ʼI TE ʼosi pe ʼo tana fakamālōlō ia te ʼu tagata kivi e toko lua, neʼe ʼalu ia Sesu ki te kiʼi kolo veliveli ʼe ōvi mai ki Selusalemi. Neʼe ina ʼui age ki te toko lua ʼo tana ʼu tisipulo: ‘Koulua ʼolo ki te kolo pea ʼe koulua maʼu atu anai he kiʼi asino veliveli. Koulua vevete pea koulua taki mai kia te ʼau.’

ʼI te ʼaumai ʼo te asino kia te ia, neʼe heka ia Sesu ki ai. Pea neʼe ʼalu ai ki Selusalemi. ʼI tana fakaōvi atu ki te kolo, neʼe ʼōmai te hahaʼi tokolahi ʼo fakafetaulaki mai kia te ia. Ko te tokolahi ia nātou neʼe nātou toʼo ʼonatou kofu tuʼa pea nātou folahi ʼi te ala. Ko ʼihi neʼe nātou tuʼusi te ʼu palema, ʼo nātou folahi ʼi te ala pea nātou kalaga fēnei: ‘Ke tapuakina e te ʼAtua te hau ʼaē ʼe haʼu ʼi te huafa ʼo Sehova!’

Talu mai fualoa neʼe ko he aga māhani ʼi Iselaele ke hū te ʼu hau foʼou ki Selusalemi ʼi he ʼuhiʼi asino moʼo fakahā ʼo nātou ki te hahaʼi. Neʼe ko te meʼa ʼaia ʼaē neʼe fai e Sesu. Pea ko te hahaʼi ʼaia neʼe nātou fakahā ʼe nātou loto ke liliu ia Sesu ko tonatou hau. Kae neʼe mole loto te hahaʼi fuli kia te ia. ʼE tou ʼiloʼi te faʼahi ʼaia ʼi te meʼa ʼaē neʼe hoko ʼi te ʼalu ʼa Sesu ki te fale lotu.

ʼI te fale lotu neʼe fakamālōlō e Sesu te ʼu hahaʼi kivi pea mo te ʼu māʼimoa. ʼI te sio ʼa te kihiʼi tamaliki ki te meʼa ʼaia, neʼe nātou fakavikiviki kia Sesu. Kae neʼe ʼita ai te kau pelepitelo, pea nātou ʼui age kia Sesu: ‘ ʼE ke logo koa ki te meʼa ʼaē ʼe ʼui e te tamaliki?’

Neʼe tali age e Sesu: ‘Ei. Neʼe mole heʼeki koutou lau koa la te meʼa ʼaē neʼe ʼui ʼi te Tohi-Tapu: “Mai te gutu ʼo te ʼu kihiʼi tamaliki ʼe haʼu mai ai te fakavikiviki?” ’ Pea neʼe hoko atu pe te fakavikiviki ʼa te tamaliki ki te hau ʼaē neʼe fakanofo e te ʼAtua.

ʼE mole tou fia hage koa la ko te ʼu kihiʼi tamaliki ʼaia? Ko ʼihi ʼe nātou faiga anai ke nātou tāʼofi tatou ke mole tou palalau ki te puleʼaga ʼo te ʼAtua. Kae ʼe tou haga fakahā anai ki te hahaʼi, ia te ʼu meʼa taulekaleka ʼaē ka fai anai e Sesu maʼa te hahaʼi.

ʼI tana kei ʼi te kele, neʼe mole ko te temi ʼaia ʼaē neʼe tonu ke hau ai ia Sesu ki te kele. ʼE hoko anai koa ʼi te temi fea? Neʼe fia ʼiloʼi e te ʼu tisipulo ʼa Sesu ia te faʼahi ʼaia. ʼE tou vakaʼi anai te faʼahi ʼaia ʼi te hisitolia ʼaē ka hoa mai.