia te faʼahi ʼaia.