HISITOLIA 107
Neʼe Nātou Taumakaʼi Ia Setefano
KO TE tagata ʼaē ʼe tuʼutuli ʼe ko Setefano. Neʼe ko he tisipulo agatonu ʼa Sesu. Kae ʼe koutou sio ki te meʼa ʼaē ʼe hoko kia ia ʼi te temi nei! ʼE taumakaʼi ia e te ʼu tagata ʼaia ʼaki te ʼu foʼi maka lalahi. He koʼe ʼe nātou fehiʼa kia Setefano ʼo nātou fai te meʼa fakamataku ʼaia? Tou vakaʼi muʼa pe koteā tona tupuʼaga.
Neʼe tokoni te ʼAtua kia Setefano ke ina fai he ʼu milakulo fakaofoofo. Neʼe mole leleiʼia e te ʼu tagata ʼaia te meʼa ʼaia, pea neʼe nātou fakafihiʼi ia ia ʼi tana akoʼi te moʼoni ki te hahaʼi. Kae neʼe foaki age e te ʼAtua te poto lahi kia Setefano, pea neʼe fakahā e Setefano ko te ʼu tagata ʼaia ʼe nātou fai te ʼu akonaki loi. Neʼe tupu ʼaki ai tanatou ʼiʼita. Pea neʼe nātou puke ia ia, pea nātou pāuiʼi te ʼu hahaʼi ke nātou fai he ʼu fakamoʼoni loi ʼo ʼuhiga mo ia.
Neʼe fehuʼi age e te pelepitelo lahi kia Setefano: ‘ ʼE moʼoni koa te ʼu meʼa ʼaia?’ Neʼe tali age e Setefano ʼaki he akonaki lelei ʼe fakatafito ki te Tohi-Tapu. ʼI te ʼosi ʼo tana akonaki ʼaia, pea talanoa ai ʼo ʼuhiga mo te ʼu tagata agakovi ʼaē neʼe fehiʼa ki te kau polofeta ʼa Sehova ʼi te temi muʼa. Pea ina ʼui age: ‘ ʼE koutou hage ko te ʼu tagata ʼaia. Neʼe koutou matehi ia Sesu, te kaugana ʼa te ʼAtua, pea neʼe mole koutou fakalogo ki te ʼu lao ʼa te ʼAtua.’
Neʼe tupu ʼaki ai te ʼita lahi ʼaupito ʼo te kau takitaki lotu, pea nātou makiki nifo ʼi tanatou ʼiʼita. Kae neʼe hiki ake e Setefano tona ʼu mata ki te lagi, pea ina ʼui fēnei: ‘Koʼeni! ʼE ʼau sio kia Sesu ʼe tuʼu ʼi te toʼomataʼu ʼo te ʼAtua ʼi selo.’ ʼI tanatou logo ki te meʼa ʼaia, neʼe pupunu e te ʼu tagata tonatou ʼu taliga ʼaki tonatou ʼu nima pea nātou feʼohofi kia Setefano, ʼo nātou puke ia ia pea nātou ʼave ki te tuʼa kolo.
Neʼe nātou huʼi ai tonatou ʼu pulupulu pea nātou ʼavage ke taupau e te tūpulaga ko Saulo. ʼE koutou sio koa kia Saulo? Pea ko ʼihi tagata neʼe nātou kamata taumakaʼi ia Setefano. Neʼe tuʼutuli ia Setefano, ohage ko te meʼa ʼaē ʼe koutou sio kiai ʼi te paki, pea neʼe faikole ia ki te ʼAtua ʼo ina ʼui fēnei: ‘Sehova, ʼaua naʼa ke tautea ia nātou ʼuhi ko te meʼa kovi ʼaenī ʼe nātou fai.’ Neʼe ina ʼiloʼi ko ʼihi ia nātou neʼe fakaneke e te kau takitaki lotu ke nātou fai te meʼa ʼaia. ʼOsi ʼaia pea mate ai ia Setefano.
Ka fai atu e he tahi he meʼa ʼe kovi kia koutou, ʼe koutou faiga koa ke koutou liufaki te kovi ʼaia kia nātou, pea mo kole ki te ʼAtua ke ina tauteaʼi ia nātou? Neʼe mole fai te meʼa ʼaia e Setefano peʼe ko Sesu. Neʼe nā agalelei kia nātou ʼaē neʼe agakovi age kia nāua. Tou mulimuli ki tanā faʼifaʼitaki.