HISITOLIA 91
ʼE Faiakonaki Ia Sesu ʼi Te Moʼuga
ʼE KOUTOU sio ki te heka ʼa Sesu. ʼE faiakonaki ki te ʼu hahaʼi fuli ʼaia ʼi te moʼuga ʼo Kalilea. Ko nātou ʼaē ʼe heheka ʼi ʼona tafa ko tana ʼu tisipulo. Neʼe ina fili te toko 12 ia nātou ʼaia, ke nātou liliu ko tana ʼu ʼapositolo. Ko te kau ʼapositolo ʼa Sesu neʼe ko tana ʼu tisipulo makehe. ʼE koutou ʼiloʼi koa tonatou ʼu higoa?
Neʼe kau ai ia Simone Petelo pea mo tona tēhina ko Atelea. Neʼe kau ai mo te tautēhina ko Sake pea mo Soane. Ko te tahi ʼapositolo neʼe toe higoa mo ia ko Sake, pea ko te tahi neʼe toe higoa mo ia ko Simone. Ko te ʼu ʼapositolo e toko lua neʼe nā higoa ko Sutasi. Ko Sutasi Isikaliote, pea mo Sutasi ʼaē neʼe toe higoa foki ko Tateo. Pea mo Filipo pea mo Natanaele (ʼaē ʼe toe higoa foki ko Paletolomeo), pea mo Mateo pea mo Tomasi.
ʼI tana liliu mai Samalia, neʼe kamata faka mafola ai e Sesu te meʼa ʼaenī: ‘Ko te puleʼaga ʼo selo kua ōvi mai.’ ʼE koutou ʼiloʼi pe koteā te puleʼaga ʼaia? ʼE ko he puleʼaga moʼoni ʼa te ʼAtua. Ko Sesu ʼaē ʼe hau ʼi te puleʼaga ʼaia, pea ʼe hau anai mai te lagi pea ʼe ina ʼaumai anai te tokalelei ki te kele. ʼAki te puleʼaga ʼo te ʼAtua, ʼe liliu anai te kele katoa ko he palatiso taulekaleka.
Neʼe akoʼi e Sesu te hahaʼi ʼo ʼuhiga mo te puleʼaga. Neʼe ina fakamahino fēnei: ‘ ʼE tonu ke koutou faikole fēnei, ko tamatou Tāmai ʼe ʼi selo, ke tāpuhā tou huafa. Ke hoko mai tou puleʼaga. Ke fai tou finegalo ʼi te kele, ohage ko selo.’ ʼE lahi te hahaʼi ʼe nātou fakahigoaʼi te faikole ʼaia: ‘Ko te Tāmai ʼe ʼi selo.’ ʼE koutou ʼiloʼi katoa koa te kole ʼaia?
Tahi ʼaē meʼa neʼe akoʼi e Sesu ki te hahaʼi te aga ʼaē ʼe tonu ke fai ki he tahi. Neʼe ina ʼui fēnei: ‘Koutou fai ki te hahaʼi te meʼa ʼaē ʼe koutou loto ke nātou fai atu kia koutou.’ ʼE mole koutou loto koa la ke agalelei atu he tahi kia koutou? Koia, neʼe ʼui e Sesu, ʼe tonu ke tou agalelei ki te hahaʼi. ʼE mole fakaofoofo koa la mokā fai anai e te hahaʼi fuli te meʼa ʼaia ʼi te palatiso ʼi te kele?