HISITOLIA 87
Ko Te Kiʼi Tama Ko Sesu ʼi Te Fale Lotu
ʼE KOUTOU sio ki te kiʼi tama ʼaē ʼe fai palalau mo te ʼu tagata lalahi ʼaenī. ʼE ko te ʼu tagata faiako ʼi te fale lotu ʼo te ʼAtua ʼaē ʼi Selusalemi. Pea ko te kiʼi tama ʼaenī ʼe ko Sesu. Kua lahi pea ko tona taʼu 12 ʼaenī.
Neʼe punamaʼuli ʼaupito te ʼu tagata faiako, heʼe lahi ʼaupito te ʼu meʼa ʼaē ʼe ʼiloʼi e Sesu ʼo ʼuhiga mo te ʼAtua pea mo te ʼu meʼa ʼaē neʼe tohi ʼi te Tohi-Tapu. Kae he koʼe ʼe mole tou sio kia Sosefo pea mo Malia? ʼE nā ʼifea? Tou vakaʼi te faʼahi ʼaia.
ʼI te taʼu fuli neʼe ʼave e Sosefo tona famili ki Selusalemi ki te ʼaho lahi makehe ʼaē ʼe higoa ko te Pāsikate. Neʼe ko he fagona loaloaga mai Nasaleti ki Selusalemi. ʼI te temi ʼaia, neʼe mole ʼi ai he ʼu motokā, pea mo he ʼu saliote afi. Ko te tokolahi ʼo te hahaʼi neʼe nātou haʼele lalo, pea neʼe nātou haʼele lolotoga ʼaho e tolu ke nātou aʼu ki Selusalemi.
ʼI te temi ʼaia neʼe kua kaugamālie te famili ʼo Sosefo. Neʼe ʼi ai te ʼu tēhina pea mo te ʼu tuagaʼane liliki ʼo Sesu neʼe tutupu ki muli age. Koia, ʼi te taʼu ʼaia neʼe fai e Sosefo mo Malia pea mo tanā fānau te fagona loaloaga ʼaia ke nātou liliu ki Nasaleti. ʼI tanā manatu neʼe nofo ia Sesu mo te hahaʼi ʼaē neʼe kau mo nātou ʼi te fagona. Kae ʼi te tuʼu ʼo tanatou fagona ʼi te afiafi, neʼe mole nā maʼu ia Sesu. Neʼe nā kumi ia ia ʼi tonatou ʼu kāiga mo tonatou ʼu kaumeʼa, kae neʼe mole nofo ia mo nātou! Pea nā toe liliu ai ki Selusalemi ʼo kumi ia ia.
Neʼe nā maʼu atu ia Sesu ʼi te fale lotu ʼe nofo ai mo te hahaʼi faiako. Neʼe ina fakalogo ia nātou pea mo fai fehuʼi kia nātou. Pea neʼe ōfo te hahaʼi fuli ʼi te poto ʼo Sesu. Kae neʼe ʼui age e Malia ki ai: ‘Tamasiʼi, he koʼe neʼe ke fai te meʼa ʼaenī kia māua? Ko tau tāmai pea mo ʼau kua ma lotohoha ʼi tou kumi.’
Neʼe tali age e Sesu: ‘He koʼe neʼe koulua kumi ʼau? ʼE mole koulua ʼiloʼi koa la ʼe tonu ke ʼau nofo ʼi te fale ʼo taku tāmai?’
ʼIo, neʼe fia nofo ia Sesu ʼi te faʼahi ʼaia ʼaē neʼe feala ai ke ina ako ia te ʼu meʼa ʼo ʼuhiga mo te ʼAtua. ʼE mole tonu koa la ke tou fai feiā? ʼI tana liliu ki Nasaleti, neʼe ʼalu ia Sesu ʼi te vāhaʼa fuli ki te ʼu fono ʼaē neʼe fai ʼo ʼuhiga mo te tauhi. Neʼe lahi te ʼu meʼa ʼaē neʼe ina ako ʼi te Tohi-Tapu, he neʼe lototokaga tuʼumaʼu. Tou hage ko Sesu pea mo tou mulimuli ki tona faʼifaʼitaki.