ʼE KOUTOU ʼiloʼi pe koʼe ʼe faikole te tagata ʼaenī kia Sehova? He koʼe ʼe ina folahi te ʼu tohi ʼaia ia muʼa ʼo te ʼaletale ʼo Sehova? Ko te tagata ʼaenī ʼe ko Esekiasi. ʼE ko te hau ʼo te ʼu telepi e lua ʼo te potu toga ʼo Iselaele. Pea ʼe nofo ia ʼi te ʼu tuʼania lahi. Koteā tona tupuʼaga?

Koteʼuhi neʼe kua maumauʼi e te kautau ʼo Asilia te ʼu telepi e 10 ʼo te potu tokelau. Neʼe tuku e Sehova ke hoko te faʼahi ʼaia koteʼuhi neʼe agakovi ʼaupito te hahaʼi ʼaia. Pea ʼi te temi nei ʼe ʼōmai te kautau ʼo Asilia ʼo tauʼi te puleʼaga ʼo te ʼu telepi e lua.

ʼE mole heʼeki faʼa fualoa neʼe fakamomoli e te hau ʼo Asilia te ʼu tohi ki te Hau ko Esekiasi. Ko te ʼu tohi ʼaia neʼe ʼave e Esekiasi ʼo folahi ia muʼa ʼo te ʼAtua. Ko te ʼu tohi ʼaia neʼe nātou manukiʼi ia Sehova, pea neʼe nātou fakatotonu kia Esekiasi ke fakafisi ki te tau. Ko te tupuʼaga la ʼaia ʼo te faikole fēnei ʼa Esekiasi: ‘Ê Sehova, hāofaki mātou mai te hau ʼo Asilia. Pea ʼe ʼiloʼi anai e te ʼu puleʼaga fuli ʼe ke ʼAtua tokotahi pe.’ ʼE tali anai koa e Sehova te meʼa ʼaē neʼe kole age e Esekiasi?

Ko Esekiasi neʼe ko he hau agalelei. Neʼe mole tatau ia mo te ʼu hau agakovi ʼo te ʼu telepi e 10 ʼo Iselaele, peʼe hage ko tana tāmai agakovi te Hau ko Akasi. Neʼe mulimuli lelei ia Esekiasi ki te ʼu lao fuli ʼa Sehova. Koia, ʼi te ʼosi faikole ʼa Esekiasi, neʼe fakahā age e te polofeta ko Isaia te logo ʼaenī mai ia Sehova: ‘ ʼE mole hū anai te hau ʼo Asilia ki Selusalemi. ʼE mole he tahi ʼi tana kau solia ʼe fakaōvi mai anai ki Selusalemi. ʼE mole lave anai hanatou kauʼi nahau ki te kolo ʼaenī.’

Koutou sio ki te paki ʼi te pasina ʼaenī. ʼE koutou ʼiloʼi koa pe ko ai te kautau ʼaia kua mamate? Ko te kau Asilia. Neʼe fekauʼi e Sehova tana ʼaselo, pea ʼi te po pe e tahi neʼe ina matehi ai te kau solia e toko 185 000 ʼo Asilia. Pea neʼe mavae ai te hau ʼo Asilia ʼo toe liliu ki tona fenua.

Neʼe hāofaki ai te puleʼaga ʼo te ʼu telepi e lua, pea neʼe nonofo te hahaʼi ʼi te tokalelei ʼi he kiʼi temi. Kae ʼi te mate ʼa Esekiasi, neʼe hau tona foha ko Manase. Ko Manase pea mo tona foha ko Amone ʼaē neʼe hoa atu ki ai, neʼe ko te ʼu hau agakovi ʼaupito. Koia neʼe toe lahi ai te fai fakapō pea mo te agamālohi ʼi te fenua. ʼI te matehi ʼo te hau ko Amone e tana ʼu kaugana, neʼe hau ai leva tona foha ko Sosiasi ʼi te puleʼaga ʼo te ʼu telepi e lua.