HISITOLIA 46
Te ʼu Kaupā ʼo Seliko
HE KOʼE ʼe holo te ʼu kaupā ʼo Seliko? ʼE hage neʼe faka paʼulu te ʼu kaupā ʼaia ʼe he foʼi pulu lahi. Kae ʼi te ʼu ʼaho ʼaia neʼe mole heʼeki ʼi ai he ʼu foʼi pulu; neʼe mole heʼeki ʼi ai pe la he ʼu fana. Ko te tahi ʼaia milakulo ʼa Sehova! Tou vakaʼi pe koteā te meʼa ʼaē neʼe hoko.
Koʼeni te meʼa ʼaē neʼe ʼui e Sehova kia Sosue: ‘Ko koe pea mo tau ʼu tagata tau ʼe tonu ke koutou haʼele ʼo foliʼi te kolo. Koutou foliʼi te kolo ia ʼaho e ono. Koutou ʼamo mo koutou te aleka ʼo te fuakava. Ko te ʼu pelepitelo e toko fitu ʼe tonu anai ke nātou haʼele ʼi muʼa ʼo te aleka ʼo te fuakava pea mo nātou pupuhi fakatagi.
‘ ʼI te fitu ʼaho ʼe tonu anai ke koutou foliʼi tuʼa fitu te kolo. ʼOsi ʼaia pea ke koutou pupuhi fualoa takotou ʼu fakatagi pupuhi, pea ke koutou kalaga fuli ʼaki he toe kalaga tau lahi. Pea ʼe holo ai anai te ʼu kaupā!’
Neʼe fai e Sosue pea mo te hahaʼi te meʼa ʼaē neʼe ʼui age e Sehova. Lolotoga tanatou haʼele, neʼe nātou fakalogologo. Neʼe mole palalau he tahi. Ko te meʼa pe e tahi ʼaē neʼe nātou logo kiai, ʼe ko te pupuhi fakatahi pea mo te logoaʼa ʼo tanatou haʼele. ʼE mahino ia kua matataku te ʼu fili ʼo te hahaʼi ʼa te ʼAtua ʼi Seliko. ʼE koutou sio koa ki te maea kula ʼaē ʼe haʼi ʼi te matapā fakamālama? ʼO ai koa te matapā fakamālama ʼaia? ʼE mahino ia, neʼe fai e Laape te meʼa ʼaē neʼe fakatotonu age e te ʼu malomu e toko lua. Ko tona famili fuli neʼe nonofo mo ia ʼi loto ʼo atali ki te meʼa ʼaē ka hoko.
Pea ʼi te fitu ʼaho, ʼi tanatou ʼosi foliʼi tuʼa fitu te kolo, neʼe nātou pupuhi tanatou ʼu fakatagi pupuhi, pea kalaga te ʼu tagata tau, pea holo ai te ʼu kaupā. Pea neʼe ʼui fēnei e Sosue: ‘Koutou matematehi fuli te hahaʼi ʼo te kolo pea koutou tutu te kolo. Koutou tutu ia meʼa fuli. Koutou tuku pe te siliva, mo te aulo, mo te kapa pea mo te ukamea, pea ke koutou ʼave ki te koloā ʼo te fale fehikitaki ʼo Sehova.’
Neʼe ʼui age e Sosue ki te ʼu malomu ʼaē e toko lua: ‘Koulua ʼolo ki te ʼapi ʼo Laape, pea koulua ʼaumai ia ia pea mo tona famili fuli ki tuʼa.’ Neʼe hāofaki ia Laape pea mo tona famili, ohage pe ko te fakapapau age ʼaē e te ʼu malomu.