HISITOLIA 74
Ko Te Tagata Neʼe Mole Mataku
ʼE KOUTOU sio ki te hahaʼi ʼaē ʼe nātou vāʼi te tama ʼaenī. ʼE koutou ʼiloʼi koa pe ko ai te tama ʼaia? Ko Selemia. ʼE ko he polofeta maʼuhiga ʼa te ʼAtua.
ʼI te kamata maumauʼi e Sosiasi te ʼu tamapua ʼi te fenua, neʼe ʼui age e Sehova kia Selemia ke liliu ko Tana polofeta. Kae neʼe manatu ia Selemia ʼe mole feala ia ke polofeta, heʼe kei veliveli. Kae neʼe ʼui age e Sehova ʼe tokoni anai kia ia.
Neʼe ʼui e Selemia ki te kau Iselaelite ke nātou fakagata tanatou agakovi. Neʼe ina ʼui fēnei: ‘Ko te ʼu ʼatua ʼaē ʼe tauhi kiai te hahaʼi ʼo te ʼu puleʼaga, ʼe ko te ʼu ʼatua loi.’ Kae ko te tokolahi ʼo te kau Iselaelite neʼe nātou leleiʼia age te tauhi ʼaē ki te ʼu tamapua ʼi te tauhi ʼaē ki te ʼAtua moʼoni ko Sehova. ʼI te ʼui age ʼaē e Selemia ki te hahaʼi ʼe fakatūʼa anai e te ʼAtua ia nātou ʼuhi ko tanatou agakovi, neʼe nātou vāʼi ia ia.
ʼAki te temi, neʼe mate ia Sosiasi, pea hili kiai māhina e tolu, pea hau ai tona foha ko Seoiakimi. Neʼe ʼui fēnei e Selemia ki te hahaʼi: ‘ ʼE fakaʼauha anai ia Selusalemi mo kapau ʼe mole fetogi takotou ʼu agakovi.’ Neʼe puke e te kau pelepitelo ia Selemia pea nātou kalaga fēnei: ‘ ʼE tonu ke matehi koe ʼuhi ko tau tala mai te ʼu meʼa ʼaia.’ Pea neʼe nātou ʼui age ki te ʼu tama ʼaliki ʼo Iselaele: ‘ ʼE tonu ke matehi ia Selemia, koteʼuhi neʼe palalau fakafeagai ki totatou kolo.’
Koteā anai te meʼa ʼaē ka fai e Selemia? Neʼe mole mataku ia! Neʼe ina ʼui age kia nātou: ‘Neʼe fekauʼi mai ʼau e Sehova ke ʼau fakahā atu te ʼu meʼa ʼaia kia koutou. Kapau ʼe mole fetogi takotou ʼu aga ʼaē ʼe kovi, pea ʼe fakaʼauha anai e Sehova ia Selusalemi. Kae ʼe tonu ke koutou ʼiloʼi te meʼa ʼaenī: Kapau ʼe koutou matehi ʼau, pea ʼe koutou matehi te tagata neʼe mole ina fai he meʼa ʼe kovi.’
Neʼe tuku ai e te ʼu tama ʼaliki ia Selemia ke maʼuli, kae neʼe mole fetogi e te kau Iselaelite tanatou ʼu aga ʼaē ʼe kovi. Ki muli age neʼe haʼu ia Nepukanesa, te hau ʼo Papiloni, ʼo tauʼi ia Selusalemi. Pea neʼe fakapōpulaʼi e Nepukanesa te kau Iselaelite. Neʼe ina ʼave te ʼu lauʼi afe hahaʼi ki Papiloni. Koutou fakakaukauʼi age muʼa mo kanapaula neʼe koutou kau ʼi te hahaʼi ʼaia neʼe ʼave ki te fenua kehe!