HISITOLIA 52
Ko Seteone Pea Mo Tana Toko 300 Tagata
ʼE KOUTOU sio koa ki te meʼa ʼaē ʼe hoko? Ko te ʼu tagata fuli ʼaia ʼe ko te ʼu tagata tau ʼo Iselaele. Ko te ʼu tagata ʼaē ʼe punonou ʼe nātou lolotoga ʼiʼinu. Ko te tuʼi fakamāu ko Seteone, ʼe ko te tagata ʼaē ʼe tuʼu ōvi kia nātou. ʼE ina vakaʼi peʼe feafeaʼi tanatou ʼiʼinu.
Koutou sioʼi fakalelei te kehekehe ʼo te ʼinu ʼa te ʼu tagata. Ko ʼihi ʼe nātou ʼiʼinu ʼo punou katoa ʼonatou fofoga ki te vai. Kae ko te tahi ʼe ina ʼohu te vai ʼaki tona nima, ke feala ai hana sio ki te meʼa ʼaē ʼe hoko ʼi ʼona tafaʼaki. Ko te meʼa ʼaia ʼe maʼuhiga, koteʼuhi neʼe ʼui age e Sehova kia Seteone ke ina fili pe te ʼu tagata ʼaē ʼe nonofo lamalama lolotoga tanatou ʼiʼinu. Ko nātou ʼaē, neʼe ʼui age e te ʼAtua, ʼe tonu ke nātou liliu ki tonatou ʼu ʼapi. Tou vakaʼi pe koteā tona tupuʼaga.
Ko te kau Iselaelite neʼe nātou toe felāveʼi mo te fihifihia lahi. Neʼe hoko te faʼahi ʼaia koteʼuhi neʼe mole nātou fakalogo kia Sehova. Neʼe puleʼi ia nātou pea mo gaohi koviʼi e te hahaʼi ʼo Matiane. Koia neʼe pāui te kau Iselaelite kia Sehova ke tokoni age kia nātou, pea neʼe logo ia Sehova ki tanatou pāui.
Neʼe ʼui age e Sehova kia Seteone ke ina tānaki he kautau, pea neʼe tānaki ai e Seteone te ʼu tagata tau e toko 32 000. Kae ko te kautau ʼaē ʼe ʼōmai ʼo tauʼi ia Iselaele neʼe ko te toko 135 000. Kae neʼe ʼui age e Sehova kia Seteone: ‘ ʼE koutou hahaʼi fau.’ He koʼe neʼe ʼui age e Sehova te meʼa ʼaia?
Koteʼuhi kapau ʼe mālo ia Iselaele ʼi te tau, pea ʼe feala anai ke nātou ʼui neʼe nātou mālo ʼaki pe tonatou mālohi. ʼE feala anai ke nātou manatu ʼe mole ʼaoga kia nātou te tokoni ʼa Sehova. Koia neʼe ʼui age ai e Sehova kia Seteone: ‘ ʼUi age ki te ʼu tagata ʼaē ʼe matataku ke nātou liliu ki tonatou ʼu ʼapi.’ ʼI te fai e Seteone te faʼahi ʼaia, neʼe liliu ai te toko 22 000 tagata tau ki tonatou ʼu ʼapi. ʼE kei toe pe te toko 10 000 moʼo tauʼi ʼo te toko 135 000.
Kae koutou logo ki te meʼa ʼaē ʼe ʼui age e Sehova: ‘ ʼE kei koutou hahaʼi fau pe.’ Pea ina ʼui age ai kia Seteone ke ina ʼave te ʼu tagata ʼaia ʼo faka ʼinu ʼi te liuʼa, pea ko nātou ʼaē ʼe ʼiʼinu ʼo punou katoa tonatou fofoga ki te vai, ke ina fakaliliu ia nātou ʼaia ki tonatou ʼu ʼapi. Pea neʼe fakapapau age e Sehova, ‘ ʼE ʼau foaki atu anai te mālo ʼaki te ʼu tagata e toko 300 ʼaē neʼe nonofo lamalama lolotoga tanatou ʼiʼinu.’
Kua hoko mai te temi ʼaē ʼe tonu ai ke hoko te tau. Neʼe vaevae e Seteone tana ʼu tagata tau e toko 300 ko kūtuga e tolu. Neʼe ina foaki ki te tagata takitahi te fakatagi pupuhi, pea mo te ipu maka ʼe tuku ai te afi ʼi loto. ʼI te māʼupō, neʼe nātou ʼatakai te nofoʼaga ʼo tonatou ʼu fili. Pea ʼi te temi pe ʼaia, neʼe nātou pupuhi ai tanatou ʼu fakatagi pupuhi pea mo foaʼi tanatou ʼu ipu maka, pea mo nātou kalaga fēnei: ‘Ko te heletā ʼa Sehova pea mo Seteone!’ ʼI te ʼaʼala ake ʼa te ʼu fili, neʼe mole nātou ʼiloʼi pe koteā te meʼa ʼaē ʼe hoko, pea kua nātou matataku. Neʼe nātou feholaki fuli, pea neʼe mālo te kau Iselaelite ʼi te tau.