HISITOLIA 47
Ko Te Tagata Kaihaʼa ʼi Iselaele
ʼE KOUTOU sio ki te meʼa ʼaē ʼe tanu e te tagata ʼi tona falelā! Ko te kofu matalelei, pea mo te koga aulo pea mo te ʼu foʼi piesi siliva. Neʼe ina toʼo ʼi te kolo ʼo Seliko. Kae koteā koa te meʼa ʼaē neʼe tonu ke fai ki te ʼu meʼa ʼo Seliko? ʼE kei koutou manatuʼi?
Neʼe tonu ke nātou fakaʼauha fuli te ʼu meʼa, pea neʼe tonu ke ʼave te aulo pea mo te siliva ki te ʼu koloā ʼo te tapenakulo ʼo Sehova. Kae neʼe talagataʼa te hahaʼi ʼaia ki te ʼAtua. Neʼe nātou kaihaʼa te ʼu meʼa ʼa te ʼAtua. Ko te higoa ʼo te tagata ʼe ko Akani, pea neʼe kau ki ai mo tona famili. Tou vakaʼi muʼa te meʼa ʼaē neʼe hoko.
ʼI te ʼosi kaihaʼa e Akani te ʼu meʼa ʼaia, neʼe fekauʼi e Sosue te ʼu tagata ke ʼolo ʼo tauʼi te kolo ko Ai. Kae neʼe mole nātou mālo ʼi te tau ʼaia. Neʼe mamate ʼihi, pea neʼe feholaki ʼihi. Neʼe lotomamahi ʼaupito ia Sosue. Neʼe tulolo ki te kele pea faikole fēnei kia Sehova: ‘He koʼe neʼe ke tuku ke hoko te meʼa ʼaenī kia mātou?’
Neʼe tali age e Sehova: ‘Tuʼu ake! Kua agahala ia Iselaele. Neʼe nātou toʼo te ʼu meʼa neʼe tonu ke maumauʼi peʼe ʼave ki te tapenakulo ʼo Sehova. Neʼe kaihaʼa te kofu matalelei pea neʼe fufū. ʼE hoki ʼau tapuakina anai koutou mo kapau ʼe koutou fakaʼauha te meʼa ʼaia, pea mo ia ʼaē neʼe ina toʼo te ʼu meʼa ʼaia.’ Neʼe ʼui age e Sehova ʼe ina fakahā anai kia Sosue pe ko ai te tagata agakovi ʼaia.
Koia neʼe fakatahitahiʼi ai e Sosue te hahaʼi fuli, pea neʼe fakahā age e Sehova ko te tagata agakovi ʼe ko Akani. Neʼe ʼui fēnei e Akani: ‘Kua ʼau agahala. Neʼe ʼau sio ki te kofu matalelei, pea mo te koga aulo pea mo te ʼu foʼi piesi siliva. Neʼe ʼau fia fai ʼaupito ki te ʼu meʼa ʼaia ʼo ʼau toʼo ai. ʼE koutou maʼu anai te ʼu meʼa ʼaia neʼe ʼau tanu ʼi toku loto falelā.’
ʼI tanatou maʼu te ʼu meʼa ʼaia pea mo ʼaumai kia Sosue, neʼe ina ʼui age kia Akani: ‘He koʼe neʼe ke tuku mātou ki te malaʼia? ʼI te temi nei ʼe fakahoko e Sehova te malaʼia kia koe!’ Pea neʼe taumakaʼi e te hahaʼi fuli ia Akani pea mo tona famili ʼo nātou mamate ai. ʼE mole hā ʼaki koa la ʼe mole tonu ke tou toʼo he meʼa ʼe mole ʼa tatou?
Hili pe ʼaia pea toe ʼalu ia Iselaele ʼo tauʼi ia Ai. ʼI te temi leva ʼaia neʼe tokoni ia Sehova ki tana hahaʼi, pea neʼe nātou mālo ai ʼi te tau.