HISITOLIA 93
ʼE Fafaga e Sesu Te Kaugamālie
NEʼE hoko te meʼa fakamataku. Mole heʼeki faʼa fualoa te matehi ʼo Soane Patita. Ko Helotiate, te ʼohoana ʼo te hau, neʼe fehiʼa kia ia. Pea neʼe ina fakaʼui ki te hau ke tuʼusi te ʼulu ʼo Soane.
ʼI te logo ʼa Sesu ki te faʼahi ʼaia, neʼe lotomamahi ʼaupito. Neʼe ʼalu ia ki te potu ʼe lāvaki. Kae neʼe mulimuli te hahaʼi ia te ia. ʼI te sio ʼa Sesu ki te kaugamālie, neʼe ʼofa ia kia nātou. Pea neʼe palalau age kia nātou ʼo ʼuhiga mo te puleʼaga ʼo te ʼAtua, pea mo ina fakamālōlō tonatou ʼu mahaki.
ʼI te afiafi ʼaia neʼe ʼōmai tana ʼu tisipulo kia te ia pea nātou ʼui fēnei: ‘Kua afiafi, pea ʼe lāvaki te koga meʼa ʼaenī. Fekau te hahaʼi ke nātou ʼolo ʼo totogi hanatou meʼa kai ʼi te ʼu kolo ʼaē ʼe ōvi mai.’
Neʼe tali age e Sesu: ‘ ʼE mole tonu ke nātou ʼolo, kae ʼe tonu ke koutou foaki age hanatou meʼa kai.’ Neʼe haga age ia Sesu kia Filipo pea ina fehuʼi age: ‘ ʼE kofea ʼaē ka tou totogi ai he meʼa kai moʼo fafaga ʼaki te ʼu hahaʼi fuli ʼaenī?’
Neʼe tali age e Filipo: ‘ ʼE mole feʼauga tatatou paʼaga moʼo totogi ʼaki he meʼa kai, ke feʼauga maʼa te hahaʼi fuli.’ Neʼe tali age e Atelea: ‘Ko te kiʼi tama ʼaenī, ʼe ina ʼaumai tatatou meʼa kai, ko te ʼu foʼi pane e nima pea mo te ʼu ika e lua. Kae ʼe mole feʼauga maʼa te hahaʼi fuli ʼaenī.’
Neʼe ʼui fēnei e Sesu: ‘Fekau te hahaʼi ke nonofo ki lalo ʼi te luna.’ Pea neʼe ina fai tana fakafetaʼi ki te ʼAtua ʼo ʼuhiga mo te meʼa kai, pea ina tofitofi. ʼOsi ʼaia pea neʼe tufa e tana ʼu tisipulo te ʼu moʼi pane pea mo te ʼu moʼi ika ki te hahaʼi fuli. Neʼe ko tagata e toko 5 000, pea mo te ʼu lauʼi afe fafine pea mo te ʼu tamaliki. Neʼe nātou kakai ʼo aʼu ki tonatou makokona. Pea neʼe tānaki e te ʼu tisipulo te meʼa kai ʼaē neʼe toe, ʼo fonu ai ia kato e 12!
ʼI te temi nei ʼe heka te ʼu tisipulo ʼa Sesu ki tonatou vaka ke nātou fakalaka ʼi te Tai ʼo Kalilea. ʼI te pōʼuli neʼe tō te afā lahi, pea neʼe feueʼaki te vaka e te ʼu peau. Neʼe matataku ʼaupito te ʼu tisipulo. Pea ʼi te lotomalie ʼo te pōʼuli, neʼe nātou sisio ki te tahi ʼe haʼele age kia nātou ʼi te fuga tai. Neʼe nātou kalaga ʼi tonatou matataku, he neʼe mole nātou ʼiloʼi pe ko ai.
Neʼe ʼui age e Sesu: ‘Tuku takotou mataku he ko ʼau!’ Neʼe faigataʼa tanatou tui ki te faʼahi ʼaia, pea neʼe ʼui age e Petelo: ‘Kapau ʼe ko koe moʼoni, ʼAliki, fakatotonu mai ke ʼau ʼalu atu kia koe ʼi te fuga tai.’ Neʼe tali age e Sesu: ‘Haʼu!’ Pea neʼe hifo ia Petelo ʼi te vaka, pea haʼele ʼi te fuga tai! Kae neʼe mataku ia pea neʼe kamata moū ai, pea neʼe hāofaki ia ia e Sesu.
Ki muli age, neʼe toe fafaga e Sesu te toko lauʼi afe hahaʼi. ʼI te temi ʼaia neʼe ina fai ʼaki te ʼu foʼi pane e fitu pea mo te ʼu kiʼi ika. Pea neʼe toe feʼauga te meʼa kai maʼa te hahaʼi fuli. ʼE mole fakaofoofo koa la te tokaga ʼa Sesu ki te hahaʼi? Ka hau anai ʼi te puleʼaga ʼo te ʼAtua ʼe mole tou toe hala anai ʼi he meʼa!