ʼI TE Tohi-Tapu ʼe koutou maʼu anai te tohi ʼe higoa ko Lute. ʼE ko te hisitolia ʼo te famili neʼe maʼuli ʼi te temi ʼaē neʼe ʼi ai te ʼu tuʼi fakamāu ʼi Iselaele. Ko Lute neʼe ko te fafine mai te fenua ko Moape; neʼe mole kau ia ʼi te kau Iselaele, te hahaʼi ʼa te ʼAtua. Kae ʼi te ʼiloʼi e Lute ia te ʼAtua moʼoni ʼaē ko Sehova, neʼe lahi ai tona ʼofa kia te ia. Ko Naomi ʼe ko te finematuʼa ʼaē neʼe tokoni kia Lute ke ina ʼiloʼi ia Sehova.

Ko Naomi ʼe ko te fafine Iselaelite. Ko ia pea mo tona ʼohoana pea mo tanā ʼu tama e toko lua, neʼe nātou ʼolo ki Moape ʼi te temi ʼaē neʼe hoge ai ia Iselaele. Pea ʼi te tahi ʼaho, neʼe mate leva te ʼohoana ʼo Naomi. Ki muli age pea ʼohoana te ʼu tama ʼa Naomi mo te ʼu taʼahine Moapite ko Lute pea mo Olipa. Kae hili kiai taʼu e 10, pea mamate te ʼu tama ʼaia e lua ʼa Naomi. Neʼe mamahi ʼaupito ia Naomi pea mo te ʼu fafine ʼaia! Koteā te meʼa ka fai e Naomi ʼi te temi nei?

ʼI te tahi ʼaho, neʼe fakatuʼutuʼu e Naomi ke toe liliu ki tona fenua. Neʼe fia nonofo ia Lute pea mo Olipa mo ia, pea neʼe nātou ʼolo fakatahi. Kae hili pe te kiʼi temi ʼi tanatou fagona ʼi te ala, neʼe maliu ia Naomi ki te ʼu fafine pea ina ʼui age: ‘Koulua liliu ki tokolua ʼu ʼapi pea koulua ʼolo ʼo nonofo mo takolua ʼu faʼe.’

Neʼe ʼuma ia Naomi kia nāua pea tauʼinē ʼo ina ʼui age ke nā ʼolo la. Neʼe nā kamata fetāgihi ai, koteʼuhi neʼe nā ʼofa ʼaupito kia Naomi. Neʼe nā ʼui age ki ai: ‘Kailoa! ʼE ma ʼolo anai mo koe ki tau hahaʼi.’ Kae neʼe tali age e Naomi: ‘ ʼE tonu ke koulua liliu ki tokolua ʼu ʼapi, naʼi ʼaku taʼahine. ʼE lelei age takolua ʼolo ki tokolua ʼu ʼapi.’ Pea neʼe liliu ai ia Olipa ki tona ʼapi. Kae neʼe mole fia liliu ia Lute.

Neʼe haga ia Naomi ki ai pea ina ʼui age: ‘Kua ʼalu ia Olipa. Mo koe foki la ʼe tonu ke ke ʼalu mo ia.’ Kae neʼe tali age e Lute: ‘Tuku tau faiga ʼaē ke ʼau mavae mo koe! Tuku ke ʼau ʼalu mo koe. Ko te potu ʼaē ka ke ʼalu anai kiai ʼe ʼau ʼalu anai kiai, pea ko te potu ʼaē ka ke nofo ai, ʼe ʼau nofo ai anai. Ko tau hahaʼi ʼe liliu anai ko taku hahaʼi, pea ko tou ʼAtua ʼe liliu anai ko toku ʼAtua. Ko te potu ʼaē ka ke mate ai ʼe ʼau mate ai anai, pea ʼe tanu anai ʼau ʼi te potu ʼaia.’ ʼI te ʼui age e Lute te meʼa ʼaia, neʼe mole toe faigaʼi e Naomi ke ina fakaliliu ia ia ki tona ʼapi.

Pea neʼe ʼolo ai te ʼu fafine e toko lua ʼaia ki Iselaele. Pea nā nonofo ai. Neʼe ʼalu ia Lute ʼo kamata gāue ʼi te ʼu gāueʼaga, koteʼuhi neʼe ko te temi ʼaia ʼaē neʼe tuʼusi ai te taʼukai ʼo te olose. Neʼe fakagafua e te tagata neʼe higoa ko Poase ke ina tae te olose ʼi tana gāueʼaga. ʼE koutou ʼiloʼi koa pe neʼe ko ai te faʼe ʼa Poase? Ko Laape ʼo te kolo ko Seliko.

ʼI te tahi ʼaho, neʼe ʼui age e Poase kia Lute: ‘Neʼe ʼau logo ki te ʼu meʼa fuli ʼaē neʼe ke fai, pea mo tau agalelei ʼaē kia Naomi. ʼE ʼau ʼiloʼi neʼe ke tuku tau tāmai pea mo tau faʼe pea mo tou fenua, pea kua ke haʼu ʼo nofo mo he ʼu hahaʼi neʼe mole heʼeki ke ʼiloʼi ʼi muʼa atu. ʼOfa pe ke agalelei ia Sehova kia koe!’

Neʼe tali age e Lute: ‘ ʼE ke agalelei ʼaupito kia ʼau. Kua ke fakafimālieʼi ʼau ʼaki tau ʼu palalau ʼaē neʼe ke fai mai.’ Neʼe ʼofa mamahi ia Poase kia Lute, pea mole tuai pea nā ʼohoana. Neʼe fiafia ai ia Naomi! Kae neʼe lahi age te fiafia ʼo Naomi ʼi te temi ʼaē neʼe maʼu ai e Lute pea mo Poase tana ʼuluaki tama, ʼaē neʼe higoa ko Opete. Ki muli age neʼe liliu ia Opete ko te kui tagata ʼa Tavite, pea ʼe hoki tou vakaʼi anai he tahi ʼu meʼa ʼo ʼuhiga mo ia.