HISITOLIA 41
Ko Te Gata Kapa
ʼI TAKOTOU sio ʼe hage koa te gata ʼaē ʼe takatakai ʼi te pou ʼe ko he gata moʼoni? Kailoa ia. Ko te gata kapa. Neʼe ʼui age e Sehova kia Moisese ke ina tautau te gata kapa ki te pou, ke feala hona sioʼi e te hahaʼi pea ke nātou maʼuʼuli ai. Kae ko te ʼu gata ʼaē ʼe totolo ʼi te kele ʼe ko te ʼu gata moʼoni. Neʼe nātou uʼusi te hahaʼi pea neʼe nātou mahahaki ai. ʼE koutou ʼiloʼi koa pe koteā tona tupuʼaga?
Neʼe hoko te faʼahi ʼaia he neʼe fakafeagai te kau Iselaelite ki te ʼAtua pea mo Moisese. Neʼe nātou lāuga fēnei: ‘He koʼe neʼe koulua fakamavae mātou mai Esipito ke mātou ʼōmai ʼo mamate ʼi te toafa? ʼE mole maʼu ai he meʼa kai peʼe ko he vai. Pea kua mātou fiu ʼi te kai ki te mane ʼaenī.’
Kae ko te mane neʼe ko he meʼa kai ʼe lelei. Neʼe foaki faka milakulo age e Sehova te mane kia nātou. Pea neʼe ina toe foaki faka milakulo age mo te vai. Kae neʼe mole loto fakafetaʼi te hahaʼi ʼo ʼuhiga mo te tokaga ʼa te ʼAtua kia nātou. Koia neʼe fekauʼi ai e Sehova te ʼu gata usiʼusi ʼaia moʼo fakatūʼa ʼo te kau Iselaelite. Neʼe uʼusi nātou e te ʼu gata, pea neʼe tokolahi ia nātou neʼe mamate.
Pea neʼe ʼolo te hahaʼi kia Moisese pea nātou ʼui age: ‘Kua mātou agahala, koteʼuhi neʼe mātou palalau fakafeagai kia Sehova pea mo koe. ʼI te temi nei faikole kia Sehova ke ina fakamamaʼo te ʼu gata ʼaenī.’
Pea neʼe faikole ai ia Moisese maʼa te hahaʼi. Pea neʼe ʼui age e Sehova kia Moisese ke ina faʼu te gata kapa ʼaia. Neʼe ina ʼui age ke ina tautau ki he pou, pea ko ʼaē neʼe uʼusi e te ʼu gata, ʼe tonu anai ke ina sioʼi te gata kapa ʼaia. Neʼe mulimuli lelei ia Moisese ki te meʼa ʼaē neʼe ʼui age e te ʼAtua. Pea ko te hahaʼi ʼaē neʼe uʼusi e te ʼu gata neʼe nātou sioʼi te gata kapa pea neʼe nātou toe lelei ai.
ʼE ʼi ai te ako ʼe tou maʼu ʼi te hisitolia ʼaenī. Ko tatou fuli, ʼi hona faʼahiga ʼaluʼaga, ʼe tou tatau mo te kau Iselaelite ʼaē neʼe uʼusi e te ʼu gata ʼaia. ʼE hage kua tou mamate. Kapau ʼe koutou sio ki ʼokotou tafaʼaki, pea ʼe koutou sisio anai ki te hahaʼi ʼe matutuʼa, mo mahahaki, pea mo mamate. ʼE hoko te meʼa ʼaia ʼuhi ko te maliu ʼa te ʼuluaki tagata pea mo te ʼuluaki fafine, ia Atama pea mo Eva, mai ia Sehova, pea ko tatou fuli ko tanā fānau. Kae neʼe fai e Sehova te fakatuʼutuʼu ke feala hatatou maʼuli ʼo heʼegata.
Neʼe fekauʼi mai e Sehova tona ʼAlo, ko Sesu Kilisito, ke haʼu ki te kele. Neʼe mate ia Sesu ʼi te pou, koteʼuhi neʼe manatu te tokolahi ʼe ko he tagata agakovi. Kae neʼe momoli ifo e Sehova ia Sesu moʼo hāofaki ʼo tatou. Kapau ʼe tou sio ki ai, kapau ʼe tou mulimuli ki ai, pea ʼe feala anai ke tou maʼu te maʼuli heʼegata. Kae ʼe hoki tou vakaʼi anai he tahi ʼu puani ʼo ʼuhiga mo te faʼahi ʼaia ki muli age.