HISITOLIA 39
ʼE Homo Te ʼu Fisiʼi Teu ʼi Te Tokotoko ʼo Alone
KOUTOU fakatokagaʼi te ʼu fisiʼi teu pea mo te ʼu fuaʼi amote momoho ʼaē kua homo ʼi te tokotoko, peʼe ko te moʼi ʼakau. Ko te tokotoko ʼo Alone. Neʼe homo ai te ʼu fisiʼi teu pea mo te ʼu fuaʼi ʼakau ʼi te po pe e tahi! Tou vakaʼi muʼa pe koteā tona tupuʼaga.
Neʼe fualoa te feʼoloʼaki ʼa te kau Iselaelite ʼi te toafa. ʼI te manatu ʼa ʼihi neʼe mole tonu ke takitaki nātou e Moisese, pea neʼe mole tonu ke pelepitelo lahi ia Alone. Neʼe kau ia Kole ia nātou ʼaē neʼe manatu feiā, ʼo kau ai mo Tatane, mo Apilame pea mo te ʼu tagata takitaki ʼo te hahaʼi e toko 250. Ko nātou fuli ʼaia neʼe nātou ʼolo kia Moisese pea nātou ʼui fēnei age kia ia: ‘He koʼe ʼe koulua hikihiki ia koulua ke koulua māʼoluga age ia mātou?’
Neʼe ʼui fēnei e Moisese kia Kole pea mo te hahaʼi ʼaē neʼe mulimuli ia ia: ‘ ʼI te ʼapogipogi uhu, koutou toʼo te ʼu ipu ʼaiʼaga afi ʼo koutou ʼai kiai te iseso, pea koutou ʼōmai ki te tapenakulo ʼo Sehova. ʼE tou ʼiloʼi ai anai pe ko ai ʼaē ka fili e Sehova.’
ʼI te ʼaho ake, neʼe ʼōmai ia Kole pea mo te toko 250 hahaʼi ki te tapenakulo. Ko te tokolahi neʼe nātou ʼōmai ʼo lagolago ki te ʼu tagata ʼaia. Neʼe ʼita ʼaupito ia Sehova. Neʼe ʼui fēnei e Moisese: ‘Koutou fakamamaʼo mai te ʼu falelā ʼo te ʼu tagata agakovi ʼaenā. ʼAua naʼa koutou fāfā ki tanatou ʼu meʼa.’ Neʼe fakalogo te hahaʼi, pea neʼe nātou fakamamaʼo ʼi te ʼu falelā ʼo Kole, ʼo Tatane pea mo Apilame.
Pea neʼe ʼui fēnei e Moisese: ‘ ʼAki te meʼa ʼaenī ʼe koutou ʼiloʼi ai anai pe ko ai ʼaē neʼe fili e Sehova. ʼE ava anai te kele pea ʼe ina folo anai te ʼu tagata agakovi ʼaenā.’
ʼI te ʼosi palalau ʼa Moisese, neʼe ava te kele, pea neʼe tō ki loto te falelā ʼo Kole pea mo tana ʼu meʼa, mo Tatane pea mo Apilame pea mo nātou ʼaē neʼe nātou mulimuli ia nātou, pea neʼe tanu nātou e te kele. ʼI te logo ʼa te hahaʼi ki te ʼu kekē ʼa nātou ʼaē neʼe tō ki te lalo kele, neʼe nātou ʼui fēnei: ‘Tou feholaki! Naʼa toe folo mo tatou e te kele!’
Ko Kole pea mo te toko 250 hahaʼi ʼaē neʼe mulimuli ia ia neʼe kei tutuʼu ōvi ki te tapenakulo. Pea neʼe fakatō ifo e Sehova te afi, pea neʼe nātou vela fuli ai. Pea neʼe ʼui e Sehova kia Eleasale, foha ʼo Alone ke ina toʼo te ʼu ipu ʼaiʼaga afi ʼa te ʼu tagata ʼaia kua mamate, pea ke ina faʼu ʼaki he ʼu lauʼi ukamea mānifi moʼo ʼaofi ʼo te ʼaletale. Ko te ʼaofi ʼaia ʼo te ʼaletale, neʼe ko he fakatokaga ki te kau Iselaelite ke nātou manatuʼi ʼe mole ʼi ai he tahi age tagata, gata pe kia Alone pea mo tona ʼu foha ʼe tonu ke nātou gāue faka pelepitelo maʼa Sehova.
Kae neʼe loto ia Sehova ke mahino lelei te hahaʼi ʼe ko Alone pea mo tona ʼu foha ʼaē neʼe ina fili ke nātou pelepitelo. Koia neʼe ina ʼui age ai kia Moisese: ‘Fekau ki te ʼu pule ʼo te ʼu telepi fuli ʼo Iselaele ke nātou ʼōmai mo tonatou ʼu tokotoko. ʼO ʼuhiga mo te telepi ʼo Levi, fekau ia Alone ke ina ʼaumai tona tokotoko. Pea ke ʼai te ʼu tokotoko fuli ʼaia ki te tapenakulo ia muʼa ʼo te aleka ʼo te fuakava. Ko te tokotoko ʼo te tagata ʼaē ka ʼau fili ke pelepitelo, ʼe homo ai anai he ʼu fisiʼi teu.’
ʼI te uhu ake neʼe sio ia Moisese ko te tokotoko ʼo Alone ʼaē neʼe homo ai te ʼu fisiʼi teu, pea neʼe homo ai mo te ʼu fuaʼi amote momoho! Kua koutou mahino la ʼi te temi nei pe koʼe neʼe fakahomo e Sehova te ʼu fisiʼi teu ʼi te tokotoko ʼa Alone?