KO TE ʼu hahaʼi ʼaenī ʼe ko te ʼu tisipulo ʼa Sesu. Neʼe nātou fakalogo kia te ia pea neʼe nātou nonofo ʼi Selusalemi. Pea ʼi te lolotoga ʼo tanatou talitali, neʼe ʼuʼulu ʼi te ʼapi katoa. Neʼe ʼuʼulu ohage he tuʼani matagi lahi. Pea neʼe kamata hā ai te ʼu ʼaleloʼi afi ʼi te ʼu fuga ʼulu ʼo te ʼu tisipulo takitokotahi. ʼE koutou sio koa ki te ʼu ʼaleloʼi afi ʼaē ia nātou takitokotahi? Koteā koa tona faka ʼuhiga?

Neʼe ko he milakulo ia! Neʼe kua liliu ia Sesu ki selo ki tana Tāmai, pea kua ina folahi ifo ia te laumālie maʼoniʼoni ki tana ʼu tisipulo. ʼE koutou ʼiloʼi koa pe koteā te meʼa ʼaē neʼe uga e te laumālie ʼaia ke nātou fai? Neʼe nātou kamata palalau ʼi te ʼu lea kehekehe.

ʼE lahi te hahaʼi ʼi Selusalemi neʼe nātou logoʼi te ʼuʼulu ʼaia ʼaē neʼe hage ko he tuʼani matagi, pea neʼe nātou ʼōmai ʼo fakasiosio pe koteā te meʼa ʼaē neʼe hoko. Neʼe ʼi ai te ʼu hahaʼi neʼe ʼōmai mai te tahi ʼu puleʼaga ki te ʼaho ʼo te Penikosite. Neʼe ko he meʼa fakapunamaʼuli ʼaē neʼe nātou sio ki ai! Neʼe nātou logo ki te ʼu tisipulo ʼe nātou palalau ʼi te ʼu lea ʼo tonatou ʼu fenua, ʼo ʼuhiga mo te ʼu meʼa taulekaleka ʼaē neʼe fai e te ʼAtua.

Neʼe ʼui fēnei e te hahaʼi: ‘Ko te ʼu hahaʼi ʼaenī ʼe ʼōmai mai Kalilea. ʼE lava feafeaʼi hanatou palalau ʼi te ʼu lea kehekehe ʼo te ʼu fenua ʼaē ʼe mātou ʼōmai mai ai?’

ʼI te temi ʼaia neʼe tuʼu ia Petelo ʼo fakamahino age kia nātou. Neʼe palalau leʼolahi ʼo ina ʼui age ki te hahaʼi neʼe matehi ia Sesu, pea kua fakatuʼuake ia ia e Sehova mai te kau mate. Neʼe ʼui fēnei e Petelo: ‘ ʼI te temi nei kua nofo ia Sesu ʼi selo ʼi te toʼomataʼu ʼo te ʼAtua. Pea neʼe ina folahi mai te laumālie maʼoniʼoni ʼaē neʼe ina fakapapauʼi mai. Ko te tupuʼaga la ʼaia ʼo takotou sio pea mo koutou logo ki te ʼu milakulo ʼaenī.’

Pea ʼi te tala age e Petelo te ʼu meʼa ʼaia, neʼe lotomamahi te tokolahi ia nātou ʼuhi ko te meʼa ʼaē neʼe fai kia Sesu. Neʼe nātou fehuʼi age: ‘Koteā te meʼa ʼe tonu ke mātou fai?’ Neʼe ʼui age e Petelo kia nātou: ‘ ʼE tonu ke fetogi tokotou maʼuli pea ke koutou papitema.’ Koia ʼi te ʼaho pe ʼaia neʼe papitema ai te toko 3 000, pea nātou liliu ai ko te ʼu tisipulo ʼa Sesu.