HISITOLIA 40
Neʼe Tāʼi e Moisese Te Maka
KUA hili taʼu e 10, 20, 30, 39! Kei nonofo pe te kau Iselaelite ʼi te toafa. Kae ʼi te ʼu taʼu fuli ʼaia neʼe tokaga aipe ia Sehova ki tana hahaʼi. Neʼe ina fafaga ia nātou ʼaki te mane. Neʼe ina takitaki nātou ʼi te ʼaho ʼaki te pou ʼao, pea ʼi te pōʼuli ʼaki te pou afi. Pea ʼi te ʼu taʼu fuli ʼaia neʼe mole popo ʼonatou ʼu mutuʼi meʼa pea neʼe mole fufula ʼonatou ʼu vaʼe.
Ko te ʼuluaki māhina ʼaenī ʼo te 40 taʼu talu mai tanatou mavae mai Esipito. Kua toe nonofo te kau Iselaelite ʼi Katesi. Neʼe nātou nonofo ai kua hili nei kiai taʼu e 40, ʼi te temi ʼaē neʼe fekauʼi ai te ʼu malomu e toko 12 ke ʼolo ʼo fakasiosio te fenua ʼo Kanaane. Ko te tokolua ʼo Moisese ko Miliame neʼe mate ʼi Katesi. Pea ohage pe ko te temi ki muʼa atu, neʼe hoko ai te fihifihia.
Neʼe mole maʼu e te hahaʼi he vai. Pea neʼe nātou meo fēnei kia Moisese: ‘Neʼe lelei age mokanapau neʼe mātou mamate. He koʼe koa neʼe ke fakamavae mātou mai Esipito ke mātou ʼōmai ki te koga meʼa kovi ʼaenī, ʼaē ʼe mole homo ai he meʼa? ʼE mole ʼi ai he pulapula, he ʼu fiku, he ʼu vite, he ʼu kelenate. Pea ʼe mole ʼi ai pe la he vai moʼo ʼinu.’
ʼI te ʼolo ʼa Moisese pea mo Alone ki te tapenakulo ʼo faikole, neʼe ʼui age e Sehova kia Moisese: ‘Fakatahitahiʼi te hahaʼi. Pea ke palalau ʼi ʼonatou muʼa ki te maka ʼaē ʼe tuʼu ai. Pea ʼe tafe mai anai te vai ʼe feʼauga ki te hahaʼi pea mo tanatou ʼu faga manu fuli.’
Pea neʼe fakatahitahiʼi e Moisese te hahaʼi, pea ina ʼui age: ‘Koutou fakalogo, ia koutou ʼaē ʼe mole falala ki te ʼAtua! ʼE tonu anai koa ke ma fai he meʼa mo Alone ke haʼu he vai maʼa koutou mai te maka ʼaenī?’ Pea neʼe tāʼi tuʼa lua e Moisese te maka ʼaia ʼaki tona tokotoko, pea neʼe tafe mai ai te vai lahi. Pea neʼe feʼauga te vai maʼa te hahaʼi fuli pea mo te ʼu faga manu.
Kae neʼe ʼita ia Sehova kia Moisese pea mo Alone. ʼE koutou ʼiloʼi pe koteā tona tupuʼaga? Koteʼuhi neʼe ʼui e Moisese pea mo Alone ko nāua ʼaē ka nā fakatafe te vai mai te maka. Kae ʼi tona fakahagatonu neʼe ko Sehova ʼaē neʼe ina fai te faʼahi ʼaia. Koia ʼi te mole fakahā e Moisese pea mo Alone ia te moʼoni ʼo ʼuhiga mo te faʼahi ʼaia, neʼe ʼui age e Sehova ʼe ina fakatūʼa anai ia nāua. Neʼe ina ʼui fēnei, ‘ ʼe mole koulua hū anai mo taku hahaʼi ki Kanaane.’
Mole tuai pea mavae te kau Iselaelite ʼi Katesi. Mole faʼa fualoa pea nātou tau ki te Moʼuga ko Olo. ʼI te tumutumu ʼo te moʼuga ʼaia, neʼe mate ai ia Alone. Neʼe mate ʼi tona taʼu 123. Neʼe lotomamahi ʼaupito te kau Iselaelite, pea neʼe tagiʼi e te hahaʼi ia Alone ia ʼaho e 30. Pea neʼe liliu tona foha ko Eleasale ko te pelepitelo lahi ʼo Iselaele.