HISITOLIA 86
Neʼe Taki Te ʼu Tagata e Te Fetuʼu
ʼE KOUTOU sio koa ki te fetuʼu gigila ʼaē ʼe fakahinohino e te tagata ʼaenī? Neʼe hā te fetuʼu ʼaia ʼi tanatou mavae ʼi Selusalemi. Ko te ʼu tagata ʼaia ʼe ʼōmai mai te Potu Hahake, pea ʼe nātou sivisivi te ʼu fetuʼu. ʼE nātou ʼiloʼi ʼe taki anai nātou e te fetuʼu foʼou ʼaia ki he tahi ʼe maʼuhiga.
ʼI te kaku atu ʼa te ʼu tagata ʼaia ki Selusalemi, neʼe nātou fehuʼi fēnei: ‘ ʼE ʼifea te tamasiʼi ʼaē ʼe tonu ke hau ki te kau Sutea?’ Ko te kupu “Sutea” ʼe ko te tahi higoa ʼaia ʼo te kau Iselaelite. Neʼe ʼui e te ʼu tagata ʼaia: ‘Neʼe mātou ʼuluaki sio ki te fetuʼu ʼo te tamasiʼi ʼi tamatou kei nonofo ʼi te Potu Hahake, pea ʼe mātou ʼōmai ʼo atolasio ki ai.’
Neʼe hoha te loto ʼo Helote, te hau ʼo Selusalemi, ʼi tana logo ki te meʼa ʼaia. Neʼe mole ina loto ia ke toʼo tona tuʼulaga e he tahi hau. Pea neʼe pāuiʼi ai e Helote te ʼu pelepitelo pule pea ina fehuʼi age kia nātou: ‘ ʼE tupu anai ʼifea te hau ʼaē neʼe fakapapauʼi mai?’ Neʼe nātou tali age: ‘ ʼE ʼui e te Tohi-Tapu ʼe tupu anai ʼi Petelehemi.’
Pea neʼe pāuiʼi ai e Helote te ʼu tagata ʼaē neʼe ʼōmai mai te Potu Hahake, pea ina ʼui age kia nātou: ‘Koutou ʼolo ʼo kumi te kiʼi tamasiʼi. Pea ka koutou maʼu ia ia, pea koutou ʼōmai ʼo fakahā mai kia ʼau. Ke ʼau ʼalu mo ʼau ʼo atolasio ki ai.’ Kae ʼi tona fakahagatonu, neʼe loto ia Helote ke ina maʼu te kiʼi tamasiʼi ke ina matehi!
Neʼe takitaki e te fetuʼu te ʼu tagata ʼaia ki Petelehemi, pea neʼe tuʼu ʼi te faʼahi tonu ʼaē neʼe nofo ai te kiʼi tamasiʼi. ʼI te hū atu ʼo te ʼu tagata ki te ʼapi, neʼe nātou maʼu atu ia Malia pea mo te kiʼi tamasiʼi ko Sesu. Neʼe nātou ʼōmai mo te ʼu meʼa ʼofa pea neʼe nātou foaki kia Sesu. Kae ki muli age neʼe fakatokagaʼi e Sehova ia te ʼu tagata ʼaia ʼi te moemisi ke ʼaua naʼa nātou toe liliu kia Helote. Pea neʼe nātou toe liliu ai ki tonatou fenua totonu ʼi te tahi ala.
ʼI te ʼiloʼi e Helote kua liliu te ʼu tagata ʼaia neʼe ʼōmai mai te Potu Hahake ki tonatou fenua, neʼe lahi ʼaupito tona ʼita. Pea neʼe ina fakatotonu ke matehi te ʼu kiʼi tamaliki tagata ʼo Petelehemi ʼaē ʼe taʼu lua pea mo nātou ʼaē ʼe mole heʼeki taʼu lua. Kae neʼe fakahā fakatomuʼa e Sehova te faʼahi ʼaia kia Sosefo ʼi te moemisi, pea neʼe mavae ai ia Sosefo mo tona famili ʼo nātou ʼolo ki Esipito. Ki muli age, ʼi te ʼiloʼi e Sosefo ʼaē kua mate ia Helote, neʼe toe liliu ai mo Malia pea mo Sesu ki Nasaleti. Neʼe ko te kolo ʼaia ʼaē neʼe lahilahi ai ia Sesu.
ʼI takotou manatu, ko ai koa ʼaē neʼe ina fakagigila te fetuʼu foʼou ʼaia? Tou manatuʼi, neʼe ʼuluaki ʼolo te ʼu tagata ki Selusalemi ʼi tanatou sio ʼaē ki te fetuʼu. Neʼe ko Satana te Tevolo ʼaē neʼe ina loto ke matehi te ʼAlo ʼo te ʼAtua, pea neʼe ina ʼiloʼi ko te Hau ko Helote ʼaē ʼi Selusalemi ʼe ina faigaʼi anai ke ina matehi ia ia. Koia neʼe ko Satana ʼaē neʼe ina fakagigila te fetuʼu ʼaia.