NEʼE toe ʼōmai te kau Filisitini ʼo tauʼi ia Iselaele. Ko te ʼu tēhina ʼo Tavite kua nātou kau ki te kautau ʼa Saulo. Koia ʼi te tahi ʼaho neʼe ʼui age e Sese kia Tavite: ‘ ʼAlu ʼo ʼave he meʼa kai pea mo he ʼu moʼi pane ki tou ʼu tēhina, pea mo vakaʼi peʼe nātou feafeaʼi.’

ʼI te tau atu ʼa Tavite ki te nofoʼaga tau, neʼe lele ia ki te faʼahi ʼaē neʼe hoko ai te tau ke ina kumi tona ʼu tēhina. Neʼe haʼu te tagata Filisitini māʼoluga ko Koliate ʼo fakalainoaʼi te kau Iselaelite. Neʼe ina fai te faʼahi ʼaia ʼi te uhu fuli pea mo te afiafi fuli lolotoga ʼaho e 40. Neʼe kalaga fēnei: ‘Koutou fili he tagata ʼi takotou ʼu hahaʼi ke haʼu ʼo tauʼi ʼau. Kapau ʼe mālo pea mo ina matehi ʼau, pea ʼe mātou liliu anai ko takotou ʼu kaugana. Kae kapau ʼe ʼau mālo pea mo ʼau matehi ia ia, ʼe koutou liliu anai ko tamatou ʼu kaugana. ʼE ʼau laga tau atu kia koutou.’

Neʼe fehuʼi age e Tavite ki ʼihi ʼo te kau solia: ‘Koteā anai te meʼa ʼaē ka maʼu e te tagata ʼaē ka ina matehi te tagata Filisitini ʼaenī pea mo ina faka ʼāteaina mai ia Iselaele mai te manukinuki ʼaia?’

Neʼe ʼui age e te tagata solia: ‘ ʼE foaki anai e Saulo ki te tagata ʼaia he ʼu koloā lahi. Pea ʼe ina foaki age anai ki ai tona ʼofafine ke ʼohoana mo ia.’

Kae neʼe matataku te kau Iselaelite fuli ia Koliate koteʼuhi neʼe māʼoluga ʼaupito. Ko tona māʼoluga ʼe ko meta e 3, pea neʼe ʼi ai te tahi tagata solia neʼe ina toʼo tana meʼa tali tau.

Neʼe ʼolo ʼihi kau solia ʼo fakahā ki te Hau ko Saulo ʼe fia tauʼi e Tavite ia Koliate. Kae neʼe ʼui age e Saulo kia Tavite: ‘ ʼE mole feala ke ke tauʼi ia te Filisitini ʼaenī. ʼE ke veliveli koe, kae ko ia ʼe ko te tagata tau ʼi tona maʼuli katoa.’ Neʼe tali age e Tavite: ‘Neʼe ʼau matehi te uluso pea mo te laione ʼaē neʼe nā ʼave te ʼu ōvi ʼo taku tāmai. Pea ʼe ʼau toe matehi feiā anai mo te Filisitini ʼaenī. ʼE tokoni anai ia Sehova kia ʼau.’ Pea ʼui age e Saulo: ‘ ʼAlu, pea ʼofa pe ke kau ia Sehova mo koe.’

Neʼe ʼalu ia Tavite ki te vaitafe pea neʼe ina toʼo te ʼu foʼi maka momole e nima ʼo ina ʼai ki tana kato. Pea neʼe ina toʼo tana makamaka pea neʼe ʼalu ʼo faka felāveʼi mo te tagata lahi. ʼI te sio ʼa Koliate ki ai, neʼe punamaʼuli ia. Neʼe manatu ia ʼe faigafua anai tana matehi ia Tavite.

Neʼe ʼui age e Koliate: ‘Haʼu kia ʼau, ke ʼau foaki tou sino ke kai e te ʼu manulele pea mo te ʼu manu.’ Kae neʼe ʼui age e Tavite: ‘ ʼE ke haʼu koe kia ʼau mo te heletā, mo te tao pea mo te savelo, kae ʼe ʼau ʼalu atu kia koe mo te huafa ʼo Sehova. ʼI te ʼaho ʼaenī ʼe foaki mai anai e Sehova ia koe ki toku ʼu nima pea ʼe ʼau matehi anai koe.’

Neʼe lele ia Tavite kia Koliate. Pea ina toʼo te foʼi maka ʼi tana kato, ʼo ina ʼai ki tana makamaka pea ina lī ʼaki tona mālohi katoa. Neʼe lave te foʼi maka ki te ʼulu ʼo te tagata Filisitini, pea tō ifo aipe ki lalo ʼo mate! ʼI te sio ʼa te kau Filisitini ki te kua tō ki lalo ʼo tanatou tagata toʼa, neʼe nātou feholaki fuli. Neʼe tuli nātou e te kau Iselaelite pea nātou mālo ai.