HISITOLIA 80
ʼE Mavae Te Hahaʼi ʼa Te ʼAtua ʼi Papiloni
KUA teitei pe ke fakalaka taʼu e lua talu mai te maʼu e te kau Metia pea mo te kau Pelesia ia Papiloni. Pea koutou sio ki te meʼa ʼe hoko ʼi te temi nei! ʼIo, ʼe mavae te kau Iselaelite ʼi Papiloni. Neʼe feafeaʼi tonatou faka ʼāteaina? Ko ai ʼaē neʼe ina fakagafua age ke nātou ʼolo?
Neʼe fai te faʼahi ʼaia e Siliusi te hau ʼo Pelesia. ʼI he temi kua fualoa ʼi muʼa atu ka heʼeki tupu ia Siliusi, neʼe uga e Sehova tana polofeta ko Isaia ke ina tohi fēnei ʼo ʼuhiga mo ia: ‘ ʼE ke fai anai te meʼa ʼaē ʼe ʼau loto ke ke fai. ʼE tuku ava anai te ʼu matapā ke feala hau hūfi ia te kolo.’ Pea neʼe takitaki e Siliusi te kau solia ʼi te ʼohofi ʼo Papiloni. Neʼe hū te kau Metia pea mo te kau Pelesia ki te kolo ʼi te pōʼuli, ʼi te ʼu matapā ʼaē neʼe tuku ava.
Kae neʼe toe ʼui e te polofeta ʼa Sehova ko Isaia, ʼe fakatotonu anai e Siliusi ke toe laga ia Selusalemi pea mo tona fale lotu. Neʼe fai koa e Siliusi te fakatotonu ʼaia? Ei. Koʼeni te meʼa neʼe ʼui age e Siliusi ki te kau Iselaelite: ‘Koutou ʼolo, ʼi te temi nei, ki Selusalemi pea ke koutou laga te fale lotu ʼo Sehova, tokotou ʼAtua.’ Pea neʼe fai te meʼa ʼaia e te kau Iselaelite.
Kae neʼe mole feala ki te kau Iselaelite fuli ʼaē ʼi Papiloni, ke nātou fai te fagona loaloaga ʼaia ki Selusalemi. Neʼe ko he fagona loaloaga, he neʼe tonu ke nātou ʼolo ia kilometa e 800, pea neʼe mole feala ki te tokolahi ke nātou fai te fagona loaloaga ʼaia he kua nātou matutuʼa peʼe mahahaki. Pea neʼe ʼi ai te tahi ʼu tupuʼaga ʼo te mole ʼolo ʼa ʼihi hahaʼi ʼi te fagona ʼaia. Kae neʼe ʼui age e Siliusi kia nātou ʼaē neʼe mole ʼolo: ‘Koutou foaki te siliva pea mo te aulo pea mo he tahi ʼu meʼa ʼofa ki te hahaʼi ʼaē ʼe ʼolo ʼo laga ia Selusalemi pea mo te fale lotu.’
Koia, neʼe foaki ai ki te kau Iselaelite ʼaia te ʼu tuʼuga meʼa ʼofa ke nātou ʼave ki Selusalemi. Tahi ʼaē meʼa, neʼe foaki age e Siliusi kia nātou te ʼu ipu pea mo te ʼu kalise ʼaē neʼe toʼo e te hau ko Nepukanesa ʼi te fale lotu ʼo Sehova, ʼi te temi ʼaē neʼe nātou fakaʼauha ai ia Selusalemi. Neʼe lahi te ʼu meʼa ʼaē neʼe ʼave e te hahaʼi.
ʼI te ʼosi ʼo māhina e fā ʼo tanatou fagona, pea neʼe kaku atu te kau Iselaelite ki Selusalemi ʼi tona temi totonu. Ko taʼu e 70 talu mai te temi ʼaē neʼe maumauʼi ai te kolo, pea neʼe lāvaki katoa ia te fenua. Kae ʼi te kua tau atu ʼa te kau Iselaelite ki tonatou fenua, ʼe nātou tau anai mo he ʼu temi faigataʼa, ohage ko te meʼa ka tou vakaʼi anai ki muli mai.