HISITOLIA 83
Ko Te ʼu Kaupā ʼo Selusalemi
ʼE KOUTOU sio ki te hahaʼi ʼaē ʼe lolotoga gāue. Ko te kau Iselaelite neʼe maʼumaʼua ʼi te laga ʼo te ʼu kaupā ʼo Selusalemi. ʼI te temi ʼaē neʼe fakaʼauha ai e te hau ko Nepukanesa ia Selusalemi ia taʼu e 152 ʼi muʼa atu, neʼe ina maumauʼi mo tona ʼu kaupā pea neʼe ina tutu te ʼu matapā ʼo te kolo. Neʼe mole laga e te kau Iselaelite te ʼu kaupā ʼi tanatou ʼuluaki liliu ʼaē mai Papiloni.
ʼI takotou manatu neʼe feafeaʼi te maʼuli ʼo te hahaʼi ʼaia ʼi te ʼu taʼu fuli ʼaē neʼe mole ʼi ai he ʼu kaupā moʼo puipui ʼo tonatou kolo? Neʼe mole nātou fīmālie. Neʼe faigafua te ʼōmai ʼo tonatou ʼu fili ʼo tauʼi ia nātou. Kae ʼi te temi ʼaia, ko te tagata ko Nehemia neʼe lolotoga tokoni ki te hahaʼi ki te toe laga ʼo te ʼu kaupā. ʼE koutou ʼiloʼi koa pe ko ai ia Nehemia?
Ko Nehemia neʼe ko te tagata Iselaelite ʼe haʼu mai te kolo ʼo Suse, ʼaē neʼe nonofo ai ia Maletokeo pea mo Esitele. Neʼe gāue ia Nehemia ʼi te fale hau, koia neʼe kaumeʼa lelei ai mo Maletokeo pea mo te Fineʼaliki ko Esitele. Kae ʼe mole ʼui mai e te Tohi-Tapu pe neʼe gāue ia Nehemia maʼa te ʼohoana ʼo Esitele, te hau ko Asuelusi. Neʼe gāue ia maʼa te hau neʼe hoa atu ki ai, ko te Hau ko Artaxerxès.
Tou manatuʼi, ko Artaxerxès neʼe ko te hau agalelei ʼaē neʼe ina foaki age te falā kia Esitalasi ke ʼave ki Selusalemi moʼo laga ʼo te fale lotu ʼo Sehova. Kae neʼe mole kau ia Esitalasi ki te laga ʼo te ʼu kaupā ʼo te kolo. Tou vakaʼi pe neʼe fai feafeaʼi e Nehemia te gāue ʼaia.
Kua hili kiai taʼu e 13 ki te foaki age ʼaē e Artaxerxès kia Esitalasi te paʼaga moʼo laga ʼo te fale lotu. Ko Nehemia neʼe ko te tagata ʼaē neʼe tokaga ki te meʼa ʼinu ʼa te hau ko Artaxerxès. Ko tona faka ʼuhiga neʼe ko ia ʼaē neʼe ina fakafonu te ipu ʼo te hau ʼaki te vino, pea mo tokaga naʼa kākāʼi te vino. Neʼe ko he gāue maʼuhiga ʼaupito.
ʼI te tahi ʼaho, ko te tēhina ʼo Nehemia ko Anani pea mo te tahi ʼu tagata neʼe ʼōmai mai te fenua ʼo Iselaele ʼo fakasiosio mai kia Nehemia. Neʼe nātou fakahā age ki ai te ʼu fihifihia ʼaē neʼe tau mo te kau Iselaelite, pea neʼe mole heʼeki laga te ʼu kaupā ʼo Selusalemi. Neʼe tupu ʼaki ai te lotomamahi ʼo Nehemia, pea neʼe faikole ai kia Sehova ʼo ʼuhiga mo te faʼahi ʼaia.
ʼI te tahi ʼaho neʼe fakatokagaʼi e te hau ʼe lotomamahi ia Nehemia, pea ina fehuʼi age ki ai: ‘He koʼe ʼe ke lotomamahi?’ Neʼe ʼui age e Nehemia ki ai ʼe lotomamahi heʼe haʼele kovi ia Selusalemi pea neʼe mole heʼeki laga tona ʼu kaupā. Neʼe fehuʼi age e te hau: ‘Koteā te meʼa ʼaē ʼe ke loto ki ai?’
Neʼe ʼui age e Nehemia: ‘Fakagafua mai ke ʼau ʼalu ki Selusalemi ke feala haku toe laga tona ʼu kaupā.’ Neʼe agalelei ʼaupito te hau ko Artaxerxès. Neʼe ina ʼui age kia Nehemia ke ʼalu, pea neʼe ina foaki age ki ai te ʼu papa moʼo fai ʼo te tahi ʼu gāue. Mole tuai pea tau atu ia Nehemia ki Selusalemi, ʼo ina fakahā age ki te hahaʼi tana ʼu fakatuʼutuʼu. Neʼe nātou leleiʼia te manatu ʼaia, pea neʼe nātou ʼui fēnei: ‘Tou kamata ia te gāue.’
ʼI te sio ʼa te ʼu fili ʼo te kau Iselaelite kua laga ia te ʼu kaupā, neʼe nātou ʼui fēnei: ‘ ʼE mātou ʼolo anai ʼo matematehi ia nātou, pea ʼe mātou tāʼofi anai tanatou laga te ʼu kaupā.’ Kae neʼe logo ia Nehemia ki te meʼa ʼaia, pea neʼe ina tufa ki te kau gāue te ʼu heletā pea mo te ʼu tao. Pea ina ʼui age: ‘Tuku takotou matataku ki tokotou ʼu fili. Koutou tau maʼa tokotou ʼu tēhina, takotou ʼu fānau, tokotou ʼu ʼohoana, pea mo tokotou ʼu ʼapi.’
Neʼe lototoʼa ʼaupito te hahaʼi. Neʼe nātou taupau tanatou ʼu meʼa tau ʼi te ʼaho mo te po, pea neʼe hoko atu tanatou gāue. Koia neʼe ʼosi ai te laga ʼo te ʼu kaupā ia ʼaho e 52. ʼI te temi nei kua feala ke maʼu e te hahaʼi te loto fīmālie ʼi te loto kolo. Neʼe akoʼi e Nehemia pea mo Esitalasi ki te hahaʼi te lao ʼa te ʼAtua, pea neʼe fiafia ai te hahaʼi.
Kae ʼe mole kei tatau te temi ʼaia mo te temi ki muʼa atu ʼaē neʼe heʼeki ʼave popūla ai te kau Iselaelite ki Papiloni. Kua puleʼi leva te hahaʼi e te hau ʼo Pelesia pea ʼe tonu ke nātou gāue kia ia. Kae neʼe fakapapauʼi age e Sehova ʼe ina fekauʼi age anai he hau foʼou, pea ko te hau ʼaia ʼe ina ʼaumai anai te tokalelei ki te hahaʼi. Ko ai koa te hau ʼaia? ʼE ina fakatuʼu feafeaʼi anai te tokalelei ʼi te kele? Neʼe hili kiai taʼu e 450 ʼi muʼa ʼo he ʼiloʼi ʼo he tahi ʼu meʼa ʼo ʼuhiga mo ia. Pea neʼe tupu te tamasiʼi ʼe maʼuhiga ʼaupito. Kae ko te tahi ʼaia hisitolia.