HISITOLIA 108
ʼI Te Ala ʼo Tamaso
ʼE KOUTOU ʼiloʼi pe ko ai te tagata ʼaē ʼe tuku ʼi lalo? ʼE ko Saulo. Koutou manatuʼi, neʼe ko ia ʼaē neʼe ina taupau te ʼu kofu ʼo nātou ʼaē neʼe nātou taumakaʼi ia Setefano. ʼE koutou sio ki te mālama gigila! Koteā te meʼa ʼaē ʼe hoko?
ʼI te ʼosi mate ʼo Setefano, neʼe kau ia Saulo ki te fakatagaʼi ʼo te ʼu tisipulo ʼa Sesu. Neʼe hū ki tonatou ʼu ʼapi ʼo ina toho ia nātou ki tuʼa pea ina faka pilisoniʼi ia nātou. Ko te tokolahi ʼo te ʼu tisipulo neʼe nātou feholaki ki te tahi ʼu kolo pea nātou tala ai te “logo lelei.” Kae neʼe ʼalu ia Saulo ki te tahi ʼu kolo ʼo kumi ai te ʼu tisipulo ʼa Sesu. ʼI te temi nei ʼe ʼalu ia ki Tamaso. Kae ʼi tana ʼalu ʼi te ala, neʼe hoko te meʼa fakapunamaʼuli:
Fokifā pe pea gigila te mālama mai te lagi ʼo ina takatakai ia Saulo, pea tō ifo ai ki te kele, ohage ko te meʼa ʼaē ʼe tou sio kiai ʼi te paki. Pea neʼe ʼui fēnei e te leʼo: ‘Saulo, Saulo! He koʼe ʼe ke fakatagaʼi ʼau?’ Neʼe sio te ʼu tagata ʼaē neʼe kaugā ʼolo mo Saulo ki te mālama ʼaia pea mo logo ki te leʼo ʼaia, kae neʼe mole mahino kia nātou te ʼu meʼa ʼaē neʼe ʼui e te leʼo.
Neʼe fehuʼi age e Saulo: ‘Ko ai ia koe, ʼAliki?’
Neʼe ʼui fēnei e te leʼo: ‘Ko ʼau ia Sesu, ia ia ʼaē ʼe ke fakatagaʼi.’ Neʼe ʼui e Sesu te meʼa ʼaia koteʼuhi ʼi te fakatagaʼi e Saulo ia te ʼu tisipulo ʼa Sesu, neʼe hage pe kia Sesu ʼe ko ia ʼaē ʼe ina fakatagaʼi.
Pea neʼe fehuʼi age e Saulo: ‘ ʼAliki, koteā ʼaē ʼe tonu ke ʼau fai?’
Neʼe ʼui age e Sesu: ‘Tuʼu ake ʼo ʼalu ki Tamaso. ʼI te kolo ʼaia ʼe fakahā atu anai te meʼa ʼaē ʼe tonu ke ke fai.’ Pea neʼe tuʼu ake ia Saulo, kae ʼi tana ʼalaʼi tona ʼu mata, neʼe mole kei sio ia ki he meʼa, he kua kivi! Pea neʼe takitaki nima ia ia ki Tamaso.
Pea neʼe palalau ia Sesu ki tana tisipulo ʼi Tamaso, ʼo ina ʼui age: ‘Tuʼu ake Ananiasi, pea ke ʼalu ki te ala ʼe higoa ko Hagatonu, pea ke kumi te tagata ʼe higoa ko Saulo ʼi te ʼapi ʼo Sutasi. Neʼe ʼau fili ia ia ke liliu ko haku kaugana makehe.’
Neʼe mulimuli ia Ananiasi ki te meʼa ʼaē neʼe fakatotonu age kia ia, pea ʼi tana felāveʼi mo Saulo, neʼe ina hili ʼona nima ki ai pea ina ʼui fēnei: ‘Neʼe fekauʼi mai ʼau e te ʼAliki ke feala hau toe sio pea ke ke fonu ʼi te laumālie maʼoniʼoni.’ Pea neʼe tō mai te ʼu mata ʼo Saulo te ʼu meʼa ʼe hage ko he ʼu ʼuno, pea neʼe toe sio ai.
Neʼe fakaʼaogaʼi mālohi ia Saulo moʼo fai faka mafola ki te ʼatu puleʼaga. Neʼe liliu leva ia ʼo higoa ko te ʼapositolo ko Paulo, pea ʼe tou vakaʼi anai te tahi ʼu meʼa ʼo ʼuhiga mo ia. Kae tou vakaʼi muʼa te meʼa ʼaē neʼe fekauʼi e te ʼAtua ke fai e Petelo.