HISITOLIA 88
ʼE Papitemaʼi e Soane Ia Sesu
ʼE KOUTOU sio ki te lupe ʼaē ʼe hifo mai ki te ʼulu ʼo te tagata. Ko te tagata ʼaia ʼe ko Sesu. ʼI te temi nei ʼe kua taʼu 30. Pea ko te tagata ʼaē ʼe tuʼu mo ia ʼe ko Soane. Neʼe kua tou vakaʼi te faʼahi ʼo ʼuhiga mo ia. ʼE kei koutou manatuʼi te ʼalu ʼa Malia ʼo ʼaʼahi tona kāiga ko Elisapeta, pea neʼe hopo fakafiafia ai te kiʼi tamasiʼi ʼaē neʼe fuafatuʼi e Elisapeta? Ko te kiʼi tamasiʼi ʼaia neʼe ina fuafatuʼi ko Soane. Kae koteā koa te meʼa ʼaē ʼe fai nei e Soane pea mo Sesu?
Neʼe hoki ʼosi age pe te fakauku ʼo Sesu e Soane ki te vai ʼo te Vaitafe ko Solotane. ʼE ko te faʼahiga fai ʼaia ʼo te papitema. ʼUluaki, ʼe fakauku ki te vai, pea ʼe toe fakatuʼu ake. Neʼe fakahigoaʼi e te hahaʼi ia Soane ko te tagata fai papitema, ʼuhi ko tana fai te faʼahi ʼaia ki te hahaʼi. Kae he koʼe neʼe papitemaʼi e Soane ia Sesu?
Neʼe fai e Soane te faʼahi ʼaia koteʼuhi neʼe haʼu ia Sesu ki ai pea neʼe ina kole age ke ina papitemaʼi ia ia. Neʼe papitemaʼi e Soane te hahaʼi ʼaē neʼe nātou fia fakahā ʼe nātou fakahemala ʼo ʼuhiga mo te ʼu agakovi ʼaē neʼe nātou fai. Kae neʼe fai koa e Sesu he meʼa ʼe kovi ke tupu ai hana fakahemala? Kailoa, neʼe mole fai e Sesu he meʼa ʼe kovi, koteʼuhi ʼe ko ia te ʼAlo totonu ʼo te ʼAtua ʼaē neʼe haʼu mai te lagi. Kae neʼe ina kole age kia Soane ke ina papitemaʼi ia ia ʼo ʼuhiga mo te tahi faʼahi. Tou vakaʼi pe koteā te faʼahi ʼaia.
ʼI muʼa ʼo te haʼu ʼa Sesu kia Soane, neʼe ko te tagata tufuga ʼakau. Ko he tagata tufuga ʼakau ʼe ko he tagata ʼe ina faʼu he ʼu meʼa ʼaki te ʼakau, ohage ko he ʼu laupapa, he ʼu hekaʼaga. Ko Sosefo, te ʼohoana ʼo Malia, neʼe ko he tagata tufuga ʼakau, pea neʼe ina akoʼi ia Sesu ke liliu mo ia ko he tagata tufuga ʼakau. Kae neʼe mole fekauʼi ifo e Sehova tona ʼAlo ki te kele ke liliu ko he tagata tufuga ʼakau. Neʼe ʼi ai tana gāue makehe neʼe tonu ke ina fai, pea kua hoko mai te temi ʼaē neʼe tonu ai ke fakahoko e Sesu te gāue ʼaia. Koia moʼo fakahā ʼi te temi ʼaia neʼe haʼu ia ia moʼo fai ʼo te finegalo ʼo tana Tāmai, neʼe kole age e Sesu kia Soane ke ina papitemaʼi ia ia. Neʼe leleiʼia koa e te ʼAtua te meʼa ʼaia?
Ei, koteʼuhi ʼi te ʼosi hake ake ʼa Sesu mai te vai, neʼe ʼui fēnei e te leʼo mai te lagi: ‘Ko ia nei ko toku ʼAlo, ʼaē kua ʼau leleiʼia.’ Tahi ʼaē meʼa, ʼe hage neʼe ava te lagi pea neʼe hifo mai ai te lupe ʼaia kia Sesu. Kae neʼe mole ko he lupe moʼoni. ʼE hage pe ko he lupe, kae ʼi tona ʼuhiga moʼoni neʼe ko te laumālie maʼoniʼoni ʼo te ʼAtua.
ʼI te temi ʼaia neʼe lahi te ʼu meʼa ʼaē neʼe tonu ke fakakaukauʼi e Sesu, koia neʼe ʼalu ai ʼo nofo tokotahi ʼi te koga meʼa ia ʼaho e 40. ʼI te potu ʼaia neʼe haʼu kiai ia Satana. Neʼe faiga tuʼa tolu ia Satana ke fai e Sesu he ʼu meʼa ʼe fakafeagai ki te lao ʼa te ʼAtua. Kae neʼe mole fai e Sesu te ʼu meʼa ʼaia.
ʼOsi ʼaia, pea toe liliu ia Sesu pea felāveʼi mo te ʼu tagata ʼaē neʼe liliu ko tana ʼu ʼuluaki tisipulo. Ko tonatou ʼu higoa ko Atelea, mo Petelo (ʼaē ʼe toe higoa foki ko Simone), mo Filipo pea mo Natanaele (ʼaē ʼe toe higoa foki ko Paletolomeo). Ko Sesu pea mo tana ʼu tisipulo foʼou ʼaia ʼe nātou ʼolo ki te tisitilike ʼo Kalilea. ʼI Kalilea neʼe nātou ʼolo ʼo nonofo ʼi te kolo ʼo Natanaele ʼi Kana. Neʼe ʼalu ai ia Sesu ki te kaitahi ʼo te fai ʼohoana, pea neʼe ina fai ai te ʼuluaki milakulo. ʼE koutou ʼiloʼi pe koteā te ʼuluaki milakulo ʼaia? Neʼe ina fakaliliu te vai ko te vino.