ʼE KOUTOU ʼiloʼi koa pe ko ai te fafine ʼaenī pea mo te ʼu tagata ʼaenī e toko lua? Ko te fafine ʼe ko Malia Maketalena, ko te kaumeʼa ʼo Sesu. Pea ko te ʼu tagata ʼaē ʼe teu hina ʼe ko te ʼu ʼaselo. Ko te potu ʼaē neʼe hū kiai ia Malia neʼe ko te potu ʼaē neʼe tuku kiai te sino ʼo Sesu ʼi tona ʼosi mate. ʼE ko te falemaka. Kae ʼi te temi nei kua puli te sino ʼo Sesu! Ko ai ʼaē neʼe ina toʼo? Tou vakaʼi te faʼahi ʼaia.

ʼI te ʼosi mate ʼo Sesu, neʼe ʼui e te ʼu pelepitelo kia Pilato: ‘ ʼI te temi ʼaē neʼe kei maʼuli ai ia Sesu, neʼe ina ʼui ʼe fakatuʼuake anai ʼi te hili ʼo ʼaho e tolu. Koia ke ke fakatotonu ke leʼoleʼo te falemaka. Pea ʼe mole feala anai ke toʼo e te ʼu tisipulo te sino ʼo Sesu, pea nātou ʼui kua fakatuʼuake ia mai te mate!’ Neʼe ʼui age e Pilato ki te ʼu pelepitelo ke nātou fekauʼi he ʼu tagata solia ke nātou ʼolo ʼo leʼoleʼo te falemaka.

Kae ʼi te māfoatā ʼo te tolu ʼaho ki te ʼosi mate ʼo Sesu, neʼe hā fakapunamaʼuli te ʼaselo ʼa Sehova, pea neʼe ina fuli te maka ʼo te falemaka. Neʼe matataku ʼaupito te ʼu tagata solia ʼo mole feala ai hanatou gaūgaūe. Pea ʼi tanatou sio ki te loto falemaka, kua puli tona sino! Ko ʼihi ʼi te kau solia neʼe nātou ʼolo ki te kolo ʼo nātou fakahā te meʼa ʼaia ki te kau pelepitelo. ʼE koutou ʼiloʼi pe koteā te meʼa ʼaē neʼe fai e te ʼu pelepitelo agakovi ʼaia? Neʼe nātou totogi te kau solia ke nātou fai he ʼu fakamatala loi. Neʼe ʼui fēnei e te kau pelepitelo ki te kau solia: ‘Koutou fakamatala neʼe ʼōmai tana ʼu tisipulo ʼi te pōʼuli ʼi te lolotoga ʼo takotou momoe, pea neʼe nātou kaihaʼa tona sino.’

ʼI te lolotoga ʼo te temi ʼaia, ko te ʼu kaumeʼa fafine ʼo Sesu, neʼe nātou ʼolo ki te falemaka. Neʼe nātou punamaʼuli ʼi tanatou maʼu atu kua gaʼasi te falemaka! Fokifā pe pea hā age te ʼu ʼaselo e toko lua ʼe gigila tonā ʼu kofu. Neʼe nā fehuʼi age: ‘He koʼe ʼe koutou kumi ia Sesu ʼi henī? Kua fakatuʼuake ia. Koutou ʼolo fakavilivili ʼo fakahā ki te ʼu tisipulo.’ Pea neʼe foimo feleleʼi ai te ʼu fafine ʼo tala te meʼa ʼaia! Kae ʼi te ala neʼe fakatuʼu ia nātou e te tagata. ʼE koutou ʼiloʼi pe ko ai te tagata ʼaia? Neʼe ko Sesu! Neʼe ina ʼui age kia nātou: ‘Koutou ʼolo ʼo fakahā ki taku ʼu tisipulo.’

ʼI te fakahā age e te ʼu fafine ki te ʼu tisipulo kua toe maʼuli ia Sesu pea neʼe nātou sisio ki ai, neʼe mole fia tui te kau tisipulo ki te fakamatala ʼaia. Neʼe feleleʼi ai ia Petelo pea mo Soane ki te falemaka, kae neʼe gaʼasi ia! ʼI te mavae ʼa Petelo pea mo Soane, neʼe nofo ia Malia Maketalena. Neʼe fakasiosio ia ʼi te temi ʼaia ki te loto falemaka pea neʼe sio ia ki te ʼu ʼaselo e toko lua.

ʼE koutou ʼiloʼi pe koteā te meʼa ʼaē neʼe hoko ki te sino ʼo Sesu? Neʼe pulihi e te ʼAtua. Neʼe mole fakatuʼuake e te ʼAtua ia Sesu ʼaki te sino kakano ʼaē neʼe mate mo ia. Neʼe ina foaki age kia Sesu te sino fakalaumālie foʼou, ohage ko te ʼu sino fakalaumālie ʼo te kau ʼaselo ʼaē ʼe ʼi selo. Kae moʼo fakahā ki tana ʼu tisipulo ʼe kua maʼuli ia, neʼe feala ke kofuʼi e Sesu he sino kakano ke feala he sio ʼa te hahaʼi kia ia, ohage ko te meʼa ʼaē ka tou vakaʼi anai.