HISITOLIA 92
ʼE Fakatuʼuake e Sesu Te Kau Mate
KO TE kiʼi taʼahine ʼaē ʼe koutou sio ki ai ʼi henī ʼe taʼu 12. Neʼe toʼo e Sesu tona nima, pea ko tana faʼe pea mo tana tāmai neʼe tutuʼu ōvi kia ia. ʼE koutou ʼiloʼi pe koʼe ʼe nā fiafia? Tou vakaʼi te meʼa ʼaē neʼe hoko.
Ko te tāmai ʼa te kiʼi taʼahine neʼe ko te tagata maʼuhiga neʼe higoa ko Sailusi. ʼI te tahi ʼaho neʼe mahaki kovi tona ʼofafine, pea neʼe tonu ke takoto maʼu ʼi tona palepale. Kae neʼe mole lelei tona mahaki. Neʼe fakaʼāsili kovi ia. Neʼe lotomamahi ʼaupito ia Sailusi pea mo tona ʼohoana, he neʼe hage neʼe ʼamanaki mate tanā kiʼi taʼahine. Neʼe ko tanā taʼahine ʼulu tokotahi. Koia neʼe ʼalu ai ia Sailusi kia Sesu. Neʼe logo ia ki te ʼu milakulo ʼaē neʼe fai e Sesu.
ʼI te maʼu atu e Sailusi ia Sesu, neʼe ʼi ai te hahaʼi tokolahi ʼe nātou takatakai ia ia. Kae neʼe hū ia Sailusi ki te kaugamālie pea neʼe fakatō kia vaʼe ʼo Sesu, ʼo ʼui maʼana: ‘ ʼE kovi ʼaupito te mahaki ʼo toku ʼofafine. Fakalelei, ka ke haʼu ʼo fakamālōlō ia ia.’ Neʼe ʼui age e Sesu ʼe ʼalu age anai.
ʼI te lolotoga ʼo tanā fagona, ko te kaugamālie ʼaē neʼe mulimuli ia te ia neʼe nātou fefakaʼefihiʼaki. Fokifā pe kua tuʼu ia Sesu, ʼo ina ʼui fēnei: ‘Ko ai ʼaē neʼe fāfā mai kia te ʼau?’ Neʼe logoʼi e Sesu te mālohi ʼe mavae ia te ia, koia neʼe ina ʼiloʼi ai neʼe fāfā age te tahi kia te ia. Kae neʼe ko ai koa? Neʼe ko te fafine neʼe mahaki kovi talu mai ia taʼu e 12. Neʼe haʼu ia ʼo fāfā ki te ʼu mutuʼi meʼa ʼo Sesu, pea neʼe lelei ai tona mahaki.
Ko te meʼa ʼaia neʼe ina fakafimālieʼi ia Sailusi, koteʼuhi neʼe sio ia ʼe faigafua kia Sesu te fakamālōlō ʼo he tahi ʼe mahaki. Kae neʼe haʼu te tagata ʼave logo, ʼo ina ʼui age kia Sailusi: ‘ ʼE mole ʼaoga tau fakakinakina kia Sesu, he kua mate tou ʼofafine.’ ʼI te logo ʼa Sesu ki te meʼa ʼaia neʼe ina ʼui age kia Sailusi: ‘Tuku tau lotomamahi, ʼe toe lelei anai tou ʼofafine.’
ʼI tana tau atu ki te ʼapi ʼo Sailusi, neʼe fetāgihi te hahaʼi ʼuhi ko tonatou lotomamahi. Kae neʼe ʼui age e Sesu: ‘Tuku takotou fetāgihi. ʼE mole heʼeki mate te tamasiʼi. ʼE moe pe ia.’ Kae neʼe nātou vāʼi ia ia, he neʼe nātou ʼiloʼi kua mate ia.
Neʼe fakahū e Sesu te ʼu mātuʼa ʼa te kiʼi taʼahine pea mo tana ʼu ʼapositolo e toko tolu ki te kogafale ʼaē neʼe takoto ai te kiʼi taʼahine. Neʼe ina toʼo tona nima pea ina ʼui fēnei: ‘Tuʼu ake!’ Pea neʼe toe maʼuli ai, ohage pe ko takotou sio kiai ʼi henī. Pea neʼe tuʼu ake ia ʼo haʼele! Ko te tupuʼaga la ʼaia ʼo te fiafia ʼaupito ʼo tanā ʼu mātuʼa.
ʼE mole ko te ʼuluaki mate ʼaia ʼaē neʼe fakatuʼuake e Sesu. ʼE fakahā ʼi te Tohi-Tapu ko ia ʼaē neʼe ʼuluaki fakatuʼuake e Sesu, ʼe ko te tama ʼa te fafine vitua ʼe nofo ʼi te kolo ko Naini. Ki muli age, neʼe toe fakatuʼuake e Sesu ia Lasalo, te tokolua ʼo Malia pea mo Maleta. Ka hau anai ia Sesu ʼi te puleʼaga ʼo te ʼAtua, pea ʼe lahi anai te kau mate ʼaē ka ina fakatuʼuake. ʼE mole fakafiafia koa la te faʼahi ʼaia?