ʼE KOUTOU sio ki te seiniʼi ʼo Paulo, pea mo te tagata solia Loma ʼaē ʼe ina leʼoleʼo ia ia. Neʼe pilisoniʼi ia Paulo ʼi Loma. Neʼe fakatalitali ia ke ina ʼiloʼi pe koteā te meʼa ʼaē ka fai e Sesale kia ia. ʼI te lolotoga ʼo tana nofo pilisoni, neʼe fakagafua ki te hahaʼi ke nātou ʼolo ʼo ʼaʼahi ia ia.

Hili kiai ʼaho e tolu ki te tau ʼa Paulo ki Loma, neʼe ina fakaafe te kau takitaki Sutea ke nātou ʼōmai kia ia. Pea neʼe tokolahi te kau Sutea ʼi Loma neʼe nātou ʼolo ʼo fakasiosio ia ia. Neʼe fai faka mafola age ia Paulo kia nātou ʼo ʼuhiga mo Sesu pea mo te puleʼaga ʼo te ʼAtua. Ko ʼihi neʼe nātou tui pea nātou liliu ko te kau Kilisitiano, kae ko ʼihi neʼe mole nātou tui.

Neʼe toe fai faka mafola foki ia Paulo ki te ʼu tagata solia kehekehe ʼaē neʼe nātou leʼoleʼo ia ia. ʼI te lolotoga ʼo te ʼu taʼu e lua ʼaē neʼe nofo pilisoni ai, neʼe fai faka mafola ia Paulo ki te hahaʼi fuli ʼaē neʼe ʼōmai ʼo ʼaʼahi ia ia. Pea māʼia mo te ʼapi ʼo Sesale neʼe nātou logo ki te logo lelei ʼo te Puleʼaga, pea ko ʼihi ia nātou neʼe liliu ko te kau Kilisitiano.

Kae ko ai koa te tagata ʼaē ʼe faitohi ʼi te laupapa? ʼE koutou ʼiloʼi koa pe ko ai? ʼE ko Timoteo. Neʼe toe pilisoniʼi foki mo Timoteo he neʼe fai faka mafola ʼo ʼuhiga mo te Puleʼaga, kae kua toe mavae mai ai. Pea neʼe haʼu ia ki te fale pilisoni ʼo tokoni kia Paulo. ʼE koutou ʼiloʼi pe koteā te meʼa ʼaē ʼe tohi e Timoteo? Tou vakaʼi te faʼahi ʼaia.

ʼE kei koutou manatuʼi te ʼu kolo ʼo Filipe pea mo Efesi ʼaē ʼi te Hisitolia 110? Neʼe tokoni ia Paulo ki te fakatuʼu ʼo te ʼu kokelekasio faka Kilisitiano ʼi te ʼu kolo ʼaia. ʼI te temi leva ʼaenī, ʼi tana kua nofo ʼi te fale pilisoni, neʼe faitohi ia Paulo ki te kau Kilisitiano ʼaia. Ko te ʼu tohi ʼaia ʼe tuʼu ʼi te Tohi-Tapu, pea ʼe higoa ko te tohi ki te kau Efesi pea mo te tohi ki te kau Filipe. ʼI te temi nei ʼe fakahā age e Paulo kia Timoteo te ʼu meʼa ʼaē ʼe tonu ke ina tohi ki tona ʼu kaumeʼa Kilisitiano ʼaē ʼi Filipe.

Neʼe agalelei te kau Kilisitiano ʼo Filipe kia Paulo. Neʼe nātou fakamomoli ki ai te meʼa ʼofa ʼi tana nofo ʼi te fale pilisoni, pea ʼe fia fakamālo age kia nātou ʼo ʼuhiga mo te faʼahi ʼaia. Ko Epafolotito, ʼaē neʼe ina ʼaumai te meʼa ʼofa. Kae neʼe mahaki kovi ia pea neʼe meihiʼi pe ke mate. ʼI te temi nei kua lelei tona mahaki pea kua tokalelei ke toe liliu ki tona ʼapi. ʼE liliu anai ia ki Filipe mo te tohi ʼa Paulo pea mo Timoteo.

ʼI te temi ʼaē neʼe pilisoni ai ia Paulo, neʼe ina fai te ʼu tohi e lua ʼe tou maʼu ʼi te Tohi-Tapu. Ko te tohi neʼe ina fai ki te kau Kilisitiano ʼi te kolo ko Kolose. ʼE koutou ʼiloʼi pe neʼe fakahigoa feafeaʼi te tohi ʼaia? Ko te tohi ki te kau Kolose. Ko te tahi tohi neʼe ina fai ki tona kaumeʼa ko Filemone ʼaē ʼe toe nofo foki mo ia ʼi Kolose. Ko te tohi ʼaia ʼe talanoa ai ia Paulo ʼo ʼuhiga mo te kaugana ʼa Filemone ko Onesimo.

Neʼe hola ia Onesimo mai ia Filemone pea neʼe ʼalu ia ki Loma. Neʼe ʼiloʼi e Onesimo neʼe pilisoniʼi ia Paulo ʼi te kolo ʼaia. Neʼe ʼalu ia ʼo ʼaʼahi ia ia, pea neʼe fai faka mafola age ia Paulo kia ia. Mole tuai pea liliu ia Onesimo ko te Kilisitiano. Pea neʼe fakahemala ia Onesimo ʼi tana hola. Kae ʼe koutou ʼiloʼi pe koteā te meʼa ʼaē neʼe ʼui age e Paulo kia Filemone ʼi tana tohi?

Neʼe kole age e Paulo kia Filemone ke ina fakamolemole kia Onesimo. Neʼe tohi fēnei e Paulo, ‘ ʼE ʼau toe fekauʼi atu ia ia kia koe. Kae ʼi te temi nei ʼe mole ko hau tagata kaugana pe. ʼI te temi nei, ʼe ko tou tēhina fakalaumālie.’ ʼI te liliu ʼa Onesimo ki Kolose neʼe ina ʼave te ʼu tohi ʼaia e lua, ko te tahi tohi ki te kau Kolose pea ko te tahi kia Filemone. ʼE mahino papau ia neʼe lagi fiafia ʼaupito ia Filemone, ʼi tana ʼiloʼi ʼaē kua liliu tana tagata kaugana ko te Kilisitiano.

ʼI te faitohi ʼa Paulo ki te kau Filipe pea mo Filemone, neʼe ina fakahā kia nātou ia te logo lelei. Neʼe ʼui fēnei e Paulo ki te kau Filipe: ‘ ʼE ʼau fekauʼi atu ia Timoteo. Kae kua vave pe taku toe ʼaʼahi atu ia koutou.’ Pea neʼe ina tohi fēnei kia Filemone: ‘Teuteuʼi hoku nofoʼaga ʼi tou ʼapi.’

ʼI te mavae ʼa Paulo ʼi te fale pilisoni neʼe ʼalu ʼo ʼaʼahi ki tona ʼu tēhina mo tuagaʼane Kilisitiano ʼi te ʼu potu kehekehe. Kae ki muli age neʼe toe pilisoniʼi ia Paulo ʼi Loma. ʼI te temi ʼaia neʼe ina ʼiloʼi leva ʼe matehi anai ia ia. Koia neʼe faitohi ai kia Timoteo pea ina kole ki ai ke foimo haʼu kia ia. Neʼe tohi fēnei e Paulo: ‘Neʼe ʼau nofo agatonu ki te ʼAtua, pea ʼe ina fakapale anai ʼau.’ Hili kiai ni ʼu taʼu ki te mate ʼo Paulo, neʼe toe maumauʼi ia Selusalemi, ʼo fai leva te meʼa ʼaia e te kau Loma.

ʼE lahi te ʼu tohi ʼo te Tohi-Tapu. Neʼe fai e Sehova ʼAtua ke tohi e te ʼapositolo ko Soane te ʼu tohi fakaʼosi, ʼo kau kiai mo te tohi ʼo te Fakahā. ʼE talanoa te tohi faka Tohi-Tapu ʼaia ki te ka haʼu. Tou vakaʼi ʼi te temi nei te ʼu meʼa ʼaē ka hoko anai ʼi te temi ka haʼu.