HISITOLIA 116
ʼE Lava Feafeaʼi Hatatou Maʼu Te Maʼuli Heʼegata
ʼE FEALA koa hakotou fakahā mai pe koteā te meʼa ʼaē ʼe lau e te kiʼi taʼahine pea mo tona ʼu kaumeʼa? ʼIo, ʼe nātou lau te tohi ʼaē ʼe koutou lolotoga lau—Te Tohi ʼo Te ʼu Hisitolia Faka Tohi-Tapu. Pea ʼe nātou lolotoga lau te hisitolia ʼaenī ʼaē ʼe koutou lau—“ ʼE Lava Feafeaʼi Hatatou Maʼu Te Maʼuli Heʼegata.”
ʼE koutou ʼiloʼi koa te meʼa ʼaē ʼe nātou ako? ʼUluaki, ʼe tonu ke tou ʼiloʼi ia Sehova pea mo tona ʼAlo ko Sesu, mo kapau ʼe tou fia maʼu te maʼuli heʼegata. ʼE ʼui fēnei e te Tohi-Tapu: ‘Koʼeni te faka ʼuhiga ʼo te maʼuli heʼegata. Ko te ako ʼo te ʼiloʼi ʼo te ʼAtua moʼoni pe e tahi, pea mo tona ʼAlo ʼaē neʼe ina fekauʼi mai, ko Sesu Kilisito.’
ʼE lava feafeaʼi hatatou ʼiloʼi ia Sehova pea mo tona ʼAlo ko Sesu? ʼE tonu ke tou lau te tohi ʼaenī: Te Tohi ʼo Te ʼu Hisitolia Faka Tohi-Tapu mai te kamataʼaga ʼo aʼu ki te fakaʼosi. ʼE lahi te ʼu meʼa ʼaē ʼe ina fakahā mai ʼo ʼuhiga mo Sehova pea mo Sesu. Pea ʼe ina fakahā mai ai te ʼu meʼa ʼaē neʼe nā fai pea mo te ʼu meʼa ʼaē ka nā fai anai. Kae ʼe mole tonu ke gata ʼaki pe tatatou lau te tohi ʼaenī.
ʼE koutou sio koa ki te tohi ʼaē ʼe tuku ʼi lalo? Ko te Tohi-Tapu. Koutou kole age ki he tahi ke ina lau atu te ʼu vaega ʼo te Tohi-Tapu ʼaē ʼe tuʼu ʼi te ʼu hisitolia ʼo te tohi ʼaenī. ʼE fakahā mai e te Tohi-Tapu te ʼu manatu ʼaē ʼe tonu ke tou ʼiloʼi, ke feala ai hatatou tauhi kia Sehova ʼo mulimuli pe ki tona finegalo pea ke tou maʼu ai te maʼuli heʼegata. Koia ʼe tonu ai ke tou fakamāmāhani ʼi te ako tuʼumaʼu ʼo te Tohi-Tapu.
Kae ʼe mole feʼauga ʼaki pe tatatou ako ʼaē ke tou ʼiloʼi ia Sehova ʼAtua pea mo Sesu Kilisito. ʼE feala ke lahi te ʼu meʼa ʼaē ʼe tou ʼiloʼi ʼo ʼuhiga mo nāua pea mo tanā ʼu akonaki, ka mole tou maʼu anai ia te maʼuli heʼegata. ʼE koutou ʼiloʼi pe koteā te tahi meʼa ʼaē ʼe tonu ke tou fai?
ʼE tonu ke ʼalutahi totatou maʼuli mo te ʼu meʼa ʼaē ʼe tou ako. ʼE koutou manatuʼi ia Sutasi Isikaliote? Neʼe kau ki te toko 12 ʼapositolo ʼaē neʼe fili e Sesu. Neʼe lahi te ʼu meʼa ʼaē neʼe ʼiloʼi e Sutasi ʼo ʼuhiga mo Sehova pea mo Sesu. Kae koteā te meʼa ʼaē neʼe hoko kia ia? Mole faʼa fualoa pea liliu ia ʼo manatu pe kia ia, pea neʼe ina lavakiʼi ia Sesu ki tona ʼu fili ki te ʼu foʼi piesi siliva e 30. Koia ʼe mole maʼu anai e Sutasi ia te maʼuli heʼegata.
ʼE kei koutou manatuʼi ia Keasi, te tagata ʼaē neʼe tou talanoa ki ai ʼi te Hisitolia 69? Neʼe ina fia maʼu te ʼu mutuʼi meʼa pea mo te paʼaga neʼe mole ʼaʼana, pea neʼe ina fai ai te loi ke ina maʼu ai te ʼu meʼa ʼaia. Kae neʼe fakatūʼa ia ia e Sehova. Pea ʼe ina fakatūʼa anai tatou mo kapau ʼe mole tou fakalogo ki tana ʼu lao.
Kae neʼe lahi te ʼu hahaʼi neʼe nātou tauhi agatonu tuʼumaʼu kia Sehova. ʼE mole tou fia hage koa la ko nātou ʼaia? Ko te kiʼi tama ko Samuele ʼe ko he faʼifaʼitaki lelei ʼaia ke tou mulimuli kiai. Tou manatuʼi, ohage ko te meʼa neʼe tou vakaʼi ʼi te Hisitolia 55, neʼe kamata tauhi kia Sehova ʼi te tapenakulo ʼi tona taʼu fā peʼe ko tona taʼu nima. Koia tatau aipe peʼe kei koutou veliveli, kae ʼe feala ke koutou tauhi kia Sehova.
ʼE mahino ia, ʼe ko Sesu Kilisito ʼaē ʼe tonu ke tou mulimuli ki ai. Māʼiape la mo te temi ʼaē neʼe kei tamasiʼi ai, ohage ko tona fakahā ʼi te Hisitolia 87, neʼe ʼalu ia ki te fale lotu ʼo talanoa ki te hahaʼi ʼo ʼuhiga mo tana Tāmai ʼaē ʼe ʼi selo. Tou mulimuli ki tana faʼifaʼitaki. Tou fakahā ki te hahaʼi tokolahi te ʼu meʼa ʼaē ʼe tou ʼiloʼi ʼo ʼuhiga mo Sehova ʼAtua pea mo tona ʼAlo ko Sesu Kilisito. Kapau ʼe tou fai te ʼu meʼa ʼaia, pea ʼe feala anai ke tou maʼuli ʼo heʼegata ʼi te palatiso foʼou ʼa te ʼAtua ʼi te kele.