HISITOLIA 106
ʼE Faka ʼĀteaina Ia Nātou Mai Te Fale Pilisoni
ʼE KOUTOU sio ki te ʼaselo ʼaē ʼe ina avahi te matapā ʼo te fale pilisoni. Ko te ʼu tagata ʼaē ʼe ina fakahū ki tuʼa ʼe ko te ʼu ʼapositolo ʼa Sesu. Tou vakaʼi pe koʼe neʼe ʼave ia nātou ʼo pilisoniʼi.
Neʼe mole heʼeki faʼa fualoa te tali e te ʼu tisipulo ʼa Sesu te laumālie maʼoniʼoni. Pea koʼeni te meʼa ʼaē neʼe hoko: ʼI te tahi hoʼatā, neʼe ʼalu ia Petelo pea mo Soane ki te fale lotu ʼo Selusalemi. Pea neʼe ʼi ai te tagata neʼe nofo ʼi te gutu matapā neʼe māʼimoa talu tona tupu. Neʼe fata ia e te hahaʼi ʼi te ʼaho fuli, ke feala hana kole paʼaga ki te hahaʼi ʼaē neʼe ʼolo age ki te fale lotu. ʼI tana sio kia Petelo pea mo Soane, neʼe ina kole age kia nāua ke nā foaki age he meʼa. Koteā te meʼa ʼaē ka fai e te ʼu ʼapositolo?
Neʼe nā tutuʼu pea nā sioʼi te tagata masiva. Pea ʼui age e Petelo: ‘ ʼE mole haku paʼaga, kae ʼe ʼau foaki atu te meʼa ʼaē ʼe ʼau maʼu. ʼI te huafa ʼo Sesu, tuʼu ake pea ke haʼele!’ Pea neʼe toʼo e Petelo tona nima mataʼu pea neʼe tuʼu ake ai ki ʼoluga pea kamata haʼele. ʼI te sio ʼa te hahaʼi ki te meʼa ʼaia, neʼe nātou punamaʼuli pea neʼe nātou fiafia ʼi te milakulo fakaofoofo ʼaia.
Neʼe ʼui age e Petelo: ‘Neʼe ma fakahoko te milakulo ʼaenī ʼaki te mālohi ʼo te ʼAtua ʼaē neʼe ina fakatuʼuake ia Sesu mai te kau mate.’ ʼI te lolotoga ʼo te fai palalau ʼa Petelo pea mo Soane, neʼe ʼōmai te kau takitaki lotu. Neʼe nātou ʼiʼita koteʼuhi neʼe talanoa ia Petelo pea mo Soane ki te hahaʼi ʼo ʼuhiga mo te fakatuʼuake ʼo Sesu mai te mate. Pea neʼe nātou puke ia nāua ʼo ʼave ki te fale pilisoni.
ʼI te ʼaho ake neʼe fakatahitahi te kau takitaki lotu, pea nātou ʼaumai ia Petelo mo Soane pea mo te tagata ʼaē neʼe fakamālōlō. Neʼe fehuʼi age e te kau takitaki lotu: ‘Ko te mālohi fea ʼaē neʼe koulua fai ʼaki te milakulo ʼaenī?’
Neʼe ʼui age e Petelo kia nātou neʼe ina fai ʼaki te mālohi ʼo te ʼAtua, ʼaē neʼe ina fakatuʼuake ia Sesu mai te kau mate. Neʼe mole ʼiloʼi e te ʼu pelepitelo pe koteā te meʼa ʼaē ʼe tonu ke nātou fai, he neʼe mole feala ke nātou fakafisi neʼe hoko moʼoni te milakulo ʼaia. Pea neʼe nātou fakatotonu age ki te ʼu ʼapositolo ke mole nā toe palalau ʼo ʼuhiga mo Sesu, pea neʼe nātou tuku age ia nāua ke nā ʼolo.
ʼI te hoholo ʼo te ʼu ʼaho, neʼe hoko atu pe te fai faka mafola ʼa te kau ʼapositolo ʼo ʼuhiga mo Sesu pea mo nātou fakamālōlō te ʼu mahaki. Kua mafola te ʼu logo ʼo ʼuhiga mo te ʼu milakulo ʼaia. Pea neʼe ʼōmai te kaugamālie mai te ʼu kolo ʼi te tafaʼaki ʼo Selusalemi ʼo nātou ʼaumai te ʼu hahaʼi mahahaki ke fakamālōlō e te kau ʼapositolo. Neʼe tupu ʼaki ai te fuaʼā ʼo te kau takitaki lotu, pea neʼe nātou puke ai te kau ʼapositolo pea nātou ʼave ʼo pilisoniʼi. Kae neʼe mole nātou nonofo fualoa ai.
ʼI te po ʼaia neʼe avahi e te ʼaselo ʼa te ʼAtua te matapā ʼo te fale pilisoni, ohage ko te meʼa ʼe koutou sio kiai ʼi te paki. Pea neʼe ʼui age e te ʼaselo: ‘Koutou ʼolo ki te fale lotu pea ke koutou haga palalau ai ki te hahaʼi.’ ʼI te ʼala uhu ake, neʼe fekau e te kau takitaki lotu ia te ʼu tagata ke ʼolo ki te fale pilisoni ʼo ʼaumai te kau ʼapositolo, ka neʼe mole kei ʼi ai he tahi ʼi te fale pilisoni. Ki muli age neʼe maʼu atu te kau ʼapositolo ʼe nātou faiakonaki ʼi te fale lotu pea neʼe ʼave ai ia nātou ki te Sanetualio.
Neʼe ʼui age e te kau takitaki lotu: ‘Neʼe kua mātou fakatotonu atu ke ʼaua naʼa koutou faiakonaki ʼo ʼuhiga mo Sesu. Kae kua koutou fakafonu ia Selusalemi ʼaki takotou akonaki.’ Pea neʼe tali age e te kau ʼapositolo: ‘ ʼE tonu ke mātou fakalogo ki te ʼAtua ohage ko he pule ʼi hamatou fakalogo ki te tagata.’ Pea neʼe hoko atu pe tanatou fakahā ia te “logo lelei.” ʼE mole ko he faʼifaʼitaki lelei koa la ʼaia ke tou mulimuli kiai?